Хабзэ зэрэхъугъэу, илъэсым къулыкъу пэпчъ Iофэу ышIагъэр зэфехьысы­жьы. АР-м гъэсэныгъэм ылъэныкъокIэ гъэхъагъу иIэр ма­кIэп, ахэм ащыщ гурыт еджэпIищэу республикэм къыщызэIуахыгъэхэр.

Ахэм джыри щы къа­хэхъонэу агъэнафэ. Псэу­пIэу Яблоновскэм къы­щызэIуахыгъэ еджапIэу
N 28-м Урысыем и ЛIы­хъужъэу Валерий Заволянскэм ыцIэ ехьы. Ар псэолъэ заулэу зэхэт, ахэм аужырэ шапхъэхэм адиштэрэ Iэмэ-псымэхэр ачIэтых, зэтегъэпсыхьа­гъэх, Интернетыр къыз­фа­гъэфедэн амал яI. ЕджапIэм хэтых мастерскойхэр, спорт, актовэ залхэр, тхылъеджапIэр, шхапIэр, нэмыкIхэри, щагури дэгъоу зэтегъэпсыхьагъ.
Къуаджэу АдыгеякIэм къыщызэIуахыгъэ еджэпIа­кIэри джырэ шапхъэхэм адиштэу зэтегъэпсыхьагъ, ащ нэбгырэ 1100-рэ чIэфэ. Джащ фэдэу Мыекъопэ районым нэбгырэ 250-рэ зычIэфэщт еджапIэ ща­шIыгъ. Ащ нэмыкIэу еджэпIэ 20-мэ гъэцэкIэжьын IофшIэнхэр арашIылIагъэх.
БэмышIэу республикэм ирайон зэфэшъхьафхэм яеджапIэхэм автобус 11 аратыгъ.
Республикэм иапшъэрэ еджэпIитIумэ илъэс къэс хэхъоныгъэхэр ашIых, лъэ­ны­къуакIэхэр къыхагъа­хьэх. Мыекъопэ къэра­лыгъо тех­нологическэ универ­ситетыр пштэмэ, икIырэ илъэ­сым дзэ егъэ­джэн Гупчэ къыщызэIуа­хыгъ. Джащ фэдэу мы апшъэрэ еджапIэм и Политехни­ческэ колледж гъэсэныгъэ медицинэ кластерэу «ПрофиМед» зыфиIорэр къыщызэIуа­хыгъ.
Адыгэ къэралыгъо университетым икIырэ илъэсым Iофтхьэбзэ гъэшIэгъо­ныбэ щызэхащагъ. Ахэм ащыщ апшъэрэ еджапIэм ипроектэу «Наука вокруг» зыфиIорэр, мыщ кIэлэ­еджэ­кIо мин 240-рэ хэлэжьагъ.
Мы илъэсым апэрэу ма­тематикым и Мафэ ап­шъэрэ еджапIэм щыха­гъэунэфыкIыгъ. МэфэкI зэхахьэм имызакъоу, хьи­сапым епхыгъэ джэгу­кIэ, зэнэкъокъу зэфэшъхьафхэр афызэхащагъэх.
Адыгэ къэралыгъо университетым иректорэу Ма­мый Даутэ Урысые профессорскэ зэIукIэу «Ректор года» зыфиIорэм илъэпкъ премие къы­фа­гъэшъошагъ. Апшъэрэ еджа­пIэм ипрофессорхэу Абрэдж Ачэрдан, КIэрмыт Казбек, Шъоджэ Асиет ыкIи Ангелина Шахановам «Заслуженный профессор» зыфиIорэ цIэ лъапIэр къафаусыгъ.
ЯIофшIэн дакIоу респуб­ликэм икIэлэегъаджэхэр лъэныкъо зэфэшъхьафхэм афэгъэхьыгъэ зэнэкъо­къухэм илъэсым къыкIоцI ахэлэжьагъэх, текIоныгъэ­хэр къыдахыгъэх. Джащ фэдэу Адыгеим икIэлэ­еджакIохэми шIэныгъэ куухэр къагъэлъэгъуагъ республикэ олимпиадэхэм, федеральнэ мэхьанэ зиIэ уцугъохэм ахэлэжьагъэх.