АдыгабзэмкIэ Советэу АР-м и ЛIышъхьэ дэжь щызэхэщагъэм изэ­хэсыгъо адыгабзэм изэгъэшIэн тегъэ­псыхьэгъэ проектыр кIэлэцIыкIу IыгъыпIэхэм зэращагъэцакIэрэм, культурэмкIэ учреждениехэм, общественнэ движениеу «Адыгэ Хасэм» ныдэлъ­фыбзэм икъэухъумэнкIэ Iофэу ашIэрэм, нэмыкI Iофыгъохэми щатегущыIагъэх.

Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м иминистрэхэм я Кабинет и Тхьаматэу КIэрэщэ Анзаур Iофтхьабзэр зэрищагъ.
Зэхэсыгъом хэлэжьагъэх АР-м иминистрэхэм я Кабинет и Тхьаматэ игуа­дзэу, финансхэмкIэ иминистрэу Виктор Орловыр, гуманитар ушэтынхэмкIэ Адыгэ республикэ институтэу Т. КIэращэм ыцIэкIэ щытым, адыгабзэм изэгъэ­шIэнкIэ ыкIи икъэухъумэнкIэ лъэныкъо пстэури къызыщыдэлъытэгъэ екIолIакIэ къыхэзыхырэ Проектнэ офисым япащэу ЛIыIужъу Адам, АР-м гъэсэныгъэмкIэ, культурэмкIэ иминистерствэхэм, Адыгэ къэралыгъо университетым, кIэлэегъаджэхэм яIэпэIэсэныгъэ зыщыхагъэ­хъорэ Адыгэ республикэ институтым, республикэ гимназием, общественнэ зэхахьэу «Адыгэ Хасэм», кIэлэегъэджэ колледжэу Андырхъое Хъусен ыцIэ зыхьырэм, къэбарлъыгъэIэс амалхэм, муниципальнэ кIэлэцIыкIу IыгъыпIэхэу адыгабзэр зыщарагъашIэхэрэм япащэхэмрэ ялIыкIохэмрэ.
АР-м иминистрэхэм я Кабинет и Тхьаматэ къыхигъэщыгъ лъэпкъыбзэм хэхъоныгъэ егъэшIыгъэнымкIэ мы аужырэ илъэсхэм Iофэу ашIэрэр зэрагъэлъэ­шыгъэр.
Ныдэлъфыбзэу ыкIи Адыгеим икъэралыгъуабзэу щыт адыгабзэр зэрагъэшIэнэу ежьхэм яшIоигъоныгъэкIэ кIэлэцIыкIухэми, ахэм янэ-ятэхэми къызэрэхахыгъэр Iофэу зэдагъэцакIэрэм къыкIэкIуагъэу АР-м и ЛIышъхьэу КъумпIыл Мурат зэрилъытэрэр КIэрэщэ Анзаур хигъэунэфыкIыгъ.
«Ащ елъытыгъэу еджапIэхэми, кIэлэцIыкIу IыгъыпIэхэми ащезыгъэджэщтхэм ягъэхьазырынкIэ Iофхэр нахьышIоу зэхэщэгъэн фае. МыщкIэ мэхьанэшхо зиIэр кIэлэегъаджэхэм яIэпэIэсэныгъэ зыщыхагъэхъорэ институтым, кIэлэегъэ­джэ колледжым, Проектнэ офисыр зыщызэхэщэгъэ АРИГИ-м, нэмыкI къулыкъухэм зэдэлэжьэныгъэ зэдыряIэныр ары», — къыIуагъ КIэращэм.
АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусаннэ ныдэлъфыбзэр зэрэзэрагъэшIэрэ проектыр кIэлэцIыкIу IыгъыпIэхэм зэращагъэцакIэрэм къытегущыIагъ. Непэ ехъулIэу кIэлэцIыкIу IыгъыпIэ 51-мэ адыгабзэр ащызэрагъашIэ. Ащ щыщэу 32-мэ — Проектнэ офисым ипрограммэ къыдыхэлъытагъэу. Ахэм ящыкIэгъэ зэрырагъэджэрэ тхылъхэр аIэкIагъэхьагъэх. ЕджапIэхэми мыщкIэ IофшIэн гъэнэфагъэ ащызэрахьэ. Мы аужырэ илъэсищым адыгабзэр зэзыгъэшIэрэ кIэлэеджакIохэм процент 16,5-рэ къахэ­хъуагъ, пстэумкIи процент 60 фэдиз ар хъугъэ. НэмыкIэу къэпIон хъумэ, ­лъэпкъ зэфэшъхьафхэм къахэкIыгъэ кIэлэцIыкIу мин 36,3-м ехъумэ адыгабзэмрэ литературэмрэ зэрагъашIэ. КIэлэцIыкIу IыгъыпIэу N 28-у «Нэбзый» зыфиIорэм ипащэу Гъыщ Сусанэ мы лъэныкъомкIэ IофшIакIэу яIэм ыкIи кIэлэцIыкIухэм гъэхъагъэу ашIыгъэхэм къатегущыIагъ. Мы кIэлэцIыкIу IыгъыпIэм адыгэхэм яжэрыIо народнэ творчествэ, кушъэхап­хэм, усэхэм, гущыIэжъхэм, адыгэ шэн-хабзэхэм, лъэпкъ джэгукIэхэм ыкIи нэмыкIхэм нэIуасэ кIэлэцIыкIухэр щафашIых. Сабыйхэм адыгабзэр аIулъ хъунымкIэ ищыкIэгъэ амалхэр щызэрахьэх.
АР-м культурэмкIэ иминистрэ игуа­дзэу Кушъу Светланэ культурэмкIэ учреждениехэм мы лъэныкъомкIэ Iофэу ашIэрэм къытегущыIагъ. Ащ зэрэхигъэ­у­нэфыкIыгъэмкIэ, АР-м культурэмкIэ и Министерствэ нэбгырэ мин 60 фэдиз зыхэлэжьэрэ Iофтхьэбзэ 700-м ехъу илъэс къэс зэхещэ. Театральнэ, концерт зэхахьэхэм адыгабзэкIэ спектаклэхэр агъэуцух, сценэм утет зыхъукIэ узэрыгущыIэщт шIыкIэм кIэлэцIыкIухэр фагъа­сэх, концертхэр зэхащэх. ИскусствэхэмкIэ еджапIэхэм предметэу «Адыгэ художественнэ культурэр» зыфиIорэр ащарагъэхьы. ТхылъеджапIэхэм, музейхэм, культурэм иунэхэм адыгэ тхакIохэмрэ композиторхэмрэ афэгъэ­хьыгъэ Iофтхьабзэхэр, Iэнэ хъураехэр, пчыхьэзэхахьэхэр, зэнэкъокъухэр ыкIи нэмыкIхэр ащырагъэкIокIых.
Адыгэ Хасэм итхьаматэу ЛIымыщэкъо Рэмэзан гъэсэныгъэмрэ культурэмрэ яIофыгъохэм афэгъэзэгъэ министерствэхэм, гуманитар ушэтынхэмкIэ Адыгэ республикэ институтым, кIэлэцIыкIу театральнэ купхэм ыкIи ансамблэхэм зэдэлэжьэныгъэ дэгъу зэрадыряIэр къы­хигъэщыгъ, IэкIыб къэралыгъохэм арыс адыгэхэми зэпхыныгъэу адыряIэм къытегущыIагъ.
Зэхэсыгъом хэлажьэхэрэм къыхагъэщыгъ адыгабзэмкIэ зэрэрагъаджэхэрэр, ныбжьыкIэ кадрэхэм ягъэхьазырын нахьышIу шIыгъэн, зэреджэщтхэ тхылъыкIэхэр нахьыбэу къыдэгъэкIыгъэнхэ, ныдэлъфыбзэр, лъэпкъ культурэр зыщызэрагъэшIэщт кружокхэр зэхэщэгъэнхэ, адыгабзэр зылъэпсэ журналистикэм зегъэушъомбгъугъэн, ныдэлъфыбзэр языгъэ­хьырэ кIэлэегъаджэхэм IэпыIэгъу ягъэгъо­тыгъэн зэрэфаер. Ныдэлъфыбзэм изэгъэ­шIэнкIэ IэкIыб къэралыгъохэм арыс адыгэхэм IэпыIэгъу афэхъугъэным мэхьанэшхо зэриIэр зэIукIэгъум къыщыхагъэщыгъ. Адыгабзэмрэ литературэмрэ хэхъоныгъэ ягъэшIыгъэнымкIэ лъэныкъо пстэури, ны-тыхэри ахэм зэрахэтхэу, зэпхыгъэнхэ зэрэфаер АР-м иминистрэхэм я Кабинет ипащэ хигъэунэфыкIыгъ.