Унэ мафэ афэрэхъух
КIэлэцIыкIу ибэхэмрэ ны-тыхэр зышъхьарымытыжьхэмрэ афашIыгъэ унэм иIункIыбзэхэр Мыекъуапэ ипсэупIакIэу «Яблоневый» зыфиIорэм къащаратыжьыгъэх.
Ащ фэгъэхьыгъэ Iофтхьабзэм къафэгушIонхэу къекIолIагъэх Адыгеим и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, республикэм ипрокурорэу Игорь Шевченкэр, Урысыем и Следственнэ комитет иследственнэ гъэIорышIапIэу республикэм щыIэм ипащэу Василий Лариныр, къалэу Мыекъуапэ ипащэу Геннадий Митрофановыр. Джащ фэдэу мы Iофтхьабзэм хэлэжьагъэх АР-м иминистрэхэм я Кабинет хэтхэр, депутатхэр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «КСК-м» иIэшъхьэтетхэр.
Ежьхэм яунаеу зычIэсыщтхэ унэ апэрэу зиIэ хъугъэ пстэуми Адыгеим и ЛIышъхьэ афэгушIуагъ ыкIи ИлъэсыкIэм щыпэгъокIынхэ зэралъэкIыщтыр игуапэу къыIуагъ. Мэхьанэ гъэнэфагъэ иIэу щыт унагъом и Илъэс мы хъугъэ-шIагъэр зэрэтефагъэм. Унэгъо зэгурыIожь пытэхэр фэтэрыкIэхэм ащагъэпсыным зэрэщыгугъырэр КъумпIыл Мурат къыхигъэщыгъ.
«Шъуиунагъохэр бэгъонхэу, шъуиунэхэм шIулъэгъу, насып, зэдегъэштэныгъэ арылъынэу шъуфэсэIо! Мыщ фэдэ IэпыIэгъу зищыкIэгъэ пстэуми къатефэрэ амалхэр ягъэгъотыгъэнхэм епхыгъэ Iофыр тапэкIи лъыдгъэкIотэщт. Урысыем и Президентэу Владимир Путиным ащ фэдэ пшъэрылъ къытфигъэуцугъ. Анахьэу тынаIэ зытедгъэтыхэрэр кIэлэцIыкIу ибэхэр ары. Мы илъэсым а программэм мылъкоу пэIудгъахьэрэр хэпшIыкIэу нахьыбэ тшIыщт. 2025-рэ илъэсымкIэ бюджетым а гухэлъхэм апэIухьащт ахъщэр къыщыдэтлъытэгъах. КIэлэцIыкIу ибэхэу чэзыум хэтхэр псэупIэм зэрежэхэрэ уахътэр нахь дгъэкIэкIыным тылъыплъэщт. Лъэпкъ проектэу «ЦIыфхэр зыщыпсэухэрэ унэхэмрэ къэлэ щыIакIэмрэ» зыфиIорэм къыдилъытэрэ Iофтхьабзэхэми ащкIэ яшIуагъэ къэкIощт. КIэлэцIыкIу ибэхэм хабзэмкIэ фитыныгъэу яIэ пстэури тэрэзэу гъэцэкIагъэ хъуным Прокуратурэм, Следственнэ комитетым пхъашэу анаIэ тырагъэты», — къыIуагъ КъумпIыл Мурат.
ФэтэрыкIэхэр зэратыгъэхэм къаIуагъ хэбзэ къулыкъухэм ялIыкIохэм анаIэ къызэратырагъэтырