Теннис цIыкIумкIэ кIэлэцIыкIухэм гъэхъэгъэшIухэр языгъэшIырэ Ешыгоо Мухътар «Урысые Федерацием просвещениемкIэ иотличник» зыфиIорэ щытхъуцIэр ыкIи щытхъу тамыгъэ къыфагъэ­шъошагъ.

Мухътар Адыгэкъалэ дэт спорт еджапIэм илъэс пчъагъэ хъугъэу Iоф щешIэ, гъэхъэгъэшIухэр ышIыхэзэ сабыйхэм Iоф адешIэ. ИцIыкIугъом къыще­гъэжьагъэу спортыр шIу ылъэгъоу, физкультурэр анахь ыгу рихьырэ урокхэм ащыщэу щытыгъ. Гурыт еджапIэр къы­зеухым, ищыIэныгъэ гъогу ащ рипхынэу тыриубытагъ ыкIи физ­культурэм иинститут Краснодар къыщиухыгъ.
— Футболыр сыгу рихьэу илъэс пчъагъэрэ сыпылъыгъ. СиIофшIэн Адыгэкъалэ дэт гурыт еджапIэу N 2-м щезгъэжьэгъагъ, физкультурэмкIэ кIэлэегъаджэу илъэсрэ Iоф сшIагъэу кIэлэцIыкIу спорт еджапIэм трене­рэу къысэджа­гъэх. Илъэси 8-м ехъу футболымкIэ тренерэу Iоф сшIагъэу нэмыкI лъэныкъо зызгъэ­загъ — илъэс 20 хъугъэу теннисымкIэ сытренер, — еIо ти­гущыIэгъу.
Сабыим ицIыкIугъом къыще­гъэжьагъэу ипсауныгъэ зыпсыхьэрэр спортыр ары. Адыгэкъалэ дэс кIэлэцIыкIухэм агу етыгъэу спорт еджа­пIэм къэкIох. Теннисыр зышIогъэшIэгъонэу бэ ахэм ахэтыр. А 1-рэ классым къыщегъэжьагъэу я 11-м нэс арыс кIэлэ­еджакIохэр спорт еджапIэм къекIуалIэх, анахь цIыкIухэр тхьа­мафэм щэ, нахьыжъхэр тфэ спорт еджапIэм къэкIох.

— ТикIэлэцIыкIухэм гъэхъагъэхэр ашIыхэ зыхъукIэ тагъэгушхо, зэнэкъокъу зэфэшъхьаф­хэм ахэтэгъэлажьэх. Спорт еджапIэр къызызэIуахыгъэм къыщегъэжьагъэу амалыкIэхэр щыIэхэ хъугъэ, тищыкIэгъэщт Iэмэ-псымэхэр зэкIэ тиIэх. Тен­нис столэу 5 чIэт, нэбгырэ пчъагъэ зэу джэгунхэ алъэкIы. Узэрыгушхони тиI, бэмы­шIэу Мыекъуапэ щыкIогъэ зэ­нэкъо­къум зэшыпхъухэу Пэ­нэшъу Са­мирэрэ Мадинэрэ, СтIашъу Дэнэф, ЕмтIылъ Алинэ ыкIи ПчыхьалIыкъо Мурат хэлэжьагъэх. Илъэс 20-м нэс зыныбжьыхэр зыхэлэжьэгъэ зэнэкъокъум Пэнэшъу Самирэ анахь дэгъуитфымэ ащыщ хъугъэ, джы Къыблэ феде­ральнэ шъолъырым щызэха­щэщт зэ­нэкъокъум хэлэжьэн ылъэкIыщт. Илъэс 16-м нэс зы­ныбжьыхэр зыщызэнэкъокъу­гъэхэм ЕмтIылъ Алинэ анахь дэгъоу зыкъыщигъэлъэгъуагъ, — арыгушхозэ тренерым къе­Iуатэ.
КIэлэцIыкIум ипсауныгъэкIэ теннис цIыкIум ишIуагъэ къызэрэкIорэм, ыпкъышъол зэри­гъэпытэрэм ямызакъоу, гулъы­тэу иIэм нахь зэрэхигъахъорэр тигущыIэгъу къыIуагъ. КIэлэ­цIы­кIоу нэгъунджэ зыIулъэу къа­кIорэр бэ, нэхэмкIэ мы спортым ишIуагъэ къакIоу врач­хэм алъытэ.
Ешыгоо Мухътар илъэс зэкIэ­лъыкIохэм IофшIэнэу ыгъэцэ­кIагъэм уасэ къызэрэфашIы­гъэм, цIэ лъапIэ къызэрэфагъэ­шъошагъэм ыгъэгушIуагъ. Сыд фэдэрэ лъэныкъуи угу етыгъэу бгъэцакIэмэ, зыкъызэригъэшъып­къэжьырэр къыIуагъ. ИIофшIэгъухэми, кIэлэцIыкIоу ыгъасэхэ­рэми мы щытхъур къызэдалэ­жьыгъэу зэрилъытэрэр къыхигъэщыгъ.
ДЕЛЭКЪО Анет.