Даур Даринэ IофшIэныр зыригъэжьагъэр илъэситIу нахь мыхъу­гъэ­ми, гъэхъэгъэшIухэр иIэх, тапэкIи узщыгугъын плъэкIыщт ныбжьыкIэхэм ащыщ.

Даринэ илъэс 23-рэ ыныбжь. Хьакурынэхьэблэ еджапIэр ды­шъэ медалькIэ, Мыекъопэ къэралыгъо гуманитар-техническэ колледжыр тфыкIэ, Адыгэ къэралыгъо университетым экономикэмкIэ ифакультет диплом плъыжькIэ къыухыгъэх. Университетым заочнэ шIыкIэм тетэу щеджэзэ IофшIэныр ыублагъ. Шэуджэн район гъэзетэу «Зарям» мэзитIо бухгалтерэу щы­лэжьагъэу Мамхыгъэ къоджэ администрацием бухгалтер шъхьа­Iэу рагъэблэгъагъэу мэлажьэ.
Сыд фэдэрэ лэжьапIи бухгалтер IофшIэным мэхьэнэ ин щыриI. Къоджэ бюджетым епхыгъэу Iоф зышIэхэрэм къагъахъэ­рэр къэгъэлъэгъонэу зыкIэхьан фаем диштэным къыпкъыры­кIызэ лэжьапкIэр Даринэ ­егъэу­цу. Илъэсым мылъкоу агъэзе­кIуагъэм фэгъэхьыгъэ зэфэхьысыжь ешIы. Пчэдыжьым IофшIапIэм пстэуми апэ ­чIахьэшъ, ауж къычIэкIыжьы.
IофшIэныр къыбдэхъуным пае пстэуми анахь шъхьаIэу тигущыIэгъу къыхигъэщыгъэр ар шIу плъэгъуныр ары. УгукIэ узыфэщэгъэ сэнэхьатыр къызыхэмы­хыкIэ IофшIэныр пфэмыгъэцэкIэщтэу ащ елъытэ.
— ЦIыф зэгурыIожьхэм са­дэлэжьэнэу синасып къыхьыгъ. Илъэсыбэ хъугъэу мыщ Iоф щы­зышIэхэрэри мымакIэу тиIэх. Ахэм IэпэIэсэныгъэшхоу ахэ­лъым ишIуагъэ къысэкIы. Мам­хыгъэ къоджэ псэупIэм ипащэу Тэхъумэ Руслъан тыготэу тэлажьэ. Узыдэлэжьэрэ цIыфхэм мэхьанэшхо яI. Уисэнэхьат гу­псэфэу урылажьэу, гухахъо хэбгъуатэмэ зымыуасэ щыIэп. УиIоф хэбгъахъоу, ар цIыфхэм афэбгъэлажьэмэ, ащи федэшхо къыхьын ылъэкIыщт, — еIо тигущыIэгъу.
Пшъэшъэ ныбжьыкIэм сэнэ­хьатым епхыгъэу ишIэныгъэхэм ахегъахъо.
— Бухгалтер шъхьаIэм ышIэ­рэ Iофыр зыфэгъэцэкIэн Iоф­шIапIэм зэрэIумытыр гъэнэ­фагъэ. Арышъ, укъэмысыма­джэмэ нахьышIу, организацием имылъку зэрэзэбгъэфэщтым пшъэдэкIыжьышхо пылъ, ащ уфэ­сакъызэ, уиIофшIэн бгъэцэ­кIэн фае, — еIо Даринэ.
Мамхыгъэ къоджэ псэупIэм ипащэу Тэхъумэ Руслъан ныбжьыкIэм игугъу къытфишIыгъ.
— Даринэ ипшъэрылъхэр ыгъэцэкIэнхэмкIэ ищыкIагъэр зэкIэ IэкIэлъ, иIофшIэгъухэм цыхьэ фашIы. Мылъкур тэрэзэу гъэфедэгъэныр, лъэныкъо пстэумкIи финанс уплъэкIунхэр зэхэщэгъэнхэр, зэзэгъыныгъэ­хэм ягъэцэкIэн епхыгъэ Iоф­тхьа­бзэхэр икъоу зехьэгъэнхэр, инвестиционнэ проектхэм якъэ­кIуапIэхэм алъыплъэныр бухгалтер шъхьаIэм егъэцакIэ, — къыIуагъ Тэхъумэ Руслъан.
Сыд фэдэрэ специалисти иIофшIэнкIэ пшъэрылъэу иIэр щыIэныгъэм щыпхырищыным фэшI Iофышхо зыдэпшIэжьыныр анахь шъхьаIэу Даринэ елъытэ ыкIи ар ежь егъэцакIэ.
Лъэпшъыкъо Фатим.