Урысыем икъэгъэнэжьакIо и Мафэ непэ хагъэунэфыкIы. Ащ фэгъэхьыгъэ Iоф­тхьабзэ АР-м и ЛIышъхьэ и Координационнэ гупчэ щыкIуагъ. Адыгеим и ЛIышъхьэу КъумпIыл Мурат ащ хэлэжьагъ.

АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, ошIэ-дэмышIагъэ зыхэлъ тхьамыкIагъохэм якIэуххэм ядэгъэзыжьынкIэ Министерствэм и ГъэIорышIэпIэ шъхьаIэу АР-м щыIэм ипащэу Станислав Илющенкэр, АР-м и Прокуратурэ, Адыгеим хэгъэгу кIоцI IофхэмкIэ и Министерствэ, Урысыем щынэгъончъэнымкIэ и Федеральнэ къулыкъу и Гъэ­IорышIапIэу Адыгэ Республикэм щыIэм, Урысыем и Росгвардие икъутамэу АР-м щыIэм, УФ-м и Следственнэ комитет иследственнэ гъэIорышIапIэу АР-м щыIэм, Адыгеим и Апшъэрэ хьыкум, пщыныжь ягъэхьыгъэнымкIэ Федеральнэ къулыкъум и ГъэIорышIапIэу Адыгэ Республикэм щыIэм, ошIэ-дэмышIагъэ зыхэлъ тхьамыкIагъохэм ядэгъэзыжьынкIэ Министерствэм и ГъэIорышIэпIэ шъхьаIэу АР-м щыIэм яIэшъхэтетхэр ащ хэлэжьагъэх. ЗэIукIэр аублэным ыпэкIэ къэзэрэугъоигъэхэм къафагъэлъэгъуагъ видеороликэу Урысыем ошIэ-дэмышIагъэ зыхэлъ IофхэмкIэ и Министерствэ и ГъэIорышIэпIэ шъхьаIэу АР-м щыIэм имэшIогъэкIуасэхэмрэ икъэ­гъэнэжьакIохэмрэ 2024-рэ илъэсым Iофэу ашIагъэм фэгъэхьыгъэр.
ЯмэфэкIэу къэблагъэрэм пае къафэгушIозэ АР-м и ЛIышъхьэ къыхигъэ­щыгъ мы къулыкъум иIофышIэхэм щынагъоу щыт Iоф зэрагъэцакIэрэр, цIыфхэм якъэ­гъэнэжьын пшъэрылъ шъхьаIэу ахэм зэряIэр.

«ЦIыфхэм цыхьэ къышъуфашIы, ахэм ашIэ шъузышъхьамысыжьэу чIыпIэ зэжъу ифагъэхэм IэпыIэгъу шъузэрафэхъущтыр. Ухьазырыныгъэ дэгъу шъуиIэу, зэдегъэ­штэныгъэ шъухэлъэу ошIэ-дэмышIагъэ зыхэлъ тхьамыкIагъохэр къызыхъухэкIэ шъуипшъэрылъ икъоу зэрэжъугъэцэкIэщтым, кIэух щынагъохэу а гумэкIыгъохэм къыздахьын алъэкIыщтхэр щыгъэзыягъэ хъунхэм шъуишъыпкъэу шъуапылъ», — къыIуагъ КъумпIыл Мурат.
Ащ къызэрэхигъэщыгъэмкIэ, 2024-рэ илъэсым къулыкъум иIофышIэхэм гъогогъу мин 1,9-рэ машIор агъэкIосагъ, лъыхъон-къэгъэнэжьын Iофыгъуи 109-рэ зэшIуахыгъ, нэбгырэ 248-рэ къагъэ­нэжьыгъ. Республикэм и ЛIышъхьэ анахьэу къыхигъэщыгъэхэм ащыщ къулыкъум иIофышIэхэм яIэпэIэсэныгъэрэ язэдегъэштэныгъэрэ яшIуагъэкIэ мы илъэсым чъэпыогъум пыим идронхэм зэрарышхо къытахын зэрамылъэкIыгъэр.
Республикэм фэхъурэ зэхъокIыныгъэ инхэм, социальнэ, экономикэ ыкIи инфраструктурнэ псэуалъэхэр хэпшIыкIэу нахьыбэ зэрэхъухэрэм къатегущыIэзэ КъумпIыл Мурат къыхигъэщыгъ щынэгъончъэным иIофыгъохэмкIэ пшъэ­дэкIыжь зыхьырэ къулыкъухэм япшъэ­рылъ нахь ин зэрэхъурэри.
Ащ дакIоу Адыгеим и ЛIышъхьэ джырэ уахътэм диштэрэ технологиехэр иIофшIэнкIэ къулыкъум къызфигъэфедэнхэ зэрэфаер, цIыфхэм къэбарыр игъом алъыгъэIэсыгъэн, ошIэ-дэмышIагъэ зы­хэлъ тхьамыкIагъохэр къэхъунхэм ищынагъо зэрэщыIэм фэгъэхьыгъэу макъэ арагъэIун зэрэфаер къыхигъэщыгъ.
Республикэм и ЛIышъхьэ мы къулыкъум ипащэхэм ыкIи ащ Iоф щызышIэрэ пстэуми, джащ фэдэу иветеранхэм мэшIогъэкIосэн-къэгъэнэжьын Iофтхьабзэхэм язехьанкIэ, а лъэныкъомкIэ зэшIуахыхэрэм нахь заушъомбгъуным яIахь зэрахашIыхьэрэм апае зэрафэразэр къыIуагъ.
«Сицыхьэ телъ тапэкIи зэрифэшъуа­шэу шъуипшъэрылъхэр зэрэжъугъэцэкIэщтхэм, цIыфхэм якъэухъумэн шъунаIэ зэрэтежъугъэтыщтым, къулыкъум иIоф­шIэн тапэкIи нахьышIоу зэхэщэгъэным шъузэрэдэлэжьэщтым. Республикэм ихэбзэ къулыкъухэм ренэу къыжъудырагъэштэщт, Адыгеим игуфакIохэми ащкIэ яшIуагъэ къышъуагъэкIыщт», — къыIуагъ КъумпIыл Мурат.
Мы Iофтхьабзэм илъэхъан Урысыем ошIэ-дэмышIагъэ зыхэлъ IофхэмкIэ и Министерствэ и ГъэIорышIэпIэ шъхьаIэу Адыгеим щыIэм иIофышIэ заулэмэ ­Адыгэ Республикэм и ЛIышъхьэ ирэзэныгъэ тхылъхэр аратыжьыгъэх. Ахэм ащыщ ГъэIорышIапIэм имэшIогъэкIосэ часть ия 2-рэ отделение ипащэу Сурен Киян, имэшIогъэкIосэ часть ия 14-рэ отряд ипащэу Александр Науменкэр, мэшIогъэкIосэн IофхэмкIэ гупчэ пунктым идиспетчерэу Хьапыщт Людмилэ, АР-м и Адыгэ лъыхъокIо отряд а 1-рэ класс зиIэ икъэгъэнэжьакIоу ХьэпэкIэ Рустам.
ЗэIукIэм къыщыгущыIагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Урысыем щынэгъончъэнымкIэ и Федеральнэ къулыкъу и ГъэIорышIапIэу АР-м щыIэм ипащэу Михаил Кемеровыр, УФ-м хэгъэгу кIоцI IофхэмкIэ и Министерствэ и ГъэIорышIапIэу АР-м щыIэм иминис­трэу Олег Безсмельницыныр, Урысыем ошIэ-дэмышIагъэ зыхэлъ IофхэмкIэ и Министерствэ и ГъэIорышIапIэу Адыгэ Республикэм щыIэм ипащэу Станислав Илющенкэр.
Урысыем и МЧС имедалэу «За содружество во имя спасения» зыфиIорэр къыфагъэшъошагъ медицинэ IэпыIэгъу псынкIэмкIэ ыкIи тхьамыкIагъохэм ахэфагъэхэм якъэгъэнэжьынкIэ Адыгэ республикэ гупчэм иврач шъхьаIэу Сихъу Ахьмэд. Бгъэхэлъ тамыгъэу «Гъэхъа­гъэу иIэхэм апае» зыфиIорэр къыфагъэшъошагъ тракторист-машинистэу, аэродромым машIом зыкъызыщештэм ащ игъэ­кIосэнкIэ чаныгъэ къызхэфэгъэ Роман Перевозчиковым. Ахэм анэмыкIэу зичэзыу цIэхэри афагъэшъошагъэх.
Урысыем и МЧС и ГъэIорышIапIэу АР-м щыIэм иIофышIэхэу анахь гъэхъэ­гъэ инхэр зышIыгъэхэм АР-м и Къэралыгъо Совет – Хасэм, Урысыем и ФСБ и ГъэIорышIапIэу АР-м щыIэм, АР-м и МВД, Урысыем и МЧС и ГъэIорышIапIэу АР-м щыIэм ярэзэныгъэ ыкIи ящытхъу тхылъхэр афагъэшъошагъэх. ИкIэухым творческэ коллективхэм концерт къатыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо
Сафыет.