ГандболымкIэ Урысыем и Суперлигэ хэт «АГУ-Адыифыр» зэнэкъокъум апэрэ чIыпIэр щызыIыгъ «Ростов-Доным» дешIагъ. ХьакIэхэр хэпшIыкIэу нахь лъэшыгъэх, текIоныгъэр къыдахыгъ

«АГУ-Адыиф» — «Рос­тов-Дон» — 19:39 (7:21)
«АГУ-Адыифым» хэтыгъэх: къэлэпчъэIутхэр — Гобадзе, Бас­каковар. Суздальцевар — 3, Краснокутскаяр — 3, Къэбжьыр – 2, Коблыр – 2, Тишинар – 2, Бондаренкэр — 2, Селиверстовар – 1, Алексеевар — 1, Смирновар — 1, Кавера — 1, Пономаревар — 1.
«Ростов-Доным» щешIагъэх: къэлэпчъэIутхэр — Лагинар, Грацкевич, Казьменкэр. Зеленковар — 11, Левша — 6, Шавман — 5, Макеевар — 4, Кожакарь — 3, Сень — 3, Фроловар — 2, Таженовар — 2, Бабенкэр — 2, Шапошниковар — 1.
ЗэкIэлъыкIоу командэ лъэшитIумэ уадешIэныр псынкIэп. Мэфэ заулэкIэ узэкIэIэбэжьмэ, «ЦСКА-р» тихьэкIагъ. Ащ ыуж чемпионатым пэрытныгъэ щызыIыгъ «Ростов-Доныр» респуб­ликэм къеблэгъагъ. Апэрэ такъи­къ­хэм къащегъэжьагъэу хьакIэхэр нахь лъэшыгъэх, бэ къадэхъугъэр. Ухъумэныр дэгъоу зэрэзэхащагъэм къыхэкIэу, «АГУ-Адыифым» иешIэкIо анахь дэгъухэу Кобл Зуретрэ Елизавета Суздальцевамрэ къэлапчъэм Iэгуаор да­дзэныр къафэкъиныгъ. Апэрэ таймыр 7:21-у аухыгъ. ЯтIонэрэм тикомандэ нахь лъэшэу ешIагъ, анахь къэхэщыгъ тикъэлэпчъэ­Iутэу Тамара Гобадзе. Ар ­«АГУ-Адыифым» иешIэкIо анахь дэгъоу къыхахыгъ, олимпийскэ чемпионкэу Виктория Калининам шIухьафтыныр къыритыжьыгъ.

Я 16-рэ турым изэфэхьысыжьхэр:
«Лада» — «Кубань» — 23:25, «Астраханочка» — «Динамо-Синара» — 29:22, «АГУ-Адыиф» — «Ростов-Дон» — 19:39, «Черноморочка» — «ЦСКА» — 27:25, «Луч» — «Университет» — 39:20.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 32.
2. «Черноморочка» — 26.
3. «ЦСКА» — 24.
4. «Астраханочка» — 24.
5. «Кубань» — 17.
6. «Лада» — 15.
7. «Динамо-Синара» — 13.
8. «Звезда» — 9.
9. «Луч» — 8.
10. «АГУ-Адыиф» — 2.
11. «Университет» — 0.
    КъыкIэлъыкIощт зэIукIэгъур «АГУ-Адыифым» Мыекъуапэ щыриIэщт, къихьащт илъэсым щылэ мазэм и 11-м командэу «Кубань» тихьакIэщт.