Къэгъэлъэгъонхэр, фес­тивальхэр, творческэ зэхахьэхэр, спектаклэ­хэр — сыдигъуи фэдэу дгъэкIотэжьырэ илъэсыр культурэм ылъэныкъокIэ зэмылIэужы­гъуагъ ыкIи Iофтхьабзэ­хэмкIэ баигъ.

Творческэ проект инхэм ащыщ хъугъэ «Ислъамыем», «Налмэсым», Нысхъэпэ театрэу «Дышъэ къошыным», АР-м и Камернэ музыкальнэ театрэу Хьанэхъу Адам ыцIэ зыхьырэм Урысыем культурэмкIэ и Министерствэ зэхигъэуцогъэ программэу «Тэры Урысыер» зыфиIорэм къыдыхэлъытагъэу IофшIэгъу дэкIыгъохэр зэряIагъэхэр.
Джащ фэдэу АР-м и Камернэ музыкальнэ театрэ АР-м и ­Лъэпкъ театрэ, Урыс къэра­лыгъо драматическэ театрэр дэкIыгъо фес­тивальхэу Ростов хэкум, къалэхэу Грознэм, ЦIэ­мэз ащыкIуагъэхэм ахэлэжьагъэх.
— Культурэм щылэжьэщт цIыфхэр тиIэнхэм, ахэм ягъэ­хьазырын нахьышIу хъуным фы­тегъэпсыхьагъэу къэралыгъо программэу «Культурэм хахъо егъэшIыгъэныр» зыфиIорэм къыдыхэлъытагъэу Iофтхьэбзэ зэфэшъхьафхэр зэхэтэщэх. Художественнэ гъэсэныгъэмкIэ ыкIи сэнаущыгъэ зыхэлъ кIэлэцIыкIухэр къыхэгъэщыгъэнхэмкIэ IофшIэкIэ амалэу тиIэ хъугъэр къызэтегъэнэгъэным ыкIи зе­гъэужьыжьыгъэным ар афэ­IорышIэ. Ащ елъытыгъэу, илъэ-
сым зэнэкъокъу, къэгъэлъэгъон, фестиваль 12 редгъэкIокIыгъ,
— къыддэгощагъ АР-м культурэмкIэ иминистрэ игуадзэу Кушъу Светланэ.

Лъэпкъ творчествэр респуб­ликэм икультурэ иIахь шъхьа­Iэхэм ащыщ. Мы лъэныкъомкIэ Iофтхьэбзэ зэфэшъхьафхэр рес­публикэм щырекIокIыгъэх. Ахэр: театральнэ купхэм яшъо­лъыр фестиваль, жанрэ зэ­фэшъхьафхэмкIэ лъэпкъ творчествэм ифестиваль, «Адыгеим ижъогъожъыехэр», адыгэ культурэм ифестиваль ыкIи шъо­лъыр мэхьанэ зиIэ Iофтхьабзэу «Лъапсэм къыфэбгъэзэжьыныр — зыужьыжьыгъэным игъогу».
— А пстэури зыкIызэхатщэ­рэр творческэ сэнаущыгъэ зы­хэлъхэм зыкъызэIуахын амал яIэныр ыкIи хагъэхъоныр ары. Джащ фэдэу культурэм, творчествэм цIыфхэр афэщэгъэнхэр типшъэрылъ, — къыIуагъ Кушъу Светланэ.
БлэкIыгъэ илъэсым къыщегъэжьагъэу «Культурэм иунэхэр — цIыфхэр зыфэзыщэхэрэ гупч» зыфиIорэ проектыр республикэм щэлажьэ. Шъолъыр ми­нистерствэм зэригъэнэфагъэм тетэу къэгъэлъэгъонышIухэр зиIэ культурэм иунэхэр ауж къи­нэхэрэм IэпыIэгъу афэхъух. Ахэм адэжь макIох, Iофтхьа­бзэхэр ащызэхащэх, цIыфхэм къэгъэлъэгъонхэр къафаты. Джащ фэдэ шIыкIэм тетэу IэпэIэсэныгъэмкIэ зэхъожьых. Клубнэ IофшIэным хэщагъэхэм япчъагъэ илъэсым ыкIэм ехъу­лIэу процент 1,3-рэ хэхъуагъ.
Лъэпкъ проектэу «Культурэм» къыдыхэлъытагъэу «Зы мафэ музеим» зыфиIорэр илъэсищ хъугъэу мэлажьэ. Iофтхьабзэм республикэм ирайонхэр зэкIэ хэлажьэх. ЯщыкIагъэу ыкIи мэ­хьанэ иIэу щыт. Ащ фэшъхьа­фэу, къекIокIырэ къэгъэлэгъонитIумэ Iоф ашIэ: «Тарихъ шIэ­­­жьым бзылъфыгъэм идунай зэрэхэуцорэр», «Пасэм къы­щегъэжьагъэу лъэхъаныкIэм нэс адыгэ дзэкIолIым иIашэхэр». Къыблэ ыкIи Темыр Кавказ шъолъырхэм ахэр къащагъэлъэ­гъуагъ.
ШъхьаIэр, муниципальнэ музееу тиIэхэм зы къахэхъуагъ — В. М. Королевым ыцIэ зы­хьырэ Краеведческэ музей Инэм иIэ хъугъэ.
Лъэпкъ проектэу «Культурэм» къыдыхэлъытагъэу модельнэ тхылъеджапIэхэм язэтегъэпсы­хьан лъэкIуатэ. Урысыем культурэмкIэ и Министерствэ зэхищэгъэ зэнэкъокъоу «Золотая полка» зыфиIорэм Шэуджэн районым ит псэупIэу Тихоновскэм дэт модельнэ тхылъеджапIэр щытекIуагъ. Ифонд зэрэзэтегъэпсыхьагъэмкIэ къэра­лыгъомкIэ пэрытэу алъытагъ. Федеральнэ мылъкур къоджэ цIыкIум итхылъеджапIэ хаплъхьэмэ шIуагъэу къыхьырэм ар ищысэшIу. ЦIыфхэр нахьыбэу зэрищэлIагъэх, ныбжьыкIэхэр Iофтхьэбзэ зэфэшъхьафхэм ахэлажьэх.
— Модельнэ тхылъеджапIэ­хэм ягъэпсынкIэ IофшIэкIэ ама­лэу тIэкIэлъыр къызфигъэфедэ шIоигъоу Ханты-Мансийскэ автоном хэкум икъэралыгъо тхылъеджапIэ зыкъытфи­гъэзагъ. АР-м и Лъэпкъ тхылъеджапIэ дэлэжьэнымкIэ зэзэ­гъы­ныгъэм тызэдыкIэтхагъ. Апэрэ телелъэмыджыр Джа-
джэм имодельнэ тхылъеджапIэ щыкIуагъ. Тигуапэ зэдэлэжьэныгъэм зызэриушъомбгъурэр, — еIо Кушъу Светланэ.
Анцокъо Ирин.

Сурэтхэр: АР-м культурэмкIэ
и Министерств.