Адыгеим изаслуженнэ сурэтышIэу, Урысыем исурэтышIхэм я Союз хэтэу Виктор Бирюковым иIофшIагъэхэм якъэгъэлъэгъон Мыекъуапэ къы­щызэIуахыгъ. IофшIэгъи 100-м нахьыбэ ащ хэхьагъ.

Зыныбжь илъэс 75-рэ хъугъэ сурэтышIэу Виктор Бирюковым иIэпэIэсэныгъэ уасэ фэзышIырэ ыкIи искусствэр зышIогъэшIэ­гъон цIыфыбэ Iофтхьабзэм зэ­фищагъ.
— Сигуапэ непэ Урысыем исурэтышIхэм я Союз хэтэу, Адыгэ Республикэм изаслуженнэ сурэтышIэу Виктор Бирюковым имэфэкI сызэрэхэлажьэрэр, — къыIуагъ АР-м культурэмкIэ и Министерствэ иотдел ипащэу Шэуджэн Бэлэ ыкIи зыщылэжьэрэ министерствэм сурэтышIым фигъэшъошэгъэ Щытхъу тхылъыр ритыжьыгъ.
Адыгэ Республикэм исурэтышIхэм я Союз итхьаматэу Елена Абакумовам сурэтышIым тичIыпIэ дахэхэм ащилъэгъурэр, игупшысэхэр Виктор Бирюковым иIофшIагъэхэм къызэращи­Iуатэрэр хигъэунэфыкIыгъ. АР-м и Сурэт къэгъэлъэгъуапIэ ипащэу Бырсыр Абдулахь къыхигъэ­щыгъ тичIыгу къы­зэрыкIоу зэрэщымы­тыр сурэ­ты­шIым иIэпэIэсэныгъэ­кIэ къызэригъэлъагъорэр, купкI ин исурэт­хэм зэрахилъхьэрэр.

Портретхэр, чIыопсым идэха­гъэ къизыIотыкIыхэр ащ иIофшIа­гъэхэм къызэрябэкIырэр хигъэу­нэфыкIыгъ КъокIыпIэм щыпсэурэ лъэпкъхэм яискусствэкIэ Къэра­лыгъо музеим и Къутамэ ипащэ игуадзэу Фатима Сулеймановам. СурэтышIым иныбджэгъухэ­ри зэхахьэм къыщыгущыIагъэх.
— Искусствэр сыгу рихьырэ къодыеп. Ащ кIуачIэу къысхилъхьэрэмкIэ сыщыI, цIыфхэм шIу афасшIэ сшIоигъу. Пейзажыр, портретыр, натюрмортыр — мы лъэныкъуищымкIэ сиIофшIагъэ­хэр гъэпсыгъэх. Тыкъэзыуцу­хьэ­рэ дунаим, тичIыгу ядэхагъэ сурэтхэм арысэлъхьэ. Къушъхьэу ос зытелъыр зэрэдахэм, псыхъор къызыщежьэрэ чIыпIэ­хэм ятеплъэ сиIэшIагъэхэр афэ­гъэхьыгъэх. СищыIэныгъэ игу­пшысэ сурэтхэр къыпкъырэ­кIых, — къыIуагъ Виктор Би­рюковым.
Виктор Бирюковыр псэупIэу Красногвардейскэм 1949-рэ илъэсым къыщыхъугъ, илъэс 50 хъугъэу исэнэхьат кIэлэцIыкIу­хэр фегъасэх. Пшызэ къэралыгъо университетым художест­веннэ графикэмкIэ ифакультет къыухыгъ. Культурэм и Унэ исурэтышIэу, гурыт еджапIэм икIэлэегъаджэу Iоф ышIагъ. Живописым нахь фэщагъэу иIэ­пэIэсэныгъэ искусствэм къыщызэIуихыгъ. Ащ сурэтшIыным илъэныкъо зэфэшъхьафхэр Iэ­кIэ­лъых.
Виктор Бирюковым ятэу Ми­хаил Хэгъэгу зэошхом хэлэ­жьагъ. Ащ исурэти къэгъэлъэгъо­ным хэхьагъ. Ядэжь къэзыгъэзэжьыгъэ дзэкIолIым шъэо­жъыер, гъунэгъухэр зэрэпэгъо­кIыгъэхэр къэзыгъэлъэгъорэ сурэтри къоджэ щыIакIэм епхыгъ. КIэлэегъаджэм, мэ­къуаом, комбайнерым, медици­нэм щыцIэрыIо врачхэм, сурэтышIхэм, инэIосэ бзылъфы­гъэхэм ясурэтхэм, исабыигъом къыхэхыгъэ сюжетхэм уигуапэу уяплъы. Хэгъэгум, лъэпкъым афэшъыпкъэу, лъэпкъ тхыдэу «Нартхэр» зытхыгъэ ХьэдэгъэлIэ Аскэр ипортрет къэгъэ­лъэгъоным хэхьагъ. ЩыIэныгъэм имэфэ къызэрыкIо, цIыфыр къэ­зыуцухьэрэ пкъыгъохэм якъи­гъэлъэгъукIын къаушыхьаты цIыфыр дунаишхом изы Iахь цIыкIоу зэрэщытыр. Чъыгым, псыхъом, ошъогум сурэтышIыр яплъызэ, тишъолъыр идэхагъэ къыреIотыкIы. Сурэтэу нэм ылъэгъурэр искусствэ лъагэм ыбзэкIэ къэгущыIэ. Iофтхьабзэм къекIолIагъэ пэпчъ ыгу нэсэу IэшIагъэ къыхигъэщыгъ.
ЗэхэщакIохэм искусствэр зышIогъэшIэгъонхэр къэгъэ­лъэгъоным рагъэблагъэх, щылэ мазэм и 12-м ар зэфашIы­жьыщт.
Лъэпшъыкъо Фатим.
Сурэтхэр: Iэшъынэ Аслъан.