2024-рэ илъэсым журналистикэм ылъэныкъокIэ АР-м и ЛIышъхьэ ишIухьафтынхэр афэгъэшъошэгъэнхэмкIэ зэнэкъокъум икIэуххэр Адыгеим щызэфахьысыжьыгъэх.

ПстэумкIи IофшIэгъэ 19 къы­рахьылIэгъагъ, лъэныкъуитIумкIэ анахь дэгъухэр къыхахыгъэх. Республикэм и ЛIышъхьэу КъумпIыл Мурат зэнэкъокъум щатекIуагъэхэм тыгъуасэ шIу­хьафтынхэр аритыжьыгъэх, рес­публикэ, муниципальнэ къэ­барлъыгъэIэс амалхэм яредактор шъхьаIэхэм аIукIагъ.
Iофтхьабзэм хэлэжьагъэх Адыгеим иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр, АР-м и ЛIышъхьэрэ иминистрэхэм я Кабинетрэ я Администрацие ипащэ игуадзэу Къонэ Заур, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, УФ-м IофшIэнымкIэ и ЛIыхъужъэу, АР-м илитературнэ-художест­веннэ, икIэлэцIыкIу журналхэм яредакцие иредактор шъхьаIэу, тхакIоу МэщбэшIэ Исхьакъ, фе­деральнэ къэралыгъо унитар предприятиеу «Урысыем и Поч­тэ» АР-мкIэ икъутамэ, Iахьзэ­хэлъ обществэ зэIухыгъэу «По­лиграф-Юг» зыфиIорэм, АР-м ижурналистхэм я Союз япащэ­хэр, къэбарлъыгъэIэс амалхэм яIофышIэхэр.

Республикэм и ЛIышъхьэ мэфэкIэу блэкIыгъэмкIэ — Урысые хэутыным и МафэкIэ — къэбарлъыгъэIэс амалхэм яIофышIэхэм къафэгушIуагъ, гуетыныгъэ фыряIэу Iоф зэра­шIэрэм, общественнэ зыпкъ­итыныгъэм икъэухъумэн, цIыф­хэм хэбзэ Iэшъхьэтетхэм цыхьэу афашIырэм зыкъегъэIэтыгъэным республикэ къэбарлъыгъэIэс амалхэм яIахь зэрахашIыхьэрэм афэшI зэрафэразэр къыIуагъ.
Республикэм ижурналистхэм яIэпэIэсэныгъэ зэрэхэхъуагъэр, зэнэкъокъум къырахьылIэгъэ IофшIагъэхэм ар къызэраушы­хьатырэр Адыгеим ипащэ къыхигъэщыгъ. Шъугу къэтэгъэкIы­жьы журналистикэм ылъэны­къокIэ АР-м и ЛIышъхьэ ишIу­хьафтынхэр афэгъэшъошэгъэнхэр 2008-рэ илъэсым зэрагъэ­нэфэгъагъэр. Республикэм и ЛIышъхьэ иунашъокIэ гъэрекIо щегъэжьагъэу сомэ мин 200-м нэсэу шIухьафтынхэр араты.
Мыгъэ материал гъэшIэгъонхэр къырахьылIагъэхэу, зигъо Iофыгъохэр ахэм къащаIэты­гъэхэу жюрим хэтхэм алъытагъ. ТекIоныгъэ къыдэзыхыгъэ Iоф­шIагъэхэм цIыфхэми, зэнэкъо­къум ижюрии осэшIу-
хэр къафа­шIыгъэх.
Теле,- радиокъэтынхэмкIэ Къэралыгъо телерадиокомпа­ниеу «Адыгеим» иIофышIэ купмэ (къэтынхэр зезыщэу Нэгэрэкъо Саниет, телеоператорэу Владислав Балабась, инженерэу Цыргъой Мариянэ) Кощхьэблэ районым щыщ Шорэхэм яунагъо фэгъэхьыгъэ фильмэм пае Адыгеим и ЛIышъхьэ ишIухьафтын къафагъэшъошагъ.

Гъэзетхэмрэ (журналхэмрэ) къащыхаутыгъэхэмкIэ текIоныгъэр къыдэзыхыгъэр Красно­гвардейскэ районым игъэзетэу «Зэкъошныгъэм» ипащэу, ире­дактор шъхьаIэу Ирина Ковалевар ары. Ащ истатьяу «А наша сеть вновь едет на ра­боту….» зыфиIорэр зыфэгъэ­хьыгъэр псэупIэу Большесидоровскэм дэсхэм хэушъхьафыкIыгъэ дзэ операцием хэлэ­жьэрэ ячIыпIэгъухэм IэпыIэ-
гъоу арагъэгъотырэр ары.
«Шъуиматериалхэр анахьэу зыфэгъэхьыгъэхэр тидзэкIолIхэм лIыхъужъныгъэу зэрахьэхэрэр, ахэм яунагъохэм якъэбархэр, ячIыпIэгъухэр дзэкIолIхэмрэ ахэм ягупсэхэмрэ IэпыIэгъу зэрафэхъухэрэр ары. Президентэу Владимир Путиным 2025-р Хэгъэгум иухъумакIо и Илъэсэу зэригъэнэфагъэм тэри детэгъаштэ. Анахьэу гъунэ зы­лъытфыщтыр тидзэкIолIхэм ящыкIэгъэ IэпыIэгъур ягъэгъотыгъэныр ары. Ахэм къагурыIон фае къотэгъу цыхьэшIэгъухэр зэряIэр. ДзэкъулыкъушIэхэмрэ ахэм яунагъохэм арысхэмрэ апае тиреспубликэ Iофышхоу щызэрахьэрэм фэгъэхьыгъэу шъори бэ къэшъутхырэр», — къыIуагъ КъумпIыл Мурат.
ШIухьафтынхэр заратыжь нэуж Адыгеим иэлектрон амал­хэм зягъэушъомбгъугъэнымкIэ зигъо Iофыгъохэм атегущыIа­гъэх. ДзэкIолIхэм IэпыIэгъоу аратырэм, ныбжьыкIэхэм пат­риотическэ пIуныгъэу арагъэгъотырэм, илъэсипшI пчъагъэ хъугъэу Урысыем щыпсэурэ лъэпкъхэр нахь зэзыпхырэ шIуа­гъэхэр къызэраухъумэхэрэм якъэгъэлъэгъон мэхьанэшхо зэриIэр республикэм и ЛIы­шъхьэ къыхигъэщыгъ. Джащ фэдэу къэбар нэпцIхэм апэуцужьыгъэнымкIэ къэбарлъы­гъэIэс амалхэм мэхьанэшхо зэряIэр КъумпIыл Мурат хи­гъэунэфыкIыгъ.

«Iофым, Урысыем щыпсэурэ лъэпкъхэм языкIыныгъэ игъэпытэн, социальнэ зыпкъитыныгъэр обществэм къыщыухъумэгъэным журналистхэм яIахьы­шхо хашIыхьэ. Хэгъэгум исуверенитет къэухъумэгъэнымкIэ, къэралыгъом хэхъоныгъэ егъэшIыгъэнымкIэ ахэр амал шъхьа­Iэх, — къыIуагъ КъумпIыл Мурат.
