«Лъэпкъ нэшанэ зиIэ илъэсыкIэ джэгуалъ» зыфиIорэ республикэ зэнэкъокъум текIоныгъэ къыщыдэзыхыгъэ кIэлэцIыкIухэр агъэшIуагъэх. Правительствэм и Унэ щагъэуцугъэ пцIыикъ чъыгым джэгуалъэхэр пашIагъэх.

Адыгеим иIэпэIасэхэм я Ассоциациеу республикэм щызэхэщагъэр Iофтхьабзэм икIэщакIу, АР-м культурэмкIэ и Минис­терствэрэ Урысые политическэ партиеу «Единэ Россием» иобщественнэ Штабэу Адыгеим щыIэмрэ IэпыIэгъу фэхъугъэх.
Зэнэкъокъур я 6-у мыгъэ зэхащагъ. ПстэумкIи IофшIэгъэ 60-м ехъу ащ къы­рахьылIагъ. ЗэхэщакIохэм зэрэхагъэу­нэфыкIыгъэмкIэ, ахэм уахэдэныр, анахь дэгъухэр къахэхыгъэнхэр хьылъагъэ. IэшIэгъэ гъэшIэгъонхэр зэмылIэужыгъоу агъэпсыгъэх, дышъэ ыкIи тыжьын Iуда­нэкIэ хэдыкIыгъэх, хъыгъэх, дыгъэх, гъэпкIагъэх. Пшъэрылъ шъхьаIэу щытыгъэр адыгэ лъэпкъ Iэпэщысэхэм яшIынкIэ агъэфедэрэ шIыкIэхэмкIэ IофшIагъэхэр гъэцэкIэгъэнхэр ары. Ахэм ахэхьэх ды­шъэ хэдыкIыныр, хъэныр, пхъэм хэбзыкIыныр, гъучIым хэгъэжъыкIыгъэныр ыкIи нэмыкIхэри.
АР-м культурэмкIэ иминистрэ игуа­дзэу Кушъу Светланэ Iофтхьабзэр къы­зэIуихыгъ.
— Джэгуалъэу зэнэкъокъум къырахьы­лIагъэхэр лъэпкъ ыкIи илъэсыкIэ нэшанэхэр къыраIотыкIхэу, щынэгъончъэ­хэу, илъэсыкIэ чъыгым пыплъэшъунхэу, зым нахьи зыр нахь дахэу гъэпсыгъэх. Зэнэкъокъум хэлэжьагъэхэм зыгорэкIэ десэ егъэджэнхэр шъуищыкIагъэмэ, лъэпкъ IэшIагъэхэм язэгъэшIэн лъы­жъугъэкIуатэ шъушIоигъомэ, зэрытлъэкIэу тишIуагъэ къышъодгъэкIыщт. КъэкIощт илъэсхэм шъуиIэшIагъэу зэнэкъокъум къешъухьылIэщтхэм якъэбар кIэкI къытфэшъуIотэнэу тыкъыкIэлъэIущт, — къы­Iуагъ Кушъу Светланэ.
— IэпэIасэхэм я Ассоциациеу рес­пуб­ликэм щызэхэщагъэм изэнэкъокъу ишIуа­гъэкIэ тауж къикIыщт IэпэIасэхэр тэгъасэх. Шапхъэхэм адиштэу IэпэIэсэ ныбжьыкIэхэм джэгуалъэхэр агъэпсыгъэх. Анахь дахэу, гъэшIэгъонэу шIыгъэ­хэр къыхэтхыгъэх. ТекIоныгъэ къыдэзы­хыгъэхэм шIухьафтынхэр афэдгъэхьазырыгъ. Илъэс къэс тизэнэкъокъу нахь цIыфыбэ зэрэхэлажьэрэм лъэшэу те­гъэгушIо, — къыIуагъ осэшI купым хэтэу Джарымэкъо Зурет.
Шъолъыр зэнэкъокъоу «Лъэпкъ шIыкIэм диштэрэ илъэсыкIэ джэгуалъэхэр» зыфиIорэм текIоныгъэ къыщыдэзыхыгъэ нэбгыри 10-мэ Ассоциацием идипломхэр ыкIи ишIухьафтынхэр аратыгъэх. Анахь джэголъэ дахэхэр Правительствэм и Унэ чIэт пцIыикъым палъагъэх.

— ИскусствэмкIэ кIэлэцIыкIу еджапIэу къуаджэу Гъобэкъуае дэтым ты­къикIыгъ. Илъэси 6 хъугъэу мы зэнэкъо­къум тыхэлажьэ ыкIи хагъэунэфыкIырэ чIыпIэхэр къэтэхьых. Мыгъэ Шэуджэн Самирэ иIэшIагъэ Iофтхьабзэм хэдгъэлэжьагъ. Тыгъэм фигъэдэгъэ тхыпхъэр ащ хидыкIыгъ, — къыIуагъ кIэлэегъа­джэу СтIашъу Заремэ.
— Джэгуалъэу згъэхьазэрыгъэм зы бгъумкIэ Хьабэхъухэм тилъэпкъ тамыгъэ дышъэ IуданэкIэ хэсыдыкIыгъ. АдрэмкIэ дунаим имамырныгъэ гъогу къытфызэIузы­хырэ тхыпхъэр хэсшIыхьагъ, — къы­Iуагъ Мыекъуапэ щыпсэурэ Хьабэхъу Бэлэ.
— Теуцожь Фатимэ кIэщакIо зыфэ­хъугъэ зэнэкъокъур я 6-рэу зэхэтщагъ. Илъэс къэс дгъэшIэгъон икъун IэшIа­гъэ­хэр къырахьылIэх. Ахъыгъэ джэгуалъэхэр мыгъэ нахь тыгу рихьыгъэх. Лъэпкъ шэн-хабзэхэр, Iэпэщысэхэр адыгэ культурэм ибаиныгъ. Мы IэшIагъэхэр пIуныгъэм изы лъэныкъу, лъэпкъ шэн-хабзэ­хэм дахэу уязыщэлIэрэ лъагъохэм ащыщ, — къыIуагъ АР-м культурэмкIэ и Ми­нистерствэ иотдел ипащэу Теуцожь Нурет.
ИлъэсыкIэр хьалэмэтхэм яуахът, IэпэIэсэ ныбжьыкIэхэм яджэгуалъэхэр пцIыикъым палъхьэхэ зэхъум агу раубытагъэхэр къадэхъунхэм тыщыгугъыщт. Ахэм шIухьафтын лъапIэу къафагъэшъошагъэхэр нэпэеплъ гукъэ­кIы­жьэу яIэщтых.
Лъэпшъыкъо Фатим.