Урысыем и Прокуратурэ иIофышIэ и Мафэ ехъулIэу Адыгеим и ЛIышъхьэ АР-м и Прокуратурэ щылажьэхэрэм ясэнэхьат епхыгъэ мэфэкIымкIэ афэгушIуагъ.

Урысыем и Прокуратурэ зэрэзэхащагъэм фэгъэхьыгъэ мэфэкI зэIукIэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Апшъэрэ хьыкум, хэгъэгу кIоцI IофхэмкIэ и Министерствэ, щынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ, АР-м и Арбитражнэ хьыкум, Урысыем и Следственнэ комитет АР-мкIэ иследственнэ гъэIорышIапIэ, Мыекъопэ гарнизоным идзэ прокуратурэ, Урысые Федерацием ухъу­мэнымкIэ и Федеральнэ къулыкъу АР-мкIэ и ГъэIорышIапIэ, Урысыем ошIэ-дэмышIэ IофхэмкIэ и Министерствэ АР-мкIэ и ГъэIорышIэпIэ шъхьаIэ, пщыныжь ягъэхьыгъэнымкIэ Федеральнэ къулыкъум АР-мкIэ и ГъэIорышIапIэ, прокуратурэм иIофышIэхэр, иветеранхэр. АР-м ипрокурорэу Игорь Шевченкэм Iофтхьабзэр зэрищагъ.
Прокуратурэм иIофышIэхэм хабзэр мыукъогъэным, обществэмрэ къэралыгъомрэ яфедэхэр къэухъумэгъэнхэм яшъыпкъэу Iоф зэрадашIэрэр Адыгеим и ЛIышъхьэ ипсалъэ къыщыхигъэщыгъ.
Адыгеим и Прокуратурэ иIофышIэхэм сыдигъуи теубытагъэ зэрахэлъыгъэр, яIоф зэрэфэшъыпкъагъэхэр, гъэхъагъэ хэлъэу якъулыкъу зэрагъэцакIэщтыгъэр республикэм ипащэ къыхигъэщыгъ, къу­лыкъум иветеранхэу Адыгеим ихэхъоныгъэ зиIахьышхо хэзышIыхьагъэхэм «тхьашъуегъэпсэу» ариIуагъ.

«Общественнэ-политическэ, социальнэ зыпкъитыныгъэр рес­публикэм къыщыухъумэгъэн фае – хэгъэгуми, республикэми непэ афэхъурэ зэхъокIыныгъэшхохэр лъыгъэкIотэгъэнхэм ар якъэ­кIуапI», — къыIуагъ КъумпIыл Мурат.
Прокурорхэм ахэлъ хъугъэ хэбзэшIу­хэр лъыгъэкIотэгъэнхэм, япшъэрылъхэр гъэхъагъэ хэлъэу агъэцэкIэнхэм, ясэнэхьаткIэ текIоныгъакIэхэр ашIынхэм мэхьанэшхо зэряIэр республикэм и ЛIышъхьэ къыхигъэщыгъ.
2024-рэ илъэсым икIэуххэм ар къате­гущыIагъ, экономикэм, социальнэ лъэныкъом, республикэм пстэумкIи продукциеу къыщахьыжьырэм, промышленнэ производствэм зэрахэхъуагъэр, федэхэм зыкъызэраIэтыгъэр, мэкъу-мэщым нахьыбэу лэжьыгъэ къызэрэщахьыжьыгъэр, нахьыбэу инвестициехэр къазэрахалъхьагъэр, цIыфхэм яхахъо зыкъызэриIэтыгъэр, псэупIэу атырэр нахьыбэ зэрэ­хъурэр шъхьафэу къыхигъэщыгъэх. Гъо­гу­хэр, инженер псэуалъэхэр зэрагъэ­кIэжьхэрэм, общественнэ чIыпIэхэр зэрэзэтырагъэпсыхьэхэрэм, цIыфхэм ясоциальнэ пшъэрылъхэр зэрагъэцакIэхэрэм анаIэ тыраригъэдзагъ.

«Iофхэм язытет нахьышIу шIыгъэным, къэралыгъор къызэрафэгумэкIырэр цIыфхэм зэхашIэным ыкIи ахэм яфедэхэр цыхьэшIэгъоу ухъумагъэ зэрэ­хъущтхэр къагурыIоным мэхьанэшхо яI. Джарэущтэу щытмэ ары ныIэп цIыфхэм ящыIэ­кIэ-псэукIэ зыкъызиIэтыщтыр», — къыIуагъ КъумпIыл Мурат.
Адыгеим и ЛIышъхьэ зэрэхигъэунэфыкIыгъэмкIэ, республикэм ипащэхэр прокуратурэм икъулыкъухэм зэращыгугъ­хэрэр IофшIэнымкIэ ыкIи социальнэ лъэныкъомкIэ цIыфхэм яфитыныгъэхэр укъуагъэ мыхъунхэм тапэкIи гъунэ лъа­фыныр, предпринимательхэм яфитыныгъэхэр къаухъумэнхэр, лъэпкъ проектхэм ягъэцэкIэнкIэ бюджет мылъкур зэрагъэ­федэрэм лъыплъэнхэр, къолъхьэ тын- Iыхыным пэуцужьыгъэныр ары.
ХэушъхьафыкIыгъэ дзэ операцием хэлажьэхэрэм, ахэм яунагъохэм яфитыныгъэхэр къэухъумэгъэнхэм лъэшэу гъунэ лъыфыгъэн фае. Республикэм и ЛIышъхьэ къызэриIуагъэмкIэ, прокуратурэм иIофышIэхэм ыпшъэкIэ зигугъу къэтшIыгъэхэм правовой IэпыIэгъу ягъэ­гъотыгъэнымкIэ ыкIи ахэм якъэухъу­мэнкIэ ищыкIэгъэ амалхэр икъоу зэрахьанхэ, къэралыгъо фондэу «Хэгъэгум иухъумакIохэр» зыфиIорэм икъутамэ, правовой, общественнэ, волонтер организациехэр зыхэлэжьэрэ Iофтхьабзэхэм якоординаторэу ахэр хъунхэ фае.
«ХэушъхьафыкIыгъэ дзэ операцием хэлажьэхэрэм, ащ иветеранхэм, ахэм яунагъохэм, тидзэ­кIолIхэу фэхыгъэхэм яунагъохэм ящыкIэгъэ IэпыIэгъур игъом арагъэгъотын фае. А Iофыгъохэр анахь лъэшэу шъунаIэ зытежъугъэтын фаехэм ащыщых», — къы­Iуагъ КъумпIыл Мурат.
Урысыем и Президентэу Владимир Путиным игущыIэхэу «Урысые обществэм политикэм ылъэныкъокIэ иIофхэм язытет зыфэдэ хъущтыр бэкIэ зэлъытыгъэр социальнэ зэфагъэр укъуагъэ мыхъуным хабзэр икъоу зэрэдэлажьэрэр ары» зыфиIохэрэр Адыгеим и ЛIышъхьэ ипсалъэ къыщыхигъэщыгъэх. Республикэм ипащэ зэрэхигъэунэфыкIыгъэмкIэ, правовой лъэныкъомкIэ шапхъэу цIыфхэм ящыIэкIэ-псэукIэ зыкъегъэIэтыгъэным епхыгъэхэр аукъохэ хъущтэп.
Прокуратурэм иIофышIэхэм тапэкIи япшъэрылъхэр гъэхъагъэ хэлъэу зэрагъэцэкIэщтхэм, хабзэр мыукъогъэным гъунэ зэрэлъафыщтым ицыхьэ зэрэте­лъыр зэIукIэгъум икIэух КъумпIыл Мурат къыIуагъ. Адыгеим и ЛIышъхьэ къулыкъум ипащэхэми, иIофышIэхэми гуетыныгъэ фыряIэу Iоф зэрашIэрэм пае зэрафэразэр къыхигъэщыгъ, псауныгъэ пытэ, щыIэкIэ-псэукIэ дэгъу яIэнэу, Адыгеимрэ Урысыемрэ хэхъоныгъэ языгъэшIыщт гъэхъэгъакIэхэр ашIынхэу афэлъэIуагъ.
АР-м ипрокурорэу Игорь Шевченкэм къызэрэхигъэщыгъэмкIэ, 2024-рэ илъэсым гъогогъу мин 12-рэ хабзэр аукъуа­гъэу прокуратурэм иIофышIэхэм къыхагъэщыгъ. УплъэкIунхэм якIэуххэм атетэу IэнатIэ зыIыгъ нэбгырэ мини 2,5-м ехъумэ дисциплинарнэ пшъэдэкIыжь, нэбгырэ 700-м фэдизмэ административнэ пшъэдэкIыжь арагъэхьыгъ, уголовнэ Iоф 40-м ехъу къызэIуахыгъ. IофшIэнымкIэ цIыфхэм яфитыныгъэхэр зыпкъ игъэуцожьыгъэнхэм тегъэпсыхьагъэу со­мэ миллиони 5,5-м ехъу къафырагъэ­гъэзэжьыгъ.
Джащ фэдэу мэфэкI зэIукIэм къыщыгущыIагъэх АР-м и Къэралыгъо Совет – Хасэм и Тхьаматэу Владимир Нарожнэмрэ АР-м и Апшъэрэ хьыкум итхьаматэу Шумэн Байзэтрэ. АР-м и Прокуратурэ иIофышIэхэу 2024-рэ илъэсым зиIофшIэн гъэхъагъэхэр щызышIыгъэхэм къэралыгъо, къулыкъу тынхэр, АР-м и ЛIышъхьэ ирэзэныгъэ тхылъхэр, АР-м и Къэралыгъо Совет – Хасэм ирэзэныгъэ тхылъхэр афагъэшъошагъэх.
АР-м и ЛIышъхьэ ипресс- къулыкъу къытырэ къэбархэмкIэ
ЛIышэ Саныет.