УФ-м и Президентэу Владимир Путиным илъэс къэс журналистхэм адыриIэрэ зэIукIэгъумрэ линие занкIэу цIыфхэм зыкъызщыфа­гъазэрэмрэ тыгъуасэ, тыгъэгъазэм и 19-м, Москва щыкIуагъ.

Линие занкIэм къыхэлажьэ зышIоигъохэм апае пэшIоры­гъэшъэу колл-гупчэ агъэпси цIыф­хэм яупчIэхэр, яджэпса­лъэхэр къаугъоигъэх. ПстэумкIи нэбгырэ миллиони 2-рэ мин 500-м ехъумэ къэралыгъом ипащэ зыкъыфагъэзагъ.
АР-м и ЛIышъхьэу КъумпIыл Мурат линие занкIэм еплъыгъ, республикэм епхыгъэу упчIэ къыфагъазэмэ джэуап ытыжьыным, Президентым пшъэрылъэу къыфишIырэр ыгъэцэкIэным фэхьазырыгъ.
Экономикэм
икъэгъэлъэгъон шъхьаIэхэр
Ащ фэгъэхьыгъагъ апэрэ уп­чIэр. Журналистхэм ар къы­ратыгъ. Президентым къызэриIуагъэмкIэ, Урысыем лъэ­ныкъо пстэумкIи къытегъэуа­гъэр бэ нахь мышIэми, иэкономикэ зыпкъ итэу хэхъоныгъэ-
хэр ешIых. Аужырэ илъэситIур пштэмэ, проценти 8 фэдизкIэ хэхъуагъ. IофшIапIэм Iутыным зыныбжь нэсыгъэу хэгъэгум исым ипроценти 2,3-р ары ныIэп IофшIэпIэ чIыпIэ зимыIэр. Промышленнэ къыдэгъэкIыным етIупщыгъэу хэхъо.
— Дунэе финанс ыкIи экономикэ институтхэм Урысыем щэфэн амалэу иIэмкIэ Евро-
пэм апэрэ чIыпIэм щагъэуцу, дунаим яплIэнэрэ чIыпIэр щеубыты. Экономикэм ылъэны­къокIэ тызнэсыгъэр къызэтедгъэнэн, нахьышIум тыфэбэнэн фае, — къыкIигъэтхъыгъ Вла­димир Путиным.
Урысыем исуверенитет ыгъэ­пытэн зэрилъэкIыгъэм ишIуа­гъэкIэ экономикэм хэхъоны­гъэ­хэр зэрэфэхъугъэхэр ащ къыхигъэщыгъ. IэкIыб къэралхэм якъыдэгъэкIакIохэм ащыщыбэ Урысыем ибэдзэршIыпIэ икIы­жьыгъэх. Ащ фэшI типредпринимательхэм къыдагъэкIырэм хагъэхъуагъ.
Джащ фэдэу инфляцием изытет, гъомылапхъэхэм, гъэстыныпхъэхэм ауасэхэм ягугъу къашIыгъ.
— БэдзэршIыпIэм амалэу къытыхэрэр цIыфхэм гъотэу яIэм диштэнхэ фае, — къыIуагъ къэралыгъом ипащэ. — Гъомылапхъэу хэгъэгум ­къыщыдагъэкIырэр цIыфхэм ящыкIагъэм кIахьэрэп. Уасэхэр зэрэдэкIуаехэрэм ар изы ушъхьагъу. Дунэе уасэхэм зэрахахъорэми, санкциеу къэ­ралыгъом къыпагъохыгъэхэми яягъэ къэкIо.
ХэушъхьафыкIыгъэ дзэ
операциер
УпчIэу къэралыгъом ипащэ къыратыгъэхэм, джэпсалъэу зы­къызэрэфагъэзагъэхэм яна­хьыбэр хэушъхьафыкIыгъэ дзэ операцием епхыгъагъ.

Владимир Путиным дзэ­кIолI­хэм бэрэ зэраIукIэрэр къыIуагъ. Тихоокеанскэ флотым ия 155-рэ бригадэ ибыракъ шIухьафтынэу Президентым къыратыгъ. ЗэуапIэм щыIэ подразделениехэм зэкIэмэ ябыракъхэм ялIыкIо фэдэу хъунэу ар залым къыщызэкIоцIари­гъэхыгъ.
ХэушъхьафыкIыгъэ дзэ операциер зэрэкIорэм еплъыкIэу фыриIэм джэуап Президентым къыритыжьыгъ. Ащ къызэриIуа­гъэмкIэ, мафэ къэс квадратнэ километрэ пчъагъэ тидзэкIолIхэм пыим къытырахыжьы, пшъэрылъ шъхьаIэу операцием иегъэжьэгъум зыфагъэуцужьыгъагъэхэм къякIуалIэх. Урысыем и УIэ­шыгъэ КIуачIэхэм амалэу яIэр на­хьыбэ хъугъэ.
Шъхьафит ашIыжьырэ псэу­пIэхэм язэтегъэуцожьыни Президентым игугъу къышIыгъ. Ащ фытегъэпсыхьэгъэ программэу 2030-рэ илъэсым нэс те­лъытагъэр пхыращы. «Зыпари унэнчъэу къэдгъэнэщтэп», — къыкIигъэтхъыгъ Владимир Путиным.
Шъхьафит ашIыжьыгъэ чIыпIэхэм социальнэ мэхьанэ зиIэ псэолъэ мин 21-рэ ащашIыгъ. Ахэм ащыщэу мини 10-р Урысыем инэмыкI шъолъырэу IэпыIэгъу афэхъухэрэм агъэуцугъ. Ахэм япащэхэм, цIыфэу арысхэм къэралыгъо пшъэ­рылъхэм япхырыщын яIахьышхо къызэрэхалъхьэрэм фэшI зэрафэразэм Владимир Путиным къыкIигъэтхъыгъ.
Социальнэ Iофхэр,
демографиер
Мы лъэныкъохэм афэгъэхьыгъэ упчIэхэм джэуапхэр къаритыжьызэ къэралыгъом ипащэ ныхэм, кIэлэцIыкIухэм IэпыIэгъу ятыгъэным фытегъэпсыхьагъэу пхыращыхэрэм къатегущыIагъ. Ны мылъкум, унэгъо ипотекэм, ящэнэрэ ыкIи ащ къыкIэлъыкIорэ сабый къызэрыхъухьэгъэ унагъохэм ахъщэ тынэу афа­кIорэм, кIэлэцIыкIу зэрыс унагъохэм IэпыIэгъоу аратырэм, нэмыкIхэми ягугъу къышIыгъ.
Владимир Путиным шъо­лъырхэм япащэхэм закъыфи­гъазэзэ, мы лъэныкъомкIэ Iоф­шIэнхэр нахь агъэлъэшынхэу къафигъэпытагъ.
Мэкъумэщ
хъызмэтыр
Мыщ хэпшIыкIэу хэхъоныгъэ­хэр зэришIыхэрэр, хъызмэтшIапIэхэр нахьыбэ зэрэхъухэрэр, ахэм ащыщыбэм зызэраушъомбгъурэр къыхагъэщызэ, къоджэ псэупIэхэм Iоф ащызышIэщт специалист ныбжьыкIэхэмкIэ щыкIагъэхэр зэрэщыIэхэм хэ­кIыпIэу фэхъущтым къыкIэуп­чIагъэх журналистхэр.
Владимир Путиным къызэриIуагъэмкIэ, мэкъумэщ хъыз­мэтым илъэс къэс проценти
3-м къыщымыкIэу хэхъоны­гъэхэр ешIых. ГущыIэм пае, лэжьыгъэу илъэсым къаугъои­жьырэр тонн миллиони 100-м ехъугъ. Ащ фэшI экспортым агъакIорэми хэхъуагъ. ГъэрекIо лэжьыгъэ тонн миллион 66-рэ IэкIыбым атIупщыгъ. Мы лъэныкъомкIэ дунаим пэрытныгъэр щызыIыгъ къэралыгъуищым Урысыер ащыщ, коцэу IэкIыбым ыгъакIорэмкIэ апэрэ чIыпIэр ыIыгъ.
Лым, кIэнкIэм алъэныкъокIи щыкIагъэ щыIэжьэп, IэкIыбым къырамыщэу, тищыкIагъэм фэдиз мэкъумэщ хъызмэтшIапIэ­хэм къатIупщы. НэмыкIыбэхэмкIи мэкъу-мэщым хэхъоныгъэ-
хэр ышIыгъэх. Арэу щытми, Iо­фы­гъоу къуаджэхэм яIэхэм спе­циалистхэр зэримыкъухэрэр зэращыщым Владимир Путиным дыригъэштагъ.
— Зисэнэхьат хэшIыкIышхо фызиIэ специалистхэр мэкъу­мэщ хъызмэтым ищыкIагъэх. Ащ фэшI къоджэ псэупIэхэм хэхъоныгъэхэр ягъэшIыгъэнхэм фытегъэпсыхьэгъэ къэралыгъо программэхэр шъолъырхэм ащыпхырытэщых. НыбжьыкIэхэр къуаджэм Iоф щашIэным фэщэгъэнхэм пае амалышIухэр ятыгъэнхэр, «целевой» шIыкIэр гъэ­федагъэу гъэсэныгъэ ягъэгъотыгъэныр, IофышIэхэм афэгъэхьыгъэ нэмыкI хэкIыпIэхэр ахэм къадыхэлъытагъэх, — къы­Iуагъ Владимир Путиным.
Псауныгъэм
икъэухъумэн
Апэрэ медицинэ IэпыIэгъум, IэзапIэхэм специалистхэмкIэ щыкIагъэхэр зэряIэхэм, Iэзэгъу уцхэр цIыфхэм игъом аIэкIэгъэ­хьэгъэнхэм япхыгъэ упчIэхэри Президентым къыратыгъэх.
— Псауныгъэр къэухъумэгъэ­нымкIэ къулыкъум специалистхэмкIэ щыкIагъэхэр иIэх, ащ фэIорышIэрэ программэхэр ттIупщыгъэх, — къыIуагъ Президентым. — ЩыкIагъэ зиIэр пэублэ къулыкъур, фельдшер-­мамыку IэзапIэхэр ары. Сы­мэджэщхэм ащ фэдэ гумэкIыгъо ачIэлъэп. Арышъ, шъолъыр хэбзэ къулыкъухэр медицинэм иучреждениехэм IофышIэхэр зэратегощагъэхэм хэплъэжьынхэ фае.
Владимир Путиным къызэри­IуагъэмкIэ, Iэзэгъу уцхэм якъы­дэгъэкIын зырагъэушъомбгъу. 2030-рэ илъэсым нэс хэгъэгум ищыкIагъэм ипроцент 90-р мыщ къыщашIыным къыфэкIонхэм ыуж итых.
НэмыкI Iофхэр
Дунэе политикэм, БРИКС-м мэхьанэу иIэм, Урысыемрэ Ки­тайрэ язэфыщытыкIэхэм афэгъэхьыгъэ упчIэхэр журна­листхэм къатыгъэх. IэкIыбым къикIыгъэу мыщ Iоф щызы­шIэ­хэрэм, интернет зэпхыныгъэ­хэм, транспортым, хъоршэрыгъэ зэрахьэзэ цIыфхэр зэра­гъапцIэхэрэм, нэмыкI лъэны­къуабэхэм ягугъу ашIыгъ.

Субъектэу къыздикIыгъэхэм яIофыгъохэм ащыщхэр, ышъхьэ­кIэ зыгъэгумэкIыхэрэр Владимир Путиным къылъызыгъэIэсыгъэхэри къахэкIыгъэх. IэкIыб политическэ зэфыщытыкIэхэми мымакIэу къакIэупчIагъэх.
Ежь Президентым ышъхьэ фэгъэхьыгъэ упчIэхэри къыратыгъэх. ГущыIэм пае, щай чаш­кэм кIэрысэу изыгъэпсэфыгъо уахътэ зыдигъакIомэ шIоигъом къыкIэупчIагъэх. Владимир Путиным иныбджэгъухэм, иIа­хьыл-гупсэхэм нахьыбэрэ аIу­кIэмэ, адыщысымэ зэрэшIои­гъор къы­Iуагъ.
НасыпышIоу зелъытэжьымэ къеупчIыгъэх.
— ЦIыфхэм цыхьэ къысфа­шIи, мызэу, мытIоу къэралы­гъом ипэщэ IэнатIэ сытырагъэхьа­жьыгъ. Ар насыпыгъэп пIон плъэ­кIыщтэп, ау… ТикIалэхэр зэуапIэхэм къарымыкIыжьхэу, цIыфхэм рэхьатныгъэ яIэ мы­хъужьэу насыпышIоу зыслъытэ­жьышъущтэп, — къыIуагъ Владимир Путиным.
ИлъэсыкIэ мэфэкIэу къэблагъэрэм, Рождеством апае хэгъэгум исхэм къафэгушIуагъ, сабый зиIэхэм нахьыбэу уахътэ ахэм къафыхагъэкIынэу къэ­лъэIуагъ.
Пресс-конференциемрэ линие занкIэмрэ сыхьати 4-рэ ныкъорэ кIуагъэх, УФ-м и Президент уп­чIэ миллиони 2-м ехъу къыфэкIуагъ.
— Къэралыгъом ипащэ илиние занкIэ цIыфэу хэгъэгум исхэм ыкIи журналистхэм яуп­чIабэм джэуапхэр къащыриты­жьыгъ. Iофыгъоу къаIэтыгъэхэм ащыщыбэм непэ ягъу, мэхьа­нэшхуи яI. Хэбзэ къулыкъухэм лъэшэу анаIэ атырадзэн фае. УпчIэхэм ащыщхэр шъолъырхэм япхыгъагъэх, яфэшъошэ пшъэ­рылъхэр Президентым къыгъэу­цугъэх. Ахэм ягъэцэкIэн ыкIи республикэм щыпсэухэрэм Вла­димир Путиным фагъэзэгъэ упчIэхэм язэхэфын сэ сшъхьэкIэ сынаIэ атетыщт, — къыIуагъ АР-м и ЛIышъхьэу Къум­пIыл Мурат.
Журналист 600-м ехъоу пресс-­конференцием хэлэ­жьагъэхэм ащыщых Адыгеим икIыгъэхэу Беданыкъо Замирэ (къэ­ралыгъо телерадиокомпаниеу «Адыгеир»), Цундышк Зарэ (республикэ гъэзетэу «Советская Адыгея» зыфиIорэр), Виктория Виятик (Джэджэ районым игъэзетэу «Красное знамя»), ПхъэчэешIэ Суандэ (Адыгэкъалэ игъэзетэу «Единствэр»), Ирина Ковалевар (Красногвардейскэ районым игъэзетэу «Дружбэр»).
ХЪУТ Нэфсэт.