«Зыныбжь имыкъугъэхэм алъэныкъокIэ бзэджэшIагъэу зэрахьэхэрэр къычIэгъэщыгъэнхэр ыкIи пэшIорыгъэшъ Iофтхьабзэхэр зэхэщэгъэнхэр зыцIэ Iэнэ хъурае АР-м и Прокуратурэ щыкIуагъ.
Ащ пэщэныгъэ дызэрихьагъ АР-м ипрокурор игуадзэу Бэрэтэрэ Аслъан.

Iофтхьабзэр къызэIуихызэ ащ къызэриIуагъэмкIэ, мы илъэсым имэзэ 11-у пыкIыгъэм зыныбжь имыкъугъэхэм бзэджэшIагъэу зэрахьагъэм ипчъагъэ процент 33,8-рэ хэхъуагъ, бзэджэшIэгъэ хьылъэхэм ыкIи хьылъэ дэдэхэм, наркотикхэр хэбзэнчъэу къызэрэрагъэкIокIырэм епхыгъэ бзэджэшIагъэхэм япчъагъэ нахьыбэ хъугъэ.
Зыныбжь имыкъугъэхэм ыкIи ныбжьыкIэхэм яхэбзэ фитыныгъэхэм ягъэцэкIэнкIэ ыкIи ялъыплъэнкIэ АР-м ипрокурор истаршэ IэпыIэгъоу Елена Алексейцевам къэзэрэугъоигъэхэм анаIэ тыраригъэдзагъ социальнэу чIыпIэ къин ит кIэлэцIыкIухэм IэпыIэгъу афэхъугъэн­хэмкIэ зэхэубытэгъэ пэшIорыгъэшъ Iоф­тхьабзэхэр зэрахьанхэ зэрэфаем. Мыхэм япхыгъэ уполномоченнэ къулыкъухэм яIофшIэн бэкIэ елъытыгъ зэгурыIоныгъэ зэрымылъ унагъохэр нахь псынкIэу къыхагъэщынхэ зэралъэкIыщтым.
— Анахьэу зыныбжь имыкъугъэхэм бзэджэшIагъэхэр зэрахьэнхэм лъапсэ фэхъурэр янэ-ятэхэр ыкIи хабзэм илIыкIохэр икъоу ахэм зэралъымыплъэхэрэр, хэбзэукъоныгъэ зезыхьэгъэ Iэтахъохэм зыщалъыплъэхэрэ учреждениехэм ыкIи къулыкъухэм икъоу пэшIорыгъэшъ Iоф­шIэнхэр зэращызэхамыщэхэрэр ары. АщкIэ пстэуми яIофшIэн агъэлъэшын фае, — къыIуагъ старшэ прокурорым.
Мы Iофыгъом фэгъэхьыгъэу къэгущыIагъэх уполномоченнэ къулыкъухэм ыкIи учреждениехэм ялIыкIохэр. Анахьэу унаIэ зытебгъэтын фэе лъэныкъохэр къагъэнэфагъэх.