Лъэпкъ проектымкIэ зэфэхьысыжьхэр
Гъогухэм атегъэпсыхьэгъэ лъэпкъ проектыр 2024-рэ илъэсым зэрагъэцэкIагъэм, къихьащт илъэсымкIэ гухэлъэу яIэхэм АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ къатегущыIагъ.
Проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэр лъызыгъэкIотэщт проектэу «Инфраструктура для жизни» зыфиIорэм игъэцэкIэн 2025-рэ илъэсым иублэгъу зэрэфежьэщтхэм игугъу министерствэм къышIыгъ.
Лъэпкъ проектыр агъэцакIэу заублагъэм къыщегъэжьагъэу IофшIэнхэм хэпшIыкIэу зэрахэхъуагъэр министерствэм къыщаIуагъ. Iофтхьабзэу рахъухьагъэхэр зэкIэ 2023-рэ илъэсым икъоу агъэцэкIэгъагъэх, 2025-рэ илъэсым телъытэгъэ проект заулэхэмкIэ пэшIорыгъэшъ IофшIэнхэм афежьэгъагъэх.
АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ къызэрэзэфихьысыжьыгъэмкIэ, лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм тетэу республикэ мэхьанэ зиIэ автомобиль гъогухэм яIахь 18 мыгъэ федеральнэ шапхъэхэм адиштэу республикэм щызэтырагъэпсыхьагъэх, Кощхьэблэ районымкIэ псыхъоу Фэдз лъэмыдж тыралъхьагъ. Мыекъопэ, Яблоновскэ къэлэ псэупIэхэм ягъогухэм яIахьи 4 агъэкIэжьыгъ. А гухэлъхэм апае сомэ миллиардым ехъу къыхагъэкIыгъагъ.
2025-рэ илъэсым телъытэгъэ планымкIэ Iоф зышIэгъэ подрядчикхэм республикэ мэхьанэ зиIэ автомобиль гъогухэм яIахьитIу Красногвардейскэ районым, яIахьищ къалэу Мыекъуапэ щагъэцэкIэжьыгъ. Джыдэдэм поселкэу Яблоновскэм иурамэу Промышленнэм игъэкIэжьын ыуж итых.
ГъогурыкIонымкIэ шапхъэхэр къыдэлъытэгъэнхэм лъэшэу гъунэ лъафы: шапхъэхэр зэраукъорэр къэзыгъэлъэгъорэ видеокомплекс 16 республикэм игъогухэм 2024-рэ илъэсым щатырагъэуцонэу рахъухьагъ. Автомобиль гъогухэр зэщымыкъонхэм пае Кощхьэблэ, Тэхъутэмыкъое районхэм щэчалъэхэр атырагъэуцуагъэх.
Лъэпкъ проектым къыдыхэлъытэгъэ пшъэрылъ шъхьаIэхэм зэу ащыщ чэзыу-чэзыоу общественнэ транспортыр гъэкIэжьыгъэныр. Мыгъэ автобус 30 республикэм пае къащэфыгъ, ахэр зезыфэщтхэм якъыхэхын ыуж итых.
ХэгъэунэфыкIыгъэн фае хэгъэгум итранспорт системэ непэ зэхъокIыныгъэшхохэр зэрэфэхъухэрэр, Урысыем и Президент иIэпыIэгъурэ Правительствэр чанэу шъолъырхэм зэрадэлажьэрэмрэ яшIуагъэкIэ лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэр лъэныкъо пстэухэмкIи гъэцэкIагъэ зэрэхъурэр. Проектыр пхыращэу заублагъэм къыщегъэжьагъэу квадрат метрэ миллиардым асфальт тыралъхьагъ, къэлэ гъогухэм япроцент 85-р джырэ шапхъэхэм адиштэу зэтырагъэпсыхьагъэх.
Шэртэнэ Мурат.