«Адыгэ макъэр» илъэси 100-м къехъугъэу мэлажьэ. Лъэпкъ гъэзетым фэшъыпкъэ унагъохэм тагъэгушхо. Пэрыохъу зэфэмыхъужьынхэм пае гъэзетитIу къизытхыкIырэ зэшъхьэгъусэхэу Къэбыхьаблэ щыпсэухэрэм адэжь теблэгъагъ.

Илъэс 50 хъугъэу зэдэпсэухэрэ Цэй Къэплъанрэ Любэрэ афэгъэхьыгъэу къэстхын мурад сиIэу яунагъо себлэгъагъ. ЗэдэгущыIэгъу гъэшIэгъон тиIагъэу бысымхэм сыкъагъэкIотэжьызэ Къэплъан къы­Iуагъ: «Фатим, некIо тихьакIэщ къе­благъ, гъэшIэгъон горэ озгъэ­лъэгъущт!». Унэм пышIыкIыгъэ хьа­кIэщэу сызэрыхьагъэм щыслъэ­гъугъэр згъэшIэгъон икъугъ. Iэнэ кIы­хьэу нэбгырэ 12 зыпыфэрэм ыкIылъэныкъо «Адыгэ макъэр» дахэу зэгъэзэфагъэу телъыгъ. Гъэ­зетым ихъарзынэщэу ыугъоигъэм икъэбар сыкIэупчIагъ.
— Адыгеим хэхъоныгъэ ышIыным, ыпэкIэ лъыкIотэным, тилъэпкъ итарихъ къэухъумэгъэным мыпшъыжьэу лъэпкъ гъэзетыр дэлажьэ. 1979-рэ илъэсым къыщыублагъэу мыщ къи­хьэрэ къэбархэм тиунагъокIэ тяджэу тесагъ. Адыгеим и ЛIышъхьэ иунашъохэм, егъашIэм сызщылэ­жьэгъэ мэкъу-мэщ хъызмэтым, цIыф цIэрыIохэм ягъэхъагъэхэр зэкIэ тшIогъэшIэгъон. Сишъхьэгъуси, си­кIали, сипшъашъи, синыси, сипхъо­рэлъфитIуи кIэлэегъаджэх. Гъэсэныгъэм гъэхъэгъэшIухэр щызы­шIы­хэрэр тиунагъо исхэм ящысэтехыпIэх, — къыIотагъ Къэплъан.
Цэймэ яхъарзынэщ анахьыжъ гъэзетэу къыхэкIыгъэр 1979-рэ илъэ­сым къыдэкIыгъэр ары. Джащ дэжьым къызгурыIуагъ сигущыIэгъу илъэпкъ шъыпкъэныгъэу ыкIи шIулъэ­гъуныгъэу фыриIэр зэрыгъу­нэнчъэр.
— АдыгабзэкIэ тхыгъэ гъэзет закъоу къыдэкIырэр унагъо пэпчъ ихьанэу сыкъыфэджэ. Тэ тыбзэ непэ къэтымыгъэгъунэмэ, нэмыкI лъэпкъхэм къытфызэтырагъэнэщтэп. Лъэпкъыр зэрыгушхорэ «Адыгэ макъэр» адыгэмэ ящыкIагъ. ТиныбжьыкIэхэр ащ еджэнхэм фэшI унагъом ис нахьыжъхэм щысэ къа­гъэлъэгъон фае. ЗэшъхьэгъуситIум зы гъэзетыр зэIэпытхэу теджэти, экземпляритIу къистхыкIыгъ, — хигъэунэфыкIыгъ Цэй Къэплъан.
Къэплъан игущыIэхэм гъогум бэрэ сащегупшысагъ ыкIи ахэм ямэхьанэ зыхэсшIагъ. ЛIы Iушым зэфэхьысыжьэу сигъэшIы­гъэр лъэп­къым ыгурэ ыпсэрэ фэщэгъэ цIыф­хэр теIэфэхэ, адыгэм ымакъэ зэ­рэмыкIодыщтыр ары.
Лъэпкъ гъэзетым непэ пшъэрылъ шъхьаIэу ыгъэцакIэрэр — ныдэлъфыбзэм икъэухъумэн. Бзэр щыIэмэ, лъэпкъыри, ишэн-хабзэхэри, инэшанэхэу адырэ пстэумэ ахэзыу­шъхьафыкIхэрэри къызэтенэщтых. ТыбзэкIэ къыдэкIырэ гъэзет закъор «Адыгэ макъэр» ары. Ар тимыIэжь хъумэ тизэхашIэ кIодыщт, нэмыкI лъэпкъхэм тахэкIокIэжьыщт.