Къуаджэу ХьакIэмзые икъэшъокIо купэу «Жъо­гъобыныр» къалэу Шъачэ щыIагъ. Искусствэм-
кIэ ыкIи творчествэмкIэ дунэе фестивалэу ащ щыкIуагъэм хэлэжьагъ.

Iофтхьабзэм пшъэрылъ шъхьа­Iэу иIэр лъэпкъ культурэр къы­зэтегъэнэгъэныр, лIэужыкIэхэм шэн-­хабзэхэм уасэ фашIэу, алъы­тэу пIугъэнхэр ары. Лъэпкъ зэмылIэужыгъохэм зыкIыныгъэрэ зэкъошныгъэрэ азыфагу илъыным Iофтхьабзэр тегъэпсыхьэгъагъ.
КъэшъокIо купэу «Жъогъобын» зыфиIорэр 2015-рэ илъэсым зэхащагъ. Культурэм и Унэу Хьа­кIэмзые дэтым епхыгъэу мэлажьэ. Купыр апэрэп Шъачэ зэрэкIуа­гъэр, илъэс заулэкIэ узэкIэIэ­бэжьмэ «Гранд-Сочи» зыфиIорэ фестивалым пэIудзыгъэ шIыкIэм тетэу хэлэжьэгъагъ ыкIи апэрэ чIыпIэр къыхьыгъагъ. Лъэпкъ адыгэ къашъохэр къэзышIырэ къэшъокIо ныбжьыкIэхэм джыри яIэпэIэсэныгъэ къагъэшъыпкъэ­жьыгъ ыкIи анахь дэгъухэм ащыщ хъугъэх.
Культурэм и Унэу ХьакIэмзые дэтым ипащэу ХьакIэмыз Ритэ зэнэкъокъур зэрымыпсынкIагъэр къытфиIотагъ.
— Культурэм, искусствэм цIыфыр апIу, щыIэныгъэм фагъасэ. Дунаим тет цIыф лъэпкъхэм зыкIыныгъэ тиIэу, мамырэу тызэ­рэ­зэдэпсэурэр лъэпкъ къашъо­хэмкIэ къитIотыкIыгъ. Лъэшэу тыз­гъэгу­шIуагъэр лъэпкъ зэфэшъхьафхэм ащыщ кIэлэцIыкIухэр ныбджэгъу зэрэзэфэхъугъэхэр ары. Зэнэ­къо­къум купи 185-рэ къекIолIагъ. НыбжьыкIэ 25-рэ ыкIи ныхэр ти­гъусэу Шъачэ тыщыIагъ, — къы­Iуагъ ХьакIэмыз Ритэ.
«Жъогъобыным» къыщышъорэ пшъашъэхэм аныбжь зэфэшъхьаф. Илъэс къэс купыр агъэкIэжьы, гурыт еджапIэр къэзыухыхэрэр хэкIыжьых, ахэм ачIыпIэ нэ­мыкI­хэр къэкIох.
Апэрэ мафэм щыублагъэу къэ­шъуакIохэм Iоф адешIэ хореографэу УчIэжьэгъу Альбинэ.
— Урысыем ишъолъырыбэмэ къарыкIыгъэ ныбжьыкIэхэр фетивалым зэфищагъэх. Адыгэ
РеспубликэмкIэ тэ тикуп закъу зэнэкъокъум хэлэжьагъэр. Къэгъэлъэгъон гъэшIэгъоныбэ къе­кIолIагъэхэм къагъэхьазырыгъ.
Ащ фэдизым такъыхагъэщынэу тыгугъагъэп. ТикъэшъокIо куп ныбжьыкIэми, игъэхъагъэхэм тарэгушхо. «Пшъэшъэ къашъор» къэтшIынэу зэнэкъокъум фэдгъэ­хьазырыгъ ыкIи тыхэукъуагъэп. Купым иныбжьыкIэхэр апэрэу сценэ иным техьагъэх. Илъэси 6 нахь зымыныбжьхэр ащ хэтых. «Лъэпкъ къашъу» зыфиIорэ лъэныкъомкIэ апэрэ чIыпIэр къит­хыгъ, — къыIуагъ УпкIэжьэгъу Альбинэ.
Адыгеим икультурэ тилъэпкъ къашъохэмкIэ языгъэлъэгъурэ «Жъогъобыным» пшъэрылъышхо егъэцакIэ, тапэкIи фестиваль-зэ­нэкъокъухэм ахэлэжьэнэу зегъэ­хьазыры.
— Мы зэнэкъокъум къыщытатыгъэ сертификатым ишIуагъэкIэ Казань ыкIи Санкт-Петербург ащызэхащэщт Дунэе кIэлэцIыкIу фестивальхэм тахэлэжьэн тлъэ­кIыщт. Ащ къащыдгъэлъэгъощт къашъохэр дгъэхьазырыщт, — къыIуагъ купым ипащэ.
КъэшъокIо купыр Шъачэ кIон амал иIэнымкIэ ны-тыхэми къо­джэдэсхэми яшIуагъэ къагъэ­кIуагъ. НыбжьыкIэхэм яIэпэIэсэныгъэ хагъэхъоным пае зэнэкъокъухэм нахьыбэу зэрахэлэжьэнхэ фаер купым изэхэщакIохэм дэгъоу зэ­хашIыкIы ыкIи амалэу яIэр агъэфедэ.
Лъэпкъэу тызщыщым уасэ къы­фашIынымкIэ, тихабзэхэм ягу­гъу ядгъэшIынымкIэ мыщ фэдэ зэ-­
нэ­къокъухэр амалышIух. Тинеущырэ мафэ зыфэдэщтыр зэлъы­тыгъэ пшъэшъэжъые ныбжьыкIэ­хэм ягъэхъэгъэшIухэм тапэкIи та­­лъыплъэщт.
Лъэпшъыкъо Фатим.