Республикэм иполитическэ, иобщественнэ, икультурнэ хъугъэ-шIэгъэ шъхьаIэхэм якъэгъэ­лъэгъон мэхьанэшхо зэриIэр Адыгеим и ЛIышъхьэ хигъэунэфыкIыгъ. КъумпIыл Мурат къызэриIуагъэмкIэ, тедзэгъухэр, те­левидениер, социальнэ хъытыухэр къызыфагъэфедэхэзэ, цIыфхэр зыфэныкъохэр псынкIэу афагъэцэкIэнхэ фае. Рес­публикэм ипащэ зэхищэгъэгъэ зэдэгущыIэгъу занкIэхэмрэ цIыфхэм ятхылъхэм ахэплъэгъэ­нымкIэ Iофэу ашIэрэмрэ къызэ­рагъэлъэгъуагъэмкIэ, Адыгеим исхэр анахьэу зыгъэгумэкIыхэ­рэр социальнэ IэпыIэгъум, ме­дицинэ фэIо-фашIэхэр, псэупIэ­коммунальнэ хъызмэтым ифэIо-фашIэхэр нахьышIоу къафагъэцэкIэнхэм, гъогухэм язытет на­хьышIу шIыгъэным япхыгъэ Iофыгъохэр ары. Демографием иIофхэм язытет нахьышIу шIыгъэным епхыгъэри анахьэу тынаIэ зытедгъэтыхэрэм ащыщ. Ны ныбжьыкIэхэмрэ кIэлэцIыкIухэр зэрыс унагъохэмрэ Iэпы­Iэгъу лъэпкъыкIэхэр республи­кэм щягъэгъотыгъэным тегъэ­псыхьэгъэ амалхэр зэрахьащтых. Лъэпкъ проектыкIэу «Унагъу» зыфиIорэм къыдыхэлъытэгъэ Iофтхьабзэхэм мы Iофым нахь зырагъэушъомб­гъущт. АР-м и ЛIышъхьэ зэрэхигъэунэфыкIыгъэмкIэ, Iофы­гъоу чIыпIэхэм къащыуцухэрэр хэ­бзэ къулыкъухэм зэрэзэшIуахыхэрэр къэбарлъыгъэIэс амалхэм къагъэлъэгъон фае.
«ЗэхъокIыныгъэхэр непи лъэ­кIуатэх. Хэгъэгум ипащэхэм яшIуагъэкIэ амалышIухэр тиIэх: лъэпкъ проектхэу агъэкIэжьыгъэхэм, республикэм социальнэ-экономикэ хэхъоныгъэмкIэ иунэе программакIэ мыгъэ Iоф адашIэу рагъэжьэщт. Къэралыгъо программабэхэр, «Единэ Россием» ипартийнэ проектхэр агъэцэкIэщтых. Джыри зэ хэзгъэунэфыкIы сшIоигъу цIыфхэм ящыIэкIэ-псэукIэ зыкъыIэтынымкIэ республикэм щызэшIуахырэр пстэуми зэрашIэн фаер. ШъуиIофшIэн нахьышIоу зэхэшъущэным пае ищыкIэгъэ амалхэр тэ шъодгъэгъотыщтых», — къы­Iуагъ АР-м и ЛIышъхьэ.
КъумпIыл Мурат муниципалитетхэм яIофхэм язытет, зэ­хъо­кIыныгъэу ахэм афэхъухэрэм къакIэупчIагъ, редакциехэр мылъкукIи, техникэкIи нахьышIоу зэтегъэпсыхьэгъэнхэмкIэ пшъэ­рылъ заулэ афишIыгъ. Муниципалитетхэм япащэхэм журналистхэм ялэжьапкIэ, IофышIэхэм ягъэхьазырын ыкIи яIэпэIэсэны­гъэ зыкъегъэIэтыгъэным япхыгъэ Iофыгъохэм анаIэ атыра­гъэтыныр япшэрылъ. Гъэ­зетхэм, журналхэм якIэгъэтхэн епхыгъэ Iофыгъохэми шъхьафэу атегущыIагъэх.
Журналистхэм проект шъхьа­Iэхэм япхырыщын анаIэ тырагъэтыным, республикэр зэрыгушхорэ, ыцIэ зыгъэIурэ бренд­хэр зэлъягъэшIэгъэным, гуманитар ушэтынхэмкIэ Адыгэ рес­публикэ институтым ипроект офис къызыфагъэфедэзэ, адыга­бзэм икъэухъумэн дэлэжьэ­гъэным мэхьанэшхо зэряIэр АР-м и ЛIышъхьэ къыхигъэ­щыгъ. Джащ фэдэу республикэ къэбар­лъыгъэIэс амалхэм яIоф­шIэн нахьышIоу зэхащэным, къэ­бар икъухэр цIыфхэм аIэкIагъэхьаным мэхьанэшхо зэриIэр Къум­пIыл Мурат хигъэунэфыкIыгъ.
АР-м и ЛIышъхьэ ипресс-­къулыкъу къытырэ къэбар­хэмкIэ ЛIышэ Саныет.