Адыгеим псауныгъэр къэу­хъумэгъэнымкIэ ­икъулыкъу хэхъоныгъэшIухэмкIэ 2024-рэ илъэсыр егъэкIотэжьы. Ахэм зэкIэми ягугъу къэтшIын амал щыIэп, ау ащыщхэр къыхэдгъэщыных.

Адыгэ Республикэм и ЛIышъхьэу КъумпIыл Мурат мы лъэны­къом лъэшэу ынаIэ тырегъэты.
— Федеральнэ IэпыIэгъоу къытатырэм, Урысыем и Президентэу Владимир Путиным къыгъэуцугъэ пшъэрылъхэр зэ­рэдгъэцакIэхэрэм яшIуагъэкIэ медицинэ IэпыIэгъур нахьышIоу къалэхэми, къуаджэхэми ащара­гъэгъоты, IэзапIэхэр мылъкукIи, техникэкIи нахь зэтегъэпсыхьагъэ мэхъух, псауныгъэм икъэу­хъумэн фэгъэзэгъэ псэолъакIэ­хэр агъэцэкIэжьых ыкIи ашIых, медицинэ IофышIэхэм якъэгъотын епхыгъэ Iофыгъохэр зэ­шIуахых, — къыIуагъ Адыгеим и ЛIышъхьэ.
Медицинэ фэIо-фашIэхэм ягъэ­цэкIэнкIэ къутырэу Гавердов­скэм амалыкIэхэр иIэхэ хъугъэ. Джырэ шапхъэхэм адиштэрэ ам­булаториеу квадрат метрэ 420-рэ зэлъызыубытырэр мыщ щагъэпсыгъ.
Лъэпкъ проектэу «Псауны­гъэм икъэухъумэн» къыдыхэлъытэгъэ федеральнэ проектэу «Пэублэ IэпыIэгъу языгъэгъотырэ IэзапIэхэр уахътэм диштэу зэтегъэ­псыхьэгъэнхэр» зыфиIорэм ишIуагъэкIэ къатищэу зэтет IэзэпIакIэу Тэхъутэмыкъое районымкIэ къэлэ гъэпсыкIэ зиIэ псэупIэу Инэм щашIыгъэм Iоф ешIэ.
Мыекъопэ къэлэ IэзапIэу ура­мэу Чкаловым ыцIэ зыхьырэм тетыр агъэцэкIэжьыгъ. Ащ къыпэIулъ шъолъырыр зэтырагъэ­псыхьагъ. Медицинэ колледжым игъэкIотыгъэ гъэцэкIэжьынхэр рашIылIагъэх.
Гу-лъынтфэ узхэм, адэбз уз­хэм зыщяIэзэрэ медицинэ учреждениехэр нахь зэтырагъэ­псыхьэх, ахэм ящыкIэгъэ медицинэ оборудованиехэр къафащэфы.
2025-рэ илъэсым амбулатории 2 ашIынэу, адэбз узхэм зыщяIэзэхэрэ диспансерым игъэкIотыгъэ гъэцэкIэжьынхэр рашIылIэнхэу рахъухьэ.
Шъоущыгъу узым иеджэпIи 6 Адыгеим къыщызэIуахыгъ. ­Ныбжь зиIэхэм апае Мыекъуапэ еджэпIи 3 ыкIи кIэлэцIыкIу­хэм апае — 1, адрэхэр район гуп­чэхэм.
Шъоущыгъу узым ыгъэгумэкIы­рэ кIэлэцIыкIухэм лъым глюкозэу хэлъыр зэрашырэ пкъыгъор ра­щэфынэу 2024-рэ илъэсым сомэ миллион 13 фэдиз къыхагъэ­кIыгъ. Ащ нэмыкIэу мыгъэ IэзэпIи 9 документхэм ягъэхьазырын­кIэ электрон шIыкIэм техьагъэх.
Медицинэ учреждениехэм яав­топарк гъэкIэжьыгъэным зэ­пымыоу дэлажьэх. 2024-рэ илъэ­сым автомобиль псынкIэ 13 къа­фащэфыгъ.
Министерствэм къызэриты­гъэмкIэ, медицинэ IофышIэхэр икъунхэм тегъэпсыхьэгъэ IофшIэныр зэпымыоу лъагъэкIуатэ, ащ пае федеральнэ ыкIи шъолъыр программэхэр пхыращых.
Программэхэу «Земскэ доктор» ыкIи «Земскэ фельдшер» зыфиIохэрэмкIэ 2024-рэ илъэсым зэтыгъо ахъщэ тынхэр врач 56-мэ ыкIи гурыт медицинэ IофышIэ 15-мэ аIэкIагъэхьагъ. Программэхэр зыпхыращырэ уахътэм врач 591-мэ ыкIи гурыт медицинэ IофышIи 104-мэ ащ фэдэ IэпыIэгъу агъотыгъ.
Федеральнэ ахъщэ тынхэм анэмыкIэу къоджэ псэупIэм Iэ­пыIэгъу псынкIэм щылэжьэрэ фельдшерхэм зэтыгъо ахъщэ IэпыIэгъоу сомэ мин 500 ыкIи водительхэм мазэ къэс сомэ мини 5 араты. IэпыIэгъу псын­кIэм имедицинэ IофышIэу апэрэу псэупIэ ипотекэр зышIырэм пэу­блэм ригъэхьащт ахъщэм хигъэхъонэу зэтыгъоу сомэ мин 250-рэ фатIупщы.

Гурыт медицинэ IофышIэхэм япчъагъэ хэгъэхъогъэным фэшI Мыекъопэ медицинэ колледжым аштэхэрэр процент 30-кIэ на­хьыбэ ашIыгъ. 2024 — 2025-рэ илъэс еджэгъум республикэ мылъкумкIэ мыщ щырагъаджэрэр нэбгырэ 264-рэ хъугъэ. Мые­къопэ къэралыгъо технологическэ университетым и Политехническэ колледж гъэсэныгъэ медицинэ кластерэу «ПрофиМед» зыфиIорэр мы илъэсым къыщызэIуахыгъ.
Адыгеим имедицинэ иIофы­шIэхэм азыфагу зэнэкъокъу зэ­фэшъхьафхэр щырагъэкIокIых. Республикэ зэнэкъокъоу «Илъэ­сым иврач анахь дэгъу» зыфиIорэм мыгъэ зыфагъэшъошагъэр Адыгэ республикэ клиническэ сымэджэщым гу-лъынтфэ узхэм зыщяIэзэхэрэ и Гупчэ ипащэу Щыко Руслъан.
АР-м и ЛIышъхьэу КъумпIыл Мурат иунашъокIэ «Участковэ терапевт анахь дэгъу» зыфиIорэ зэнэкъокъу 2024-рэ илъэсым апэрэу республикэм щызэха­щагъ.
Илъэсэу дгъэкIотэжьырэм цIыфым ищыIэныгъэкIэ мэхьанэ зиIэ операцие гъэшIэгъонхэр Адыгеим щашIыгъэх. Адыгэ рес­публикэ клиническэ сымэджэщым нэхэм яIэзэгъэнымкIэ иот­деление технологие пэрытхэр зыщыгъэфедэгъэ операцие щашIыгъ. Ар «кератопластика» зыфаIорэр ары — нэапчыр зэ­блэхъугъэныр. Джынэс мыщ фэ­дэ операцие зищыкIэгъэ сымаджэхэр къэлэ чыжьэхэм ащыIэ сымэджэщхэм зафагъа­зэщтыгъэмэ, джы а амалышIур тиIэ хъугъэ.
Джэджэ районым щыщ бзылъфыгъэ лъэрмыхьым операции 4 зэшIыгъоу Адыгеим имедикхэм фашIыгъ. Ными сабыйми ящыIэныгъэ къагъэнэн алъэкIыгъ.
Iэшъынэ Сусан.
Сурэтхэр: псауныгъэр къэу­хъу­­мэгъэнымкIэ Министерствэр.