Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм иапэрэ пэщагъэу Джанчэтэ Налбый фэгъэхьыгъэ мыжъобгъум икъызэIухын къалэу Мыекъуапэ щыкIуагъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, Урысыем щынэгъончъэнымкIэ и Федеральнэ къу­лыкъу и ГъэIорышIапIэу Адыгэ Респуб­ликэм щыIэм ипащэу Михаил Кемеровыр, АР-м ыцIэкIэ Урысые Федерацием исенаторхэу Хъопсэрыкъо Муратрэ Александр Наролинымрэ, къэлэ мэрием ипащэхэр, АР-м къэралыгъо щынэгъончъэнымкIэ икъулыкъухэм яветеранхэм яшъолъыр общественнэ организацие иIэшъхьэтетхэр, Урысыем щынэгъончъэ­нымкIэ и Федеральнэ къулыкъу и Гъэ­IорышIапIэу Адыгэ Республикэм щыIэм иIофышIэхэр, ведомствэм пэщэныгъэ дызезыхьэщтыгъэм иIахьылхэр ыкIи Iоф дэзышIэгъагъэхэр.

Шъугу къэтэгъэкIыжьы: Джанчэтэ Налбый Мосэ ыкъор 1951-рэ илъэсым къуаджэу Шэуджэнхьаблэ (джы къуаджэу Хьакурынэхьаблэ) къыщыхъугъ. Дзэм къулыкъур зыщехь нэужым СССР-м и КГБ и Апшъэрэ Краснознаменнэ еджапIэр къыухыгъ. 1991-рэ илъэсым нэс къэралыгъо щынэгъончъэным икъулыкъу­хэм IэнэтIэ зэфэшъхьафхэр ащигъэ­цэкIагъэх. 1992-рэ илъэсым къыщыублагъэу 1997-м нэс Урысыем щынэгъончъэ­нымкIэ и Федеральнэ къулыкъу и Гъэ­IорышIапIэу Адыгэ Республикэм щыIэм пэщэныгъэ дызэрихьагъ. А уахътэм къы­кIоцI къулыкъум ыцIэ заулэрэ зэбла­хъугъ. Хьылъэу зэсымэджэ нэуж 2016-рэ илъэсым щылэ мазэм дунаим ехыжьыгъ.
Республикэм и ЛIышъхьэ къызэгущыIэм къызэрэхигъэщыгъэмкIэ, тичIыпIэгъоу, офицер чанэу, ихэгъэгу фэшъып­къэу, адыгэ лъэпкъым ыкъо шIагъоу щытыгъэр зэрэтщымыгъупшэрэм ыкIи лъытэныгъэшхо зэрэфэтшIырэм яшыхьатэу щыт непэрэ хъугъэ-шIагъэр.
«Налбый Мосэ ыкъом щынэгъончъэным икъулыкъухэм илъэс 40-рэ Iоф ащишIагъ, афэшъыпкъэу, къэрар хэлъэу хэгъэгум, игупсэ республикэ афэлэ­жьагъ, Iофэу ыгъэцакIэрэм фыриIэ гуетыныгъэм­кIэ щысэ шIагъо къыгъэлъэгъуагъ. IэпэIэ­сэныгъэ ин зыхэлъ, зыфэгъэзэгъэ Iофым хэшIыкIышхо фызиIэ пащэу ары ар зэрашIэщтыгъэр ыкIи лъытэныгъэ зыкIыфашIыщтыгъэр», — къыIуагъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, Джанчэтэ Налбый IэпэIэсэныгъэ инэу хэлъым ишIогъэшхо къэ­кIуагъ къэралыгъо гъэпсыкIэр гъэпытэгъэным ипэублэ чэзыухэр псынкIэу зэпычыгъэн­хэмкIэ, общественнэ ыкIи социальнэ-политикэ зыпкъитыныгъэр къэгъэнэжьыгъэнымкIэ, терроризмэмрэ экстремизмэм­рэ апэуцужьыгъэнымкIэ.
КъумпIыл Мурат къызэриIуагъэмкIэ, Налбый Мосэ ыкъом епэсыгъэ кIэн къыгъэнагъ. Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм пшъэрылъэу ыпашъхьэ итхэр шIуагъэ хэлъэу гъэцэкIэгъэнхэм ренэу ынаIэ тырегъэты, республикэм общественнэ ыкIи экономикэ щынэгъончъагъэ илъыным ишъыпкъэу дэлажьэ.
Мы Iофтхьабзэм къыщыгущыIагъэх Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм ипащэу Михаил Кемеровыр, Адыгэ Республикэм къэралыгъо щынэгъончъэнымкIэ икъулыкъухэм яветеранхэм яобществэ итхьаматэу Сергей Подгорнэр.
ГъэIорышIапIэм пэщэныгъэ дызезыхьэ­щ­тыгъэм цIыфыгъэ шэпхъэ дахэу хэлъы­гъэхэр, теубытагъэ зэриIагъэр, и Хэ­гъэгу фэшъыпкъэу къулыкъур зэрэфихьыгъэр къыхагъэщыгъ. ИIахьылхэм ацIэкIэ къэ­гущыIагъ Налбый ыкъоу Джанчэтэ Заур. Iофтхьабзэр зэхэзыщэгъэ ыкIи ятэ ащымыгъупшэным фэгъэхьыгъэ Iофхэр зезыхьэгъэ пстэуми зэрафэразэр ащ къыIуагъ. Адыгеим и ЛIышъхьэу КъумпIыл Мурат къызэрэхигъэщыгъэмкIэ, республикэм ипащэхэм ащ фэдэ Iоф­тхьабзэхэм ренэу адырагъэштэщт, тичIыпIэгъухэу республикэмрэ хэгъэгумрэ яхэхъоныгъэ зиIахьышхо хэзышIыхьагъэ­хэр ащымыгъупшэнхэм пае афэлъэкIыщтыр зэкIэ ренэу ашIэщт.
АР-м и ЛIышъхьэ ипресс-­къулыкъу къытырэ къэбархэмкIэ
Тхьаркъохъо Сафыет.