Башкортостан щызэлъашIэрэ сурэттех ныбжьыкIэу Ляй­сан Невметулинар Адыгэ Республикэм ихьакIагъ, «Лъэпкъ дэхагъэм икъежьапI» зыфиIорэ проектэу сурэт­техыным епхыгъэр тишъолъыр щигъэцэкIагъ.

IэпэIасэм зэрэхигъэунэфыкIыгъэмкIэ, къалэу Кумертау имэрэу Олег Астаховыр проектым игъэцэкIэнкIэ IэпыIэгъу къыфэхъугъ. IэпэIасэм тэри гущыIэгъу тыфэхъугъ.
Сурэттех ныбжьыкIэм къызэрэтфиIотагъэмкIэ, тхьамафэм Адыгеим нэIуасэ зыфишIыгъ, имузейхэр, и Сурэт къэгъэ­лъэгъуапIэ, ичIыопс дахэ инэрылъэгъугъэх. Iофтхьабзэм къыдыхэлъытагъэу адыгэ бзылъфыгъэ шъуашэм итарихъ зэригъэшIагъ.
— ИлъэсиплI хъугъэу сурэттехыным сызIэпищагъэу Урысыем лъэпкъ зэфэшъхьафэу исхэм ябзылъфыгъэ дахэхэм сурэт атесэхы, къалэу Кумертау имузей­хэм къэгъэлъэгъонхэр ащызэхэсэщэх. «Истоки национальной красоты» зыфи­Iорэ проектым лъэпкъ 13-мэ ябзылъфыгъэхэм лъэпкъ шъуашэхэр ащыгъэу хэхьагъ. Адыгеир я 14-рэ хъугъэ. ­Адыгэ бзылъфыгъэ шъуашэм идэхагъэ сиумэхъыгъ, дышъэидагъэр лъэпкъ искусствэу зэрэщытыр хэзгъэунэфыкIыгъ. КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэрэ АР-м и Лъэпкъ музейрэ ащыслъэгъугъэ шъуа­шэхэр дэхэ дэдэх. Музеим ипащэу ШъэуапцIэкъо Аминэт лъэшэу сыфэраз, къысэмызэщэу силъэIухэр къысфигъэцэкIагъ. Джырэ адыгэ модельерхэм яIэшIагъэхэр зэзгъэлъэгъугъэх ыкIи
ахэр къыздэлэжьэнхэу сялъэIугъ. Проект хьалэмэт зэдэдгъэцэкIагъ, — къеIуатэ Ляйсан Невметулинам.
Удмурти, къэзэкъи, ермэли, къэндза­ли, чэчэни, ингуши, дагъыстани, нэ­мыкI лъэпкъхэми ябзылъфыгъэхэм ядэхагъэ къизыгъэлъэгъукIыгъэ, ижъырэ адыгэ шъуашэхэр непэрэ мафэхэм ащыгъхэу ары IэпэIасэм сурэтэу тырихырэр.

— Ляйсан игухэлъ тызыщегъэгъуазэм, тигуапэу тыпэгъокIыгъ. ШъхьэкIэфэныгъэ, зыкIыныгъэ, Iэдэбныгъэ, дэхагъэ зыпхырыщыгъэ Iофтхьабзэр тшIогъэшIэгъон хъугъэ. Ижъырэ саер адыгэ бзылъфыгъэ ныбжьыкIэмэ ащыгъэу ащ атырихыгъ. Лъэпкъ пэпчъ шъуашэм къахегъэщы. Шэн-хэбзэ дахэу тиIэхэр къизыгъэлъэгъукIырэ бзылъфыгъэ шъуашэхэр тиIэпэIасэхэм къагъэлъэгъуагъ. Урысыем лъэпкъэу исым пэпчъ ибзылъфыгъэхэр зэрэдахэр проектым къеушыхьаты, — къыIуагъ ШъэуапцIэкъо Аминэт.
— Лъэпкъ зэфэшъхьафхэм азыфагу зэгурыIоныгъэ илъынымкIэ культурэм мэхьанэ ин зэриIэр мы проектым къыщызгурыIуагъ. Адыгэ шъуашэ зыщыгъ бзылъфыгъэхэм бзэ къадэзгъотыгъ. Адыгэ лъэпкъым итарихъ шъуашэм чIыпIэ хэхыгъэ зэрэщиубытырэр пкъыгъуа­бэмэ къахэщы. Лъэпкъ тамыгъэхэр, тхыпхъэхэр ахэм ахэолъэгъукIы, шэн-­хабзэхэм, намысым якъэухъумэн мэхьанэу аритыщтыгъэм янэпэеплъых, — еIо Ляйсан.
Лъэпкъ музеим ихьакIэщ сурэтхэр щы­тырахыгъэх. Модельерхэу Мыгу Рузанэ, Акъущ Фатимэ, Хъурэнэ Азэ ясэе дыгъэхэр проектым хэхьагъэх.
— Адыгэ саер тарихъым иухъума­кIоу, лъэпкъым ыцIэ зыIэтырэ шъуа­шэу сэлъытэ. СызIукIэгъэ лъэпкъыбэмэ яшъуа­шэхэр зэфэшъхьафых, дахэх, адыгэ шъуашэр лъэшэу сыгу рихьыгъ, апэрэу зыщыслъагъ. Адыгэ саер зыщызылъэрэр ыкIи ар къызэкIурэр пшъэшъэ ныбжьыкIэр арэу къысаIуагъ. Саем хэ­шIыхьэгъэ дышъэидагъэм итамыгъэ пэпчъ мэхьанэ горэ иIэу къысфаIотагъ. Лъэпкъ щы­гъыным иIахь шъхьаIэу ­адыгэ паIор зэрэщытыр къызгурыIуагъ. Бзылъфыгъэ паIом илъэпIэгъэ-дэхагъэ зэра­шырэр ар зыщыгъым инэхъой Iэдэбэу хэ­лъыр ары. IэпэIасэхэм ягулъытэ зы­нэсырэр умыгъэшIэгъон плъэкIырэп. Зэ­манхэм къа­хэхыгъэ тарихъ хъугъэ-­шIагъэхэр яIэубытыпIэхэу лъэпкъыр зэ­рыгъозэщт искусствэ лъагэм хэхьэрэ IэшIагъэхэр аIапэхэм къапэкIых. Адыгэ­хэм анапэ зэрэдахэр шъуашэхэм къыраIотыкIы, — хигъэунэфыкIыгъ Ляйсан.
Лъэпшъыкъо Фатим.