ДзюдомкIэ Урысыем ихэшыпыкIыгъэ командэ итренерскэ штаб ти­чIыпIэгъу нэбгыритIу хэхьагъ. Арсен Галстян хъулъфыгъэхэм ястаршэ тренерэу агъэнэфагъ, Ордэн Анзаур зыныбжь илъэс
23-м нэмысыгъэ ныбжьыкIэхэр ыгъэсэщтых.

— Дзюдомрэ самбэмрэкIэ Мыекъопэ еджапIэм Адыгеир дунаим щаригъэшIагъ. ТичIыпIэгъухэм къэралыгъо ыкIи дунэе зэнэкъокъухэм текIоныгъэхэр къащыдахыгъэх, непи арэущтэу щыт. Ащ дакIоу спортым хэхъоныгъэ ышIыным ­лъэшэу тынаIэ тет: инфраструктурэр нахьышIу тэшIы, мэхьа­нэшхо зиIэ спорт Iофтхьабзэхэр зэхэтэщэх, тиспортсменхэм IэпыIэгъу тафэхъу ыкIи рес­публикэм щыпсэухэрэм япсауныгъэ агъэпытэным тыпылъ. Мы IофшIэным шIуагъэ къызэри­тырэр нафэ. Ащ ишыхьат Арсен Галстянрэ Ордэн Анзауррэ ягъэхъагъэхэр. Сыгу къыздеIэу тичIыпIэгъухэм сафэлъаIо псауныгъэ пытэ яIэнэу, Адыгеим ыкIи Урысыем шIуагъэ къафэзыхьыщт текIоныгъэшхохэр къыдахынхэу, — къащитхыгъ социальнэ хъытыу­хэм Адыгеим и ЛIышъхьэу КъумпIыл Мурат.