Республикэм ижурналистхэм азыфагу щызэхащэрэ зэнэкъокъухэу «Патриот», «Адыгеир зэдытиун», «Стоп, коррупция!» зыфиIохэрэм якIэуххэр зэфахьысыжьыгъэх.

Зитхыгъэ ыкIи зикъэтын анахь дэ­гъоу алъытагъэхэм Адыгэ Республикэм ­лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет ищытхъу тхылъхэр аратыжьыгъэх.
Зэхэсыгъор къызэIуихызэ ащ итхьаматэу Шъхьэлэхъо Аскэр игуапэу журналистхэм ягъэхъагъэхэмкIэ къафэгу­шIуагъ, мыщ фэдэ зэнэкъокъухэм мэхьэнэ ин зэряIэр къыхигъэщыгъ.
— Илъэс къэс журналистхэр нахьыбэу, тхыгъэ ыкIи къэгъэлъэгъон гъэшIэгъонхэр зэнэкъокъум къырахьылIэ зэрэхъугъэр тигуапэ. ЩыIэныгъэм илъэныкъо пстэури IэпэIэсэныгъэ хэлъэу къызэдырагъэубытын алъэкIы. Темэ шъхьаIэхэу хэушъхьафыкIыгъэ дзэ операциер зэрэкIорэми, гъогурыкIоным епхыгъэ хъугъэ-шIагъэхэм, телефон гъэпцIакIохэми шъунаIэ атетыгъ. Джыри къихьащт илъэсым ахэр лъыгъэкIотэгъэнхэ, цIыфхэм къэбарыр икъоу, игъэкIотыгъэу алъыгъэIэсыгъэн фае, — къыIуагъ Шъхьэ­лэхъо Аскэр.
Лъэныкъоу «Патриот» зыфиIорэмкIэ апэрэ ыкIи ятIонэрэ чIыпIэхэр респуб­ликэ гъэзетэу «Советскэ Адыгеим» ижурналистхэу Екатерина Нужнаям ыкIи Валерия Ломешинам, ящэнэрэр Мые­къопэ районым игъэзетэу «Маякым» иобозревателэу Александр Силаевым афагъэшъошагъэх. ТелерадиокъэтынхэмкIэ къахэщыгъэхэр телерадиокомпаниеу «Адыгеим» тематическэ къэтынхэмкIэ къулыкъум иотдел ипащэу ГъукIэлI Сусан, Бэгъушъэ Фатим, ТIэшъу Светлан.
«Адыгеир зэдытиун» зыфиIорэ лъэныкъом апэрэ чIыпIэр къыщыфагъэшъо­шагъ «Адыгэ макъэм» иобозревателэу Делэкъо Анетэ, ятIонэрэ хъугъэ гъэзетэу «ЗыкIыныгъэм» иредактор шъхьаIэу ПхъэчыяшIэ Суандэ, «Адыгэ макъэм» иобозревателэу Iэшъынэ Сусанэ ящэнэрэ чIыпIэр къыдихыгъ. ТелекъэтынхэмкIэ КъТРК-у «Адыгеим» иотдел ипащэу Къуижъ Аминэт, иIофышIэхэу Гъазые Бирамхъан, Ирина Шашковар, Шъэджэшъэ Азэмат, Къудаикъо Алый, Хьакъунэ Заремэ къыхагъэщыгъэх.
Лъэныкъоу «Стоп, коррупция!» зыфиIорэмкIэ хагъэунэфыкIырэ чIыпIэхэр къыдахыгъэх гъэзетэу «Советскэ ­Адыгеим» иобозревателэу Дмитрий Кизяновым, гъэзетэу «Майкопские новости» зыфиIорэм иобозревателэу Вера Корниенкэм, «Адыгэ макъэм» иобозревателэу КIарэ Фатимэ. ТелекъэтынхэмкIэ – журналистхэу Евгения Федосеевар, Браукъо Вячеслав, ЛIэхъусэжъ Марианэ.