Автоном мысатыу организациеу «Адыгэ Республикэм предпринимательствэм IэпыIэгъу етыгъэнымкIэ и Гупч» зыфиIо­рэм ипащэ игуадзэщтыгъэм бюджет ахъщэр зэритыгъу­гъэм фэшI унашъом хэбзэ кIуачIэ иIэ ­хъугъэ.

Автоном мысатыу организациеу «Адыгэ Республикэм предпринимательствэм Iэпы­Iэгъу етыгъэнымкIэ и Гупч» зыфиIорэм ипащэ игуадзэщтыгъэу Хъут Аслъан Урысыем и Уголовнэ кодекс ия 159-рэ статья ия 4-рэ Iахь къыдилъытэрэ бзэджэшIагъэ (шхъухьэ) зэрэзэрихьагъэм фэшI унашъоу аштагъэм хэ­бзэ кIуачIэ иIэ хъугъэ.
Урысые Федерацием щы­нэгъончъэнымкIэ и Федераль­нэ къулыкъу и ГъэIорышIапIэу Адыгэ Республикэм щыIэм уплъэкIуным епхыгъэ материалэу аIэкIигъэхьагъэ­хэм ялъытыгъэу уголовнэ Iофыр къызэIузыхыгъэр хэгъэгу кIоцI IофхэмкIэ Ми­нистерствэм и ГъэIорышIапIэу Адыгеим щыIэр ары.
ГъэIорышIапIэм иIофы­шIэхэм зэрагъэунэфыгъэмкIэ, А. М. Хъутым шхъухьэ схемэу зэхигъэуцуагъэр зы­фэгъэхьыгъагъэр респуб­ликэм исатыу структурэм бизнесымкIэ яфэIо-фашIэхэр афэгъэцэкIэгъэнхэм под­рядчикыр къахэгъэлэжьэгъэ­ныр ары, нахь тэрэзэу къэпIон хъумэ, автоном мысатыу организациеу «Адыгэ Республикэм предприни­мательствэм IэпыIэгъу етыгъэнымкIэ и Гупч» зыфи­Iо­рэм «игъусэгъу» унэе предпринимателэу И. А. Дзыбэр къыхэгъэлэжьэгъэныр. Ащ нэужым А. М. Хъутым документ нэпцIхэр ыгъэхьазы­рыщтыгъэх, фэIо-фашIэу предпринимательхэм афа­гъэцэкIагъэхэмкIэ ахъщэр къаIихыным пае. ЕтIанэ а документ нэпцIхэр автоном мысатыу организациеу ­«Адыгэ Республикэм предпринимательствэм IэпыIэгъу етыгъэнымкIэ и Гупч» зы-
фи­Iорэм IэкIигъахьэщтыгъэх. УплъэкIунхэм къызэ­рагъэ­лъэгъуагъэмкIэ, бизнес фэIо-­фэшIэ нэпцI 32-рэ агъэ­цэкIагъэу ыкIи сомэ мил­лионым ехъу ахэм атефагъэу ары.
Адыгэ Республикэм и Мыекъопэ къэлэ хьыкум А. М. Хъутым Урысыем и Уголовнэ кодекс ия 327-рэ статья иа 1-рэ Iахь ыкIи ия 159-рэ статья ия 4-рэ Iахь къыдалъытэрэ бзэджэшIагъэ­хэр зэрихьагъэхэу ылъытагъ, условнэу илъэси 3-рэ мэзи 8-рэ тырилъхьагъ.
Унашъом хэбзэ кIуачIэ иIэ хъугъэ.