Мыщ фэдэ цIэ зиIэ творческэ зэхахьэ Мыекъуапэ щыкIуагъ. Адыгеим итхакIохэу, усакIохэу Ахыджэго Маринэ, Ацумыжъ Маринэ, Бэджэкъо Бэлэ, Дзыбэ Саният, Козинэ Саидэ, ХьакIэмыз Сусанэ, ТхьалI Сусанэ, Щэфрэкъо Адам ятхыгъэхэр ащ лъапсэ фэхъугъэх. Мыщ фэдэу купышхоу зэгъусэхэу цIыфыбэмэ апашъхьэ ятхыгъэхэм ахэр апэрэу къыщяджагъэх.

Шъхьадж итворчествэ ухэдэIони зэбгъэпшэнымкIэ, тхакIо пэпчъ изэмышъогъугъэрэ иадыгабзэ ибаигъэрэ къыбгурыIонымкIэ ар амалышIу хъугъэ. Адыгэ чIыгум, адыгабзэм, чылэу укъыз­щыхъугъэм, ным, шIулъэгъум, дэхагъэм ыкIи нэмыкI лъэныкъуабэхэм афэгъэ­хьыгъэ усэхэм, тхыгъэшхохэм ащыщ пычыгъохэм хьакIэхэр ахагъэдэIуагъэх. Зэхахьэр Лъэмыдж хасэм иунэ щырекIокIыгъ. Ащ изэхэщэни ары къызщежьагъэр.
Бэджэкъо Бэл — IэпэIас, тхакIо:
— Адыгабзэм, лъэпкъым шIуагъэ зэрядгъэкIышъущтым тытегущыIэн тIуи, Лъэмыдж хасэм тыщызэхэхьагъ. Мы творческэ зэIукIэр тизэхэгущыIэжь изэфэхьысыжь. Лъэмыдж хасэм ибысымэу Беданэкъо Нихьад IэпыIэгъу къытфэхъуи, Iофтхьабзэр ихьакIэщ щыредгъэкIокIыгъ. Апэрэ зэIукIэр егъэжьэпIэ къодый. МэзитIу-щым зэ мыщ фэдэу тызэрэугъоизэ тшIынэу тыфай. Тэ тизакъоп хэлэжьэщтыр, адыгабзэкIэ тхэрэр зэкIэ къетщалIэ тшIоигъу. Джащ фэдэу ныдэлъфыбзэм тыде­жъыущт.
Пчыхьэзэхахьэр мэкъамэхэмкIэ къагъэдэхагъ творческэ купэу «Джэныкъом», ГъукIэ Замудин ригъэджэрэ ныбжьыкIэхэу Лъэцэрыкъо Даринэрэ Къэлэшъэо ТIахьиррэ.
Пчыхьэзэхахьэм къыдыхэлъытагъэу, лъэпкъ IэпэщысэхэмкIэ цехым зэхищэгъэ зэ­нэкъокъоу «Сиджэгуалъ» зыфиIорэм текIоныгъэ къыщыдэзыхыгъэхэр агъэшIуагъэх. Щытхъу тхылъхэмрэ шIухьафтынхэмрэ аратыжьыгъэх.
Анцокъо Ирин.
Сурэтыр авторым ий.