Октябрэ революциешхом ыуж, егъашIэм шIункIым хэтэу къэзыхьыгъэ лъэпкъхэм зыкIэ афэ­дэу, адыгэхэми заужьы­жьыгъ.

Анахь тарихъ къэбар гушIуагъо хъугъэр бэдзэогъум и 27-м, 1922-рэ илъэсым Адыгэ автоном хэкур гъэпсыгъэ зэрэхъугъэр ары. Джащыгъум адыгэхэр лъэныкъуабэкIэ щыIэкIакIэм дэлъэбакъо­хэзэ, гъэхъэгъэшIухэм къафэкIуагъэх.
Литературнэ-художественнэ ыкIи общественнэ-политическэ журналэу «Зэ­къошныгъ» зыфиIорэм имэфэкI къыдэ­кIыгъоу илъэси 100 зэрэхъугъэр кIэ­зыгъэтхъырэр сапашъхьэ илъ. Ащ иредактор шъхьаIэр МэщбэшIэ Исхьакъ. Редакторыр — М. Нарт ыкIи пшъэдэ­кIыжь зиIэ секретарыр С. ГутIэр. Журналым уцышъошъо кIыф теплъэу иIэм пчъагъэу 100-р тхылъ зэгохыгъэмрэ къэ­лэмымрэ акIыIу тешIыхьагъ — гохьы ыкIи уегъэгушхо.
МэфэкI чэзыур къызэIуехы журналым иредакторэу Нарт Марзиет игущыIэу «Адыгэ Республикэм итхакIохэм я Союз июбилей» зыфиIорэм. Ащ къыкIэлъэкIох тхакIоу ГъукIэлI Нурбый ирассказхэр, МэщбэшIэ Исхьакъ и «СатыриплIхэр», шIэныгъэлэжьэу Унэрэкъо Рае иповестэу «УлIмэ, сыкъэгъот!», Къуанэ Гощпакъэ иусэхэр, Ацумыжъ Маринэ иповестэу «ЗэгурыIоныгъэр — насыпыгъ», ГъогулI Чэтин иповесть, Сихъу СултIан ыкIи «Адыгэ макъэм» ибухгалтер шъхьаIэу ХъутIыжъ Нусиет яусэхэр.
Журналым къыдэхьагъ лъэпкъым ицIыф пэрытэу, политикэу, экономикэ шIэныгъэхэмкIэ докторэу, шIушIакIоу, Урысыем и Федеральнэ ЗэIукIэ ФедерациемкIэ и Совет исенаторэу Къанэкъо Арсен фэгъэхьыгъэу ТIэшъу Светланэ «Напэ» цIэу зыфишIыгъэр.
«Тиюбилярхэр» зыфиIорэм къыщытыгъэх шIэныгъэлэжьэу ЖакIэмыкъо Зарим итхыгъэу усакIоу ЯхъулIэ Сэфэр фэгъэ­хьыгъэр ыкIи тхакIоу Дэрбэ Тимур истатьяу ГъукIэлI Нурбый итворчествэ къэзыIуатэрэр.
Литературэмрэ критикэмрэ журналым сыдигъуи чIыпIэ щыряI: мыщ къыщы­тыгъ АР-м изаслуженнэ журналисткэу Мамырыкъо Нуриет итхыгъэу «Ыпсэ идэхагъэкIэ къытхэтыщт» зыфиIоу ­адыгэ шIэныгъэм ыкIи лъэпкъ литературэм зиIахь ин хэлъэу Ергъукъо-ЩэшIэ Щамсэт фэгъэхьыгъэр. АКъУ-м икIэлэегъа­джэу, шIэныгъэлэжьэу Хъуажъ Нуриет игуапэу къыфэтхагъ иIофшIэгъу гъэсагъэу, усакIоу, тхакIоу Унэрэкъо Рае. Ар итхыгъэ «Гурэ псэрэкIэ матхэ» зэре­джагъэр.
«Бзэмрэ тарихъымрэ» зыфиIорэ руб­рикэми журналым чIыпIэ щагъотыгъ Тэу Нуриет истатьяу «Зыгу къабзэм ыбзи къабзэ» ыкIи Барцо Рустам итхы­гъэу «ЛIыхъужъэкъомэ ятарихъ» зышъхьэм.
Журналэу «Зэкъошныгъэм» иилъэси 100 гъогу къыгъэшъыпкъэжьэу зэтеу­цуагъ, адыгэ гущыIэр епсыхьэ, гупшысэр еIэты; адыгэ лъэпкъым непэрэ ма­фэм ищыIакIи, иблэкIыгъи, итарихъ кууи алъыIэсэу, узфикъудыеу гъэпсыгъэ. ТапэкIи игъогу нэфынэу лъэбэкъушIу­хэр ышIынэу журналэу «Зэкъошныгъэм», дэлэжьэрэ купым тыфэлъаIо.