Урысыем щынэгъончъэнымкIэ и Федеральнэ къулыкъу ителефон номер ехьыщыр номер нэпцI­хэр къызфагъэфедэзэ, цIыфхэм яахъщэ къызIэкIэзыгъэхьэрэ зэкъодзакIохэм мы аужырэ лъэхъаным бзэджэшIагъэу зэрахьэрэм хэхъуагъ.

ЩынэгъончъэнымкIэ къулыкъухэм, хэбзэухъумэкIо къулыкъухэм яIофышIэ фэдэу ахэм закъащагъэхъузэ, «зэрымыкIодыкIыщт счетым» яахъщэ рагъэхьан е яахъщэ Iэрылъхьэ псынкIэу Iофтабгэм ратын фаеу, джащыгъум ямылъку къызэтенэщтэу, экономическэ бзэджэшIагъэхэм язэхэфынкIэ оперативнэ Iофы­шIэхэм ащкIэ IэпыIэгъу афэхъущтхэу агурагъаIо.
Яунагъо ис горэм «уголовнэ Iофэу» къыпаIэтыгъэр зэфашIыжьыщтэу араIозэ, шхъухьашIэхэм бэрэ цIыфхэм ахъщэ къакIэкIашъу. ЩынэгъончъэнымкIэ къулы­къухэм яIофышIэу зыкъэзыгъэлъагъо­хэрэм «яудостоверениехэр», следственнэ къулыкъухэм адеIэнхэ фаеу зэрыт «унашъохэм», нэмыкI документхэм якопиехэр телефон мессенджерхэмкIэ арагъэлъэгъух. Ащ фэдэ къэбархэм ашъхьэ къырахы мыхъущтэу, нэмыкIэу зызекIохэкIэ, къэралыгъо шъэфыр зэраIотагъэм е къазэрадэмылэжьагъэхэм пае уголовнэ пшъэдэкIыжь арагъэхьыщтэу араIо.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ макъэ къегъэIу бзэджэшIагъэ зезыхьагъэкIэ зэгуцафэ­хэрэм уголовнэ Iоф къызэрэпаIэтыгъэм­кIэ мэкъэгъэIур тхыгъэу ащ фэдэ цIыфым ышъхьэкIэ зэрэIэкIагъахьэрэмкIэ. Урысыем щынэгъончъэнымкIэ и Федеральнэ къулыкъу иIофышIэхэм мессенджер­хэр агъэфедэхэрэп, яудостоверениехэм, къулыкъум иунашъохэм ыкIи нэмыкI правовой актхэм якопиехэр афарагъэ­хьыхэрэп.
ЦыхьэшIэгъу телефонхэр, щынэгъончъэнымкIэ къулыкъухэм яобщественнэ егъэблэгъапIэхэм ятелефонхэр зэрагъэ­федэрэ закъор цIыфхэмрэ организа­циехэмрэ къаIэкIагъахьэрэ къэбархэм яугъоинкIэ ары. А номерхэмкIэ шъо сыдигъуи шъуафытеон ыкIи цIыфэу къы­жъудэгущыIагъэр хэбзэухъумэкIо къулы­къухэм яIофышIэу щытмэ зэжъугъэшIэн шъулъэкIыщт.
ЦIыфэу къышъуфытеуагъэм гущыIэхэу «ФСБ», «МВД», «Следственнэ комитет», «банкым щынэгъончъэнымкIэ икъулыкъу иIофышI», «мылъкур зэ­рымыкIодыкIырэ счет», «Урысыем и Гупчэ банк ирасчетнэ счет зыкI», ­«шъуикод, шъуикартэ, шъуипаспорт, шъуи СНИЛС яномерхэр къашъуIу» зыфи­Iохэрэр ыгъэфедэхэ зы­хъукIэ, амыгъэкощырэ мылъкоу е транспортэу шъуиIэр псынкIэу шъущэн фаеу шъушIошъ ыгъэ­хъунэу зыфежьэкIэ телефоныр жъу­гъэкIуас. Уголовнэ е административнэ пшъэдэкIыжь ащ пае шъуагъэхьынэу щытэп.
Номер нэпцIхэр, янэIуасэхэм амакъэ зэхахы фэдэу къащызыгъэхъурэ программэхэр зэкъодзакIохэм зэрагъэфе­дэрэм епхыгъэу шъусакъынэу тышъоджэ. ШъуиIахьылхэр, шъуиныбджэгъухэр, шъуинэIуасэхэр, шъуиIофшIэгъухэр чIыпIэ зэжъу ифагъэхэу, ахъщэшхо ящыкIагъэу зыгорэм къызышъуиIокIэ е къы­зышъуфитхыкIэ шъугу джэнджэш къижъугъахь. ЗыцIэ къыраIуагъэхэм шъуафытеуи, Iофым изытет шъыпкъэ зэжъугъашI.
Джащ фэдэу шъунаIэ тешъодгъадзэ тшIоигъу Украинэми, джэгъогъуныгъэ къыддызиIэ нэмыкI къэралыгъохэми якъулыкъу хэушъхьафыкIыгъэхэр Урысыем ис цIыфхэр агъэпцIэнхэу, агъэщынэнхэу зэрэпылъхэм, хабзэр ахэм аукъонымкIэ афэлъэкIыщтыр зэрашIэрэм. АщкIэ амал зэфэшъхьафхэр агъэфедэх — къэралыгъо хэбзэ къулыкъухэр зычIэт унэхэр агъэстых, дзэ, транспорт, социальнэ инфраструктурэм ипсэуалъэхэр агъэфыкъох, «шIушIэ», «гуманитар» ор­ганизацие зэфэшъхьафхэм аратыщт фэдэу агурагъаIозэ, цIыфхэм яахъщэу къызIэкIагъахьэрэр Украинэм иуIэшыгъэ кIуачIэхэм афатIупщы, къэралыгъо шъэ­фэу щыт къэбархэр дзэкъулыкъушIэхэм, дзэ-промышленнэ комлексым ипредриятиехэм яIофышIэхэм къаIахы.
ШъуимынэIосэ цIыфхэм телефонкIэ шъуадэмыгущыIэмэ нахьышIу.
Урысыем щынэгъончъэнымкIэ и Федеральнэ къулыкъу
Адыгэ РеспубликэмкIэ и ГъэIорышIапIэ ипресс-къулыкъу