КIэлэцIыкIухэмрэ ныбжьыкIэхэмрэ я Урысые общественнэ-къэралыгъо зэхахьэу «Движение Первых» зыфиIорэм дэлэжьэгъэнымкIэ Координационнэ советэу АР-м и ЛIышъхьэ дэжь щызэхэщагъэм изэхэсыгъо КъумпIыл Мурат хэлэжьагъ.

2024-рэ илъэсым организацием ишъолъыр къутамэ Iофэу ышIагъэр мыщ щызэфахьысыжьыгъ.
Адыгеим и ЛIышъхьэ хигъэунэфы­кIыгъ республикэм иныбжьыкIэ организациехэм обществэм изегъэушъомбгъун яIахь зэрэхашIыхьэрэр. Политическэ хъугъэ-­шIэгъэшхом – УФ-м и Президент ихэ­­дзын — ныбжьыкIэхэр чанэу зэрэхэлэжьагъэхэр шъхьафэу пащэм къыхигъэ­щыгъ, джащ фэдэу Хэгъэгум иухъумакIохэм, ахэм яунагъохэм IэпыIэгъу ягъэгъотыгъэнымкIэ, унагъом и Илъэс къыдыхэлъытэгъэ пшъэрылъхэм ягъэцэкIэнкIэ волонтерхэм Iофышхо зэрашIагъэр хигъэунэфыкIыгъ.
«ТикIалэхэмрэ типшъашъэхэмрэ Хэгъэгум къырыкIощтым зэригъэгумэкIыхэрэр, тиреспубликэ гупси, хэгъэгуми къащыхъурэ хъугъэ-шIагъэхэм яIахь хашIыхьэ зэрашIоигъор лъэшэу тигуап. Ащ етIани къыушыхьатырэр дунаим къыщыхъухэрэм, шъолъырхэм афэхъурэ зэхъокIыныгъэхэм ныбжьыкIэхэм гу зэралъатэрэр, ти Президентэу Владимир Путиным къыгъэуцугъэ пшъэрылъхэр цIыфхэм ящыIэкIэ-псэукIэ зыкъегъэIэтыгъэным зэрэтегъэпсыхьагъэхэр пIэлъэ кIыхьэм телъытагъэу хэгъэгум хэхъоныгъэ езыгъэшIыщт лъэпсэ пытэ зэхэщэгъэным, хэгъэгуми, ныбжьыкIэхэми янеущрэ мафэ зыпкъ итыным иамал ахэм къызэратыщтыр къазэрагурыIорэр ары», — къыIуагъ КъумпIыл Мурат.
Волонтерхэм япчъагъэ республикэм щыхэхъо. Джыдэдэм нэбгырэ мин 56-рэ фэдиз ахэр мэхъу, азыныкъо нахьыбэр ныбжьыкI. Мы илъэсым игъэтхапэ иуб­лэгъу федеральнэ чIыпIэу «Сириусым» ныбжьыкIи 135-рэ ыкIи волонтер 15-рэ Адыгеим ыцIэкIэ ныбжьыкIэхэм я Дунэе фестиваль хэлэжьагъэх. НыбжьыкIэ сэнаущхэм язэхахьэу «Фыщт», респуб­ликэ форумэу «Адыгеим иныбжьыкIэхэр» зыфиIоу гъэрекIо зэхащагъэм къахэлажьэхэрэм ахэхъо. Адыгеим истудентхэм яассоциацие чIыпIэрысхэм анэмыкIэу, республикэм щыщхэу Москва, Санкт-Петербург, Краснодар, Рос­тов-на-Дону, Саратов яапшъэрэ еджапIэхэм ащеджэхэрэри хэхьэх.
КъумпIыл Мурат къызэрэхигъэщыгъэм­кIэ, сэнаущыгъэ зыхэлъ кIэлэцIыкIухэмрэ ныбжьыкIэхэмрэ IэпыIэгъу афэхъугъэнымкIэ Iофышхо зэшIуахы, еджэным имызакъоу, сэнэхьат зэфэшъхьафхэм ахэм закъыщагъотынымкIи амалхэр зэрахьэх. Платформэу «Урысыер – амалхэм яхэгъэгу», проектхэу «Урысыем ипэрытхэр», «КIэлэцIыкIу пэпчъ игъэхъагъ» зыфиIохэрэр, ныбжьыкIэ предпринимательствэм изегъэушъомбгъункIэ лъэпкъ проектыр ащкIэ къызфагъэфедэх.
АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловым зэрэхигъэунэфыкIыгъэмкIэ, «Движение Первых» зыфиIорэм ипроект пае сомэ миллиони 5 республикэ бюджетым мыгъэ къыхагъэкIыгъ. АР-м и ЛIышъхьэ пшъэрылъ зэрафишIыгъэм тетэу «Движение Первых» иIофтхьабзэхэм фэдищкIэ нахьыбэу мылъку къафыхагъэкIыщт: 2025-рэ илъэсым а гухэлъым пае республикэ бюджетым сомэ миллион 17 фэдиз къыщыдалъытагъ.
ПстэумкIи мы илъэсым ныбжьыкIэ политикэм игъэцэкIэн пае сомэ миллиони 130-м ехъу къыхагъэкIыгъагъ. Шъо­лъыр гупчэу «Адыгеим иныбжьыкIэхэр» зыфиIорэр зычIэтыщт унэр зэрагъэ­кIэжьыгъэр ащ къыхэкIыгъ. Псауныгъэр зыщагъэпытэрэ лагерьщтыгъэу «Зэкъо­шныгъэм» ныбжьыкIэ форумхэмрэ гъэсэныгъэ программэхэмрэ ателъытэгъэ глэмпинг къыщызэIуахыщт. «Движение Первых» ишъолъыр къутамэ зычIэтыщт унэм игъэкIэжьыни мыгъэ фежьагъэх. Республикэм имуниципалитет пстэуми ащ фэдэ организациехэр ащызэхэща­гъэх.
«Движение Первых» ишъолъыр къутамэ и Совет итхьаматэу Ованес Шекерьянц 2024-рэ илъэсым республикэ къутамэм Iофэу ышIагъэр зэфихьысыжьыгъ, кIэлэцIыкIухэмрэ ныбжьыкIэхэмрэ я Урысые общественнэ-къэралыгъо зэхахьэ ишъолъыр къутамэ хабзэм ифедеральнэ, иреспубликэ къу­лыкъухэм зэпхыныгъэу адыриIэми къытегущыIагъ. Организацием нэбгырэ 2600-рэ тапэкIэ хахьэщтыгъэмэ, нэбгырэ мин 30-м зэрэнэсыгъэр, «Движение Первых» ипэублэ къутэми 174-рэ щыIэ зэрэхъугъэр Советым итхьаматэ къы­Iуагъ.
Адыгеим и ЛIышъхьэ тапэкIэ организацием Iоф зыдишIэщт лъэныкъохэр къыгъэнэфагъэх. Патриотическэ пIуныгъэм, шэн-хабзэу щыIэхэм ныбжьыкIэхэр адэмыхынхэм ыкIи нэмыкIхэм ар афэгъэхьыгъ. УФ-м и Президент кIэщакIо зыфэхъугъэ лъэпкъ проектыкIэхэм яшIуагъэкIэ къихьащт илъэсым организацием нахь лъэныкъуабэ къызэлъиубытыщт. «Движение Первых» ишъолъыр къутамэ игъо фалъэгъугъ лъэпкъ проектхэу «НыбжьыкIэхэмрэ кIэлэцIыкIухэ­мрэ», «Кадрэхэр» зыфиIохэрэм ягъэцэкIэн хэлэжьэнэу. АР-м и ЛIышъхьэ джащ фэдэу министерствэхэмрэ чIыпIэхэм япащэхэмрэ пшъэрылъ афи­шIыгъ ныбжьыкIэхэм ягукъэкIхэм къадырагъэ­штэнэу ыкIи гъэпсын Iофхэм ахэр къахагъэлэжьэнхэу.
АР-м и ЛIышъхьэ ипресс-къулыкъу къытырэ
къэбархэмкIэ ЛIышэ Саныет