Егъэджэ программэу «ИнноВектор» зыцIэм иящэнэрэ едзы­гъо ичIэтIупщыгъо мэфэкI шIыкIэм тетэу Мыекъопэ къэ­ралыгъо технологическэ университетым щыкIуагъ.

Мыщ егъэджэнхэр щызыкIугъэхэу, сэнаущыгъэ зыхэлъ ыкIи гукъэкIыбэ зиIэ студентхэр къырагъэблэгъагъэх.
Зэхахьэм хэлажьэхэрэм шIуфэс пса­лъэ­кIэ закъыфагъэзагъ егъэджэн Iоф­шIэнымкIэ апшъэрэ еджапIэм ипроректорэу Людмила Задорожнаям ыкIи рек­торатым иупчIэжьэгъоу Сергей Чефрановым. Программэу «ИнноВекторым» предпринимательствэм ыкIи студентхэм ястартапхэм адегъэштэгъэнымкIэ мэхьанэ­шхо зэриIэр ахэм къыхагъэщыгъ.
Акселераторым хэхъоныгъэхэр зэрэрагъэшIыщт федеральнэ грантыр 2024-рэ илъэсым университетым къыхьыгъ ыкIи сомэ миллиони 6,4-рэ къыратыгъ. Ащ ишIуагъэкIэ программэм зырагъэу­шъомбгъугъэ къодыеп, къэралыгъом иэксперт пэрытхэр ыкIи итрекерхэр къырагъэблэгъэнхэ алъэкIыгъ. Ящэнэрэ едзыгъом нэбгырэ 1200-м ехъу хэлэ­жьагъ, ахэм ащыщэу 500-р университетым иIофышIэх ыкIи истудентых.
Ящэнэрэ едзыгъом къыщаIэтыгъэ Iо­фыгъохэр непэрэ мафэм къыздихьырэ шIыкIагъэу биотехнологиехэмкIэ ыкIи гъо­мылэпхъэ технологиехэмкIэ щыIэхэр, тыкъэзыуцухьэрэ дунаим иэкологие ыкIи ар уплъэкIугъэным афытегъэпсыхьагъэ­хэр, инженернэ ыкIи бизнес екIолIакIэу къоджэ псэупIэхэм апае къаугупшысыгъэхэр, нэмыкIхэри.
Студентхэмрэ ныбжьыкIэхэмрэ ягу­къэкIхэр агъэцэкIэнхэ алъэкIыныр, ахэр щыIэныгъэм щыпхыращыжьынхэр, непэрэ инновационнэ технологиехэр къызфа­гъэ­федэнхэр ары «ИнноВекторым» ипшъэрылъ шъхьаIэр. Ящэнэрэ едзы­гъом игъэсэныгъэ программэ къыдыхэлъытагъэу лъэныкъо зэфэшъхьафхэмкIэ Iоф­тхьэбзэ 36-рэ рагъэкIокIыгъ.
Ящэнэрэ едзыгъом хэлэжьэгъэ ныб­жьы­кIэхэм ягухэлъхэр къызэрэраIотыкIы­гъэм имызакъоу, зэнэкъокъу ыкIи грант программэхэм ахэлэжьэнхэ амал яIэщт.
Мыекъопэ къэралыгъо технологическэ университетыр Адыгэ Республикэм ит хъызмэтшIапIэмэ ыкIи организациемэ ча­нэу адэлажьэ. Программэм елъытыгъэу зэпхыныгъэ адыриI АР-м экономикэ хэхъоныгъэмкIэ ыкIи сатыумкIэ, мэкъу-­мэщымкIэ министерствэхэм, республикэ бизнес-инкубаторым, предпринимательствэм дэIэпыIэгъэнымкIэ Гупчэм, Урысые общественнэ организациеу «Опора России» зыфиIорэм ыкIи нэмыкI компание, научнэ учреждение пчъагъэхэм.
МэфэкI зэхахьэм къыдыхэлъытагъэу «ИнноВектор» зыфиIорэ экспертнэ советым хэтхэм бгъэхалъхьэхэр аратыжьыгъэх. Нэужым студентхэм къэгъэлъэ­гъон зэфэшъхьафхэр, къашъохэр къашIыгъэх, орэдхэр къаIуагъэх.
Мыекъопэ къэралыгъо
технологическэ университетым ипресс-къулыкъу.