ЕшIэгъуитIури шIуахьыгъ

БаскетболымкIэ Урысыем ичемпионат иапшъэрэ лигэ хэт «Динамо-МГТУ-м» мы мафэхэм Мыекъуапэ щыриIэгъэ ешIэгъуитIур шIуахьыгъ.
Тикомандэ зыIукIагъэр Тобольскэ къэзыгъэлъэгъорэ «Нефтехимикыр» ары.
ЫпэкIэ мы командэхэм яIэгъэ зэIукIэгъуитIуми Тобольскэ илIыкIохэм текIоныгъэр къащыдахыгъ. Арышъ, тренерэу Андрей Гапошиным ыгъэсэрэ купым ешIэгъухэр къыхьынхэ гухэлъ иIагъ. Ау апэрэ такъикъхэм къащегъэжьагъэу хьакIэхэр нахь лъэшыгъэх, апэрэ едзыгъор 15:28-у ахьыгъ. «Динамо-МГТУ-м» иешIакIэ нахь ригъэхъугъ нахь мышIэми, «Нефтехимикым» пчъагъэм хигъэхъуагъ, апэрэ кIэлъэныкъор 37:45-у аухыгъ. Мыщ еплъынэу къэкIогъэ цIыфхэм яшIуагъэкIэ тибаскетболистхэм нахь лъэшэу ыкIи цыхьэшIэгъоу ешIэхэу аублагъ, ау хьакIэхэр къызэкIэкIуагъэхэп, пчъагъэр 68:82-у зэIукIэгъур аухыгъ.

«Нефтехимикым» ибаскетболистхэу къахэщыгъэхэр: Егор Чернышевыр (очко 20), Артем Ивановыр (очко 16), Владислав Крушельницкэр (очко 12). «Динамо-МГТУ-м»: Константин Клементьевыр (очко 23-рэ), Алексей Медведевыр ыкIи Даниил Волковыр (очко 11 зырыз).
ЯтIонэрэ зэIукIэгъуми «Нефтехимикым» текIоныгъэр къыщыдихыгъ. Апэрэ едзыгъор 28:6-у хьакIэхэм ахьыгъ. Ащ ыуж пчъагъэм зэлъыпытэу хагъэхъуагъ, 55:89-у ешIэгъур аухыгъ. «Нефтехимикым» хэт Владислав Крушельницкэм очко 21-рэ ригъэкъугъ, «Динамо-МГТУ-м» щешIэрэ Юрий Кочневым командэм очко 11 къыфихьыгъ.
Командэхэр зыдэщыт чIыпIэхэр ыкIи очко пчъагъэу рагъэкъугъэр:
- «Динамо» (Уфа) — 37.
- «Нефтехимик» (Тобольск) — 34.
- «ЦСП-Химки» (Московскэ хэкур) — 31.
- «Русичи» (Курск) —30.
- «Динамо-МГТУ» (Мыекъуапэ) — 30.
- «Чебоксарские ястребы» (Чебоксары) — 30.
- «Южный слон» (Ставрополь) — 29.
- «Металлург-Челбаскет» (Челябинскэ хэкур) — 26.
- «Десна» (Брянск) — 25.
- «ТСК-Урал-УрГУПС» (Екатеринбург) — 22.
КъыкIэлъыкIощт ешIэгъухэр «Динамо-МГТУ-м» Мыекъуапэ щыриIэщтых, щылэ мазэм и 17 — 18-м «ТСК-Урал-УрГУПС» тихьакIэщт.