Адыгеим и Къэралыгъо автоинспекцие иIофышIэхэм щылэ мэзэ мэфэкIхэм тигъогухэм къулыкъур ащахьыфэ ешъуагъэу автомобилыр зезыфэщтыгъэ нэбгырэ 30 къаубытыгъ.

Къэралыгъо автоинспекцием къызэритыгъэмкIэ, 2025-рэ илъэсым щылэ мазэм и 1 — 8-м республикэм игъогухэм хъугъэ-шIэгъи 7 атехъухьагъ, ахэм нэбгырэ 14-мэ шъобжхэр ахахыгъ.
Гъогу хъугъэ-шIагъэхэм ащыщ Мыекъуапэ къыпэблэгъэ псэу­пIэхэм ащыщ гъогоу пхырыкIырэм илъэс 15 зыныбжь пшъа­шъэр мотоциклэм тесэу ры­чъэ­зэ, ар тэрэзэу фэмыгъэIорышIэу зэрэдэчъэхыгъэр. Фыкъоныгъэ зэфэшъхьафхэр тещагъэхэу ар Адыгэ республикэ кIэлэцIыкIу сымэджэщым нагъэсыгъ.
ПIалъэу зигугъу къэтшIырэм къыкIоцI щэгъогогъурэ транспорт амалхэр зэутэкIыгъэх. Ахэм апкъ къикIыкIэ нэбгыри 10-мэ шъобжхэр атещагъэхэ хъугъэ, а пчъагъэм щыщэу 8-р машинэхэм адисыгъэх.
Джащ фэдэу Мыекъуапэ лъэс­рыкIуитIумэ щатехьагъэх, ахэм илъэс 16 ыкIи 57-рэ аныбжь, сымэджэщым ащагъэх.
Мыекъопэ районым зы хъугъэ-шIагъэ къыщыхъугъ. IэкIыб къэралыгъом къыщашIыгъэ ав­то­мобилыр зезыфэщтыгъэ хъулъ­фыгъэу илъэс 65-рэ зыныбжьыр мэзэхэ уахътэм чэмым техьагъ.
Хъугъэ-шIэгъэ пстэоу агъэунэфыгъэхэм алъэныкъокIэ Адыгеим и Къэралыгъо автоинспекцие уплъэкIун Iофтхьабзэхэр зэхищагъэх.
Ащ нэмыкIэу, щылэ мазэм имэфи 8-м къыкIоцI гъогогъу 1252-рэ гъогурыкIоным ишап­хъэхэр аукъуагъэхэу гъогу поли­цейскэхэм атхыгъ.
Ешъуагъэу къаубытыгъэ водитель 30-мэ административнэ пшъэдэкIыжь арагъэхьыгъ, лъэс­рыкIо 70-мэ алъэныкъокIэ протоколхэр атхыгъэх.