ЗэплъэкIыгъо уримыгъафэу уахътэр мачъэ, гу лъытымытахэу къэсыгъ кIымафэр, мары екIы тыгъэгъазэри — кIымэфэ тыгъэр зыщызэ­теуцорэр.

ХэпшIыкIэу нахь къэучъыIыгъ, цIыфхэр зэтеухъумагъэх. Фэбэшхом ыуж, зэрэхабзэу, чъыIэбжьыр псын­кIэу зэхэошIэба?! Ау уесэжьмэ, щтыр­гъукIри дэеп, нахь псынкIэу укIон е учъэн, зыбгъэзэн узэкIэ­плъыхьэу, уесэжьмэ, мы уахътэр пшъхьап псауныгъэмкIэ; жьыр къабзэ, IэшIу, гопэгъу щыIэп; щыгъы-
ныр арымэ, зыфаер хэти зэрегъо­ты­лIэжьы.
Бзыухэм янахьыбэри, «къуаргъ-­сыргъ» язэрэгъаIозэ, къыблэм быбыжьыгъэх, ау тичIыопс есэжьы-
гъэ зырызхэр мокIэ-мыкIэ ащышыпэхэу тэлъэгъух; зыхэр сэнэшъхьэ къутамэхэм къыпынагъэхэм апэ­шхыхьажьых, адрэхэри шхын итэ­къугъэхэм якIух, псэ зыпытыр щыIэ шIоигъоба?!
Тыгъэр щхырыIужьэп, пщэхэм акъогъу зешIы, ауми, загъорэм къы­къоплъы хъурэр ышIэмэ шIоигъоу… КъыритIупщыгъэу къещхы.., къэу­чъыIыгъ. Ау джыри пчъагъэрэ ом зызэблихъущт, зыкъегъотыфэ; шъыпкъэ, ос фыжь къабзэр хэти тимыштэп, ащ ини цIыкIуи зэфэдэу агу ыщэфын елъэкIы. КIымафэм идэгъу­гъэ-дэхагъэ ащ тызэрэфэкIэщыгъоу, тызэрэпэгъокIырэм бэкIэ елъыты­гъэщт. Арышъ, «Къеблагъ, кIымафэр!» тэIо, ос фыжь къабзэми, гушIогъуабэми тапэплъэ… Аузэ, зэрэхабзэу, екIы илъэсыжъыр — 2024-р, цIыкIу-цIыкIоу къихьащт илъэсыкIэри.
Хэбдзын гори ахэмытэу шIэгъо закIэх чIыопсым иохътиплI — дахэ тидунай!
Дзэукъожь Нуриет.