Урысые Федерациемрэ Адыгэ Республикэмрэ якъэралыгъо тынхэу къафагъэшъошагъэхэр республикэ филармонием тыгъуасэ щаратыжьыгъэх.

Адыгеим и ЛIышъхьэу КъумпIыл Мурат къэзэрэугъоигъэхэм шIуфэс къарихызэ республикэм иэкономикэ игъэпытэн, хэбзэгъэуцугъэр къэухъу­мэгъэныр, гъэсэныгъэр, медицинэр, культурэр ыкIи спортыр лъэныкъо зэфэшъхьафхэр къащыдэлъытагъэу нахь дэгъоу зэхэщэгъэнхэм зиIахь ахэзышIыхьэхэу шIухьафтынхэр зыфагъэшъошагъэхэм зэрафэразэр къы­Iуагъ.
Республикэм и ЛIышъхьэ къызэрэхигъэщыгъэмкIэ, зиIоф хэшIыкIышхо фызиIэ цIыфхэм яшIуагъэкIэ Адыгеир ицыхьэ зытелъыжьэу ыпэкIэ лъэкIуатэ, социальнэ-экономикэ лъэныкъомкIи хэхъоныгъэхэр ешIых. Зэхэубытэгъэ шъолъыр продукциер проценти 105-м, къыдэгъэкIыжьыным ииндекс проценти 104,8-м, инвестициехэр проценти 145-м къехъугъэх, мэкъу-мэщым къыщахьыжьырэр проценти 107,5-м нэ­сыгъ, а пстэуми адакIоу къэIогъэн фае цIыфхэм яхахъохэми нахь зыкъызэраIэтырэр. Адыгеим и ЛIышъхьэ къызэрэхигъэщыгъэмкIэ, 2024-рэ илъэсым кIэлэцIыкIу ибэхэм фэтэри 150-рэ аратыгъ, икIыгъэ илъэсым елъытыгъэ­мэ, фэдитIу хьазыркIэ ар нахьыб. Илъэсым икIэуххэм нафэ къызэрашIыгъэмкIэ, цIыфхэр зычIэсыщтхэ унэ квадрат метрэ 565-рэ республикэм щатIупщыгъ.
«Мы илъэсымкIэ пшъэрылъэу тшIыгъагъэр зэкIэ дгъэцэкIагъэ. Джыри зэ къэсэIожьы, шъори шъуиIахь а гъэхъа­гъэм хэлъ. Республикэм щыпсэурэ цIыфхэм ящыIакIэ нахь зыкъыIэтыным пае тызэгъусэу ащкIэ ящыкIэгъэ амалхэр ятэгъэгъотых. Адыгеим щыпсэухэрэм къэралыгъор зэрафэгумэкIырэр зэхашIэным, ягупсэ республикэ ахэм щыряIэ щыIакIэр нахьышIу хъуным зэкIэми тыдэлажьэ», — къыIуагъ ­КъумпIыл Мурат.
Адыгеим и ЛIышъхьэ агу къыгъэ­кIыжьыгъ мы илъэсыр унагъом и Илъэсэу зэрагъэнэфэгъагъэр. УФ-м и Президентэу Владимир Путиным къы­гъэуцугъэ пшъэрылъхэм атегъэпсыхьагъэу республикэм амалыкIэхэр щагъэ­федагъэх: ныхэм IэпыIэгъу ятыгъэным, сабыеу къэхъурэр нахьыбэ хъуным, цIыфхэм зычIэсыщтхэ унэхэр ягъэгъо­тыгъэнхэм мылъкоу апэIудгъахьэрэр нахьыбэ хъугъэ. Сабыибэ зэрыс унэгъо зэгурыIожьхэм ахэхъоным пае ищыкIагъэр зэкIэ республикэм щызэрахьэ. Ащ фэдэ унагъохэм зыкIэ ащыщ Джэджэ районым щыпсэурэ Шек Сергейрэ Натальерэ яунагъо. Ахэм сабыи 6 зэдапIу. Унагъом и Илъэс орденэу «Родительское слава» зыфиIорэм имедаль къафагъэшъошагъ. Адыгеим и ЛIышъхьэ унагъом къыратыгъэ тын лъа­пIэм ыкIи Наталья Иван ыпхъум къызыхъугъэ мафэмкIэ афэгушIуагъ.
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэныр анахь мэхьанэ зэратырэ лъэныкъохэм ащыщ. Мы илъэ­сым пшъэрылъхэм язэшIохын республикэ бюджетым къыхахыгъэ сомэ миллиарди 2-м ехъу пэIуагъэхьагъ. ДзэкIолIхэу хэушъхьафыкIыгъэ дзэ операцием лIыхъужъ­ныгъэ зэрахьэзэ зипшъэрылъхэр щызыгъэцакIэхэрэм афэгъэхьыгъэ рэзэныгъэ гущыIэхэр КъумпIыл Мурат къыIуагъэх. Ахэм зыкIэ ащыщ хэушъхьафыкIыгъэ мэхьанэ зиIэ отрядым иоперативнэ ротэ ивзвод ипащэ игуа­дзэу Иван Добриченкэр. УФ-м и Президент и УказкIэ икъулыкъу пшъэрылъхэр ыгъэцакIэхэ зэхъум лIыхъужъныгъэу, блэнагъэу зэрихьагъэм апае медалэу «ЛIыхъужъныгъэ зэрэзэрихьагъэм пае» зыфиIоу я II-рэ шъуашэ зиIэр фагъэшъо­шагъ.
Ащ нэмыкIэу IофшIэнымкIэ гъэхъа­гъэу иIэхэм, илъэсыбэ хъугъэу гуетыныгъэ фыриIэу Iоф зэришIэрэм апае Андрей Воробьевым орденэу «Хэгъэгум ыпашъхьэ гъэхъагъэу щыриIэхэм апае» зыфиIорэм имедалэу я II-рэ шъуашэ зиIэр фагъэшъошагъ. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Монтаж» зыфиIорэм илъэс 30 хъугъэу ащ электросварщикэу Iоф щешIэ. Адыгэ республикэ гимназием ублэпIэ классхэмкIэ икIэлэегъаджэу Сихъу Наз­рэт хэгъэгум и Президент иунашъокIэ щытхъуцIэу «Урысые Федерацием изаслуженнэ кIэлэегъадж» зыфиIорэр фагъэшъошагъ гъэсэныгъэмкIэ гъэхъагъэу иIэхэм ыкIи илъэсыбэ хъугъэу гуетыныгъэ фыриIэу Iоф зэришIэрэм апае.
КIэлэегъаджэхэу, кIэлэпIухэу, апшъэрэ еджапIэхэм ащезыгъаджэхэу бэ мыщ къекIолIагъэр, ахэм зэкIэми гуетыныгъэ ин фыряIэу япшъэрылъхэр агъэцакIэх, апIухэрэм ыкIи рагъаджэхэрэм агу афызэIухыгъ. Ащ фэдэхэм зыкIэ ащыщых кIэлэегъаджэхэу Къушъхьэ Нэфсэтрэ Альбина Анисимовамрэ. УФ-м и Президент и Рэзэныгъэ тхылъ ахэм аратыгъ.
Адыгеим и ЛIышъхьэ къызэрэхигъэщыгъэмкIэ, ащ фэдэ егъэджакIэм ишIуа­гъэкIэ республикэм ныбжьыкIэ чанхэр ыкIи хъупхъэхэр, ягупсэ республикэ къырыкIощтым ыгъэгумэкIыхэрэр тиIэх. Ахэм щысэ зытырахын яI. Адыгеим и ЛIышъхьэ къызэрэхигъэщыгъэмкIэ, тын лъапIэхэр зэратыжьыгъэхэр зэкIэ Iэ­пэIэсэныгъэ ин пхэлъын, пшъэдэкIыжь пхьын ыкIи Iофэу узыфэгъэзагъэм уфэшъыпкъэн зэрэфаемкIэ щысэ шIагъоу щытых.
«Шъопсэу Iофэу шъузфэгъэзагъэм шъузэрэфэшъыпкъэм, тигупсэ лъэныкъо ис цIыфхэм щыIэкIэшIу яIэным шъуфэлэжьэным шъузэрэфэхьазырым апае. Шъощ фэдэ цIыф IэпэIасэхэр тигъусэхэмэ, сыд фэдэрэ пшъэрылъ къини зэшIотхын зэрэтлъэкIыщтым сицыхьэ телъ», — къыхигъэщыгъ КъумпIыл Мурат.
АР-м и ЛIышъхьэ тигупсэ республикэ нахь зэтегъэпсыхьагъэ хъуным зиIахьышхо хэзышIыхьэгъэ цIыфхэм ацIэ къыриIуагъ. ИкIэухым КъумпIыл Мурат шIухьафтынхэр къызэратыгъэ пстэуми афэгушIуагъ, яIофшIэн зэрэфэшъыпкъэ­хэм, IэпэIэсэныгъэ ин зэрахэлъым, хэбзэ шIагъоу щыIэ хъугъэхэм зэрахагъахъорэм апае зэрафэразэр къыIуагъ. ПстэумкIи нэбгырэ 40 шIухьафтынхэр зыфагъэшъошагъэхэр.
АР-м и ЛIышъхьэ ипресс-­къулыкъу къытырэ къэбархэмкIэ
Тхьаркъохъо Сафыет.