Инспектор ныбжьыкIэхэм ядвижение (ЮИД) и Слет АР-м гъэ­сэны­гъэ тедзэ ягъэгъотыгъэнымкIэ и Гупчэ щыкIуагъ.

Районхэм ащыIэ инспектор ныбжьыкIэхэм яотряд анахь дэгъухэм ялIыкIохэр ащ зэфищагъэх. Ахэм илъэсым гъэхъагъэу ашIыгъэхэр, гъогурыкIонымкIэ IэпэIэсэныгъэу зэра­гъэгъотыгъэр зэIукIэм щызэфа­хьысыжьыгъ.
Iофтхьабзэм хэлэжьагъэх кIэлэцIыкIухэм яфитыныгъэ­хэмкIэ Уполномоченнэу АР-м щыIэ Наталья Агеевар, Адыгеим и Къэралыгъо автоинспекцие зэхэщэн-зэфэхьысыжь Iоф­шIэнымкIэ ыкIи пропагандэмкIэ иотдел ипащэу Бзэджэжъыкъо Мурат, нэмыкIхэри.
— Инспектор ныбжьыкIэхэм ядвижение хэтхэр гъогум узэ­рэщызекIон фаем фэIорышIэ-
рэ Iофтхьэбзэ зэфэшъхьафхэм ахэ­лажьэ. НыбжьыкIэхэр нахьыбэу мы движением хэщэгъэн-
хэм мэхьанэшхо иI. Сыда пIомэ кIэ­лэцIыкIу фыкъоныгъэхэр дэгъэзыжьыгъэнхэр инспекцием ипшъэрылъ шъхьаIэхэм ащыщ, ЮИД-хэр ащ фэIорышIэх, — хигъэунэфыкIыгъ Бзэджэ­жъы­къо Мурат.
КIэлэцIыкIухэм яфитыны­гъэхэмкIэ Уполномоченнэу На­талья Агеевам зэIукIэм хэла­жьэхэрэм ыкIи кIэлэегъаджэхэм шIуфэс къарихыгъ. Къэблэгъэрэ илъэсыкIэ мэфэкIхэмкIэ къафэгушIуагъ ыкIи щынэгъончъэ гъогухэр яIэнхэу къафэлъэIуагъ.

Нэужым командэхэм гъогурыкIоным ишапхъэхэр зэра­шIэ­рэмкIэ яшIэныгъэхэр къагъэ­лъэ­гъуагъ, ахэр практикэм щау­шэтыгъэх. Джащ фэдэу яIэ­пэIэсэныгъэкIэ зэхъожьыгъэх, зым ышIэрэм адрэхэр кIырыплъынхэ амал яIагъ, а зэпстэуми ныбджэгъуныгъэр ­агъэпытагъ.
Шъолъыр зэнэкъокъухэу «Щынагъо зытемылъ гъогур» ыкIи «КIэлэцIыкIугъом игъогушIу» зы­фиIохэрэм якIэуххэр мы Iоф­тхьабзэм щызэфахьысыжьыгъэх, текIоныгъэ къыдэзыхы­гъэхэм афэгушIуагъэх, нэпэеплъ шIухьафтынхэр, дипломхэр аратыгъэх.
— НыбжьыкIэхэм зыкъызэ­IуахынымкIэ ыкIи тигъогухэр щынэгъонхэмкIэ мы Iофтхьабзэр амалышIу хъугъэ. КIэлэцIыкIу фыкъоныгъэхэр дэгъэзыжьы­гъэнхэмкIэ, АР-м и Къэралыгъо автоинспекцие IофшIэн гъэнэфагъэ егъэцакIэ ыкIи ащ кIэух дэгъухэр иIэхэу къэнэфагъ. Зы­ныбжь имыкъугъэхэр зыхэ­фэгъэ гъогу хъугъэ-шIэгъэ 50 фэдиз республикэм щатхыгъ, ахэм нэбгыри 8 ахэкIодагъ, 2-р — водителых, адрэхэр машинэм къадисыгъэх. Мы лъэныкъомкIэ ны-тыхэм джыри Iоф адэтшIэщт. ЛъэсрыкIо кIэлэцIыкIухэм ягугъу къэтшIымэ, ахэм япхыгъэу хъу­гъэ-шIэгъи 8 агъэунэфыгъ, нэ­бгыритIумэ шъобжхэр атещагъэ хъугъэ, зи хэкIодагъэп. БлэкIыгъэ илъэсым ипчъагъэхэм мыр ябгъапшэмэ, фэдитIукIэ нахь макI. Къэралыгъо автоинспекцием гъэсэныгъэм иучреждениехэр игъусэхэу зэхащэрэ Iоф­шIэным шIуагъэ къызэри­тыгъэм тегъэгушIо, джыри ар лъыдгъэкIотэщт, — къыIуагъ Бзэджэжъыкъо Мурат.
Iэшъынэ Сусан.