Адыгэ къэралыгъо университетым щеджэ­рэ студентхэу кIэлэегъэджэ сэнэхьат зэзы­гъэгъотхэрэм «ПIуныгъэмкIэ IофшIагъэу щы­Iэхэм язэхэщэнрэ ягъэпсыкIэрэ» зыфи­Iорэ лъэныкъуакIэм къыдыхэлъытагъэу яшIэ­ныгъэхэм ахагъэхъощт.

Апэрэ студент купым иIоф­шIэн лицееу N 19-м щыригъэ­жьагъ. Нэбгырэ 39-мэ лъэны­къуакIэр аушэты. Апэрэ мэзитIум тхьамафэм студентхэр лекциехэм зэ — тIо якIуалIэх, еджапIэм ипащэ игуадзэ, клас-
снэ пащэхэр ягъусэхэу Iоф зэра­шIэщт планыр зэхагъэуцо. Iоф­тхьэбзэ зэфэшъхьафхэр зэ­хащэнхэу студентхэр агъасэх, джащ фэдэу IофшIэнымкIэ къа­фэфедэщт тхьапэхэр зэрагъэхьазырын фаер агурагъаIо. Педагог-психологым ныбжьыкIэхэм Iоф зэрадишIэрэм ишIуа­гъэкIэ мыщынэхэу урокыр къа­ты, ащкIэ шIыкIэ гъэнэфагъэхэр къызфагъэфедэх. Джащ фэдэу внекласснэ IофшIэным пае конспектхэри зэхагъэуцох.

— КIэлэегъэджэ сэнэхьатыр зэзыгъэгъотыхэрэм япчъагъэ хэдгъэхъон закъор арэп, ахэм шIэныгъэ куу ягъэгъотыгъэныр типшъэрылъ. Гъэсэныгъэм исис­темэ зэхъокIыныгъэу фэхъухэ­рэр къыдэтлъытэзэ Iоф адэтэшIэ. Мы лъэныкъуакIэм ишIуагъэкIэ гурыт еджапIэм чIэлъ шапхъэхэм ахэр нэIуасэ афэ­хъущтых. Ащ нэмыкIэу еджапIэм Iоф щыпшIэным шIуагъэу пылъыр студентхэм зэхашIэ, ар зэрэгъэшIэгъоныр, класснэ пащэм сабыйхэр фэщагъэ зэ­рэхъухэрэр, шIэныгъакIэ кIэлэеджакIохэм ябгъэгъотыным мэхьанэу иIэр къагурэIо, — къыIуагъ Адыгэ къэралыгъо уни­верситетым гъэсэныгъэмкIэ идепартамент ипащэу На­дежда Ильиновам.

Адыгэ къэралыгъо университетым
ипресс-къулыкъу.