Адыгеим и ЛIышъхьэу КъумпIыл Муратрэ Росавтодорым ипащэу Роман Новиковымрэ псэупIэу Инэм дэжь щагъэпсыщт транспорт зэхэкIыпIэм ишIын зыщыкIощт чIыпIэм щыIагъэх.

АР-м иминистрэхэм я Кабинет и Тхьаматэ игуадзэу Хъоткъо Хъызыр, Тэхъутэмыкъое районым ипащэу Шъэо Аскэр, Инэм ыкIи Яблоновскэ къэлэ псэупIэхэм япащэхэр ащ щыIагъэх. ПIэ­лъэ гъэнэфагъэм телъытэгъэщт псэо­лъэшI къэлэ цIыкIум изэтегъэпсыхьан макIо.
Федеральнэ гъогоу А-146 «Краснодар – Верхнебаканский» зыфиIорэм изэтегъэпсыхьан изаказчикыр федеральнэ къэралыгъо учреждениеу Упрдор «Черноморье» зыфиIорэр ары, Iахьзэхэлъ обществэу «Хотьковский автомост» зыцIэр подрядчик. 2026-рэ илъэсым ыкIэм ехъулIэу а псэолъэшIынэу рагъэ­жьагъэр аухынэу мэгугъэх.
«Гъогоу А-280-м илъэныкъохэм ащыщэу атIупщыгъэм изы Iахьэу хъущт джы зэтырагъэпсыхьащтыр. Ащ амал къытыщт хьылъэхэр зещэгъэнхэмкIи, Адыгеимрэ Краснодар краимрэ япсэупIэхэм ятранспорт зэпхыныгъи фэIорышIэщт», — къыхигъэщыгъ Росавтодорым ипащэу Роман Новиковым.

«Черноморьем» ипащэу Виктор Вовк къызэриIуагъэмкIэ, гъогу зэхэкIыпIэм ипроект къыделъытэ искусственнэ псэолъитф шIыгъэныр. Ащ илъэныкъо шъхьа­IэхэмкIэ транспортым зы сыхьатым километри 120-рэ ыкIун ылъэкIыщт, ехыпIэ чIыпIэхэм — сыхьатым километ­рэ 80-м къыригъэхъунэу щытэп.
Тыкъэзыуцухьэрэ дунаим зэрар рамыхыным пае ощхыпс рыкIуапIэхэр, укъэбзалъэхэр ыкIи нэмыкIхэр ашIыщтых.

«КIэу ашIыщт гъогу зэхэкIыпIэм тиреспубликэкIэ мэхьанэшхо иI. Транспортыр псынкIэу, щынэгъончъэу зэрэзекIощтым имызакъоу, республикэмрэ краимрэ адэт псэупIэхэми адэсхэр нахь псынкIэу зэлъыIэсынхэ алъэкIыщт. Промышленнэ паркыкIэу «Инэм» зыфиIорэм Адыгеим иэкономикэ ихэхъоныгъэкIэ мэхьанэшхо зэриIэм укъыпкъырыкIын хъумэ, а псэолъэшIыныр гугъэпIабэ зэтпхырэ Iофэу щыт», — къыIуагъ КъумпIыл Мурат.
КъумпIыл Муратрэ Роман Новиковымрэ проект документацием нэIуасэ зыфашIыгъ, зэрэзэдэлэжьэщтхэмкIэ, IофшIэнхэр зэрэкIощтхэм фэгъэхьыгъэ IофыгъохэмкIэ, республикэм инэмыкI псэолъэшI организациехэр ащ къыхэлэжьэнхэм ыкIи нэмыкIхэм япхыгъэхэм атегущыIагъэх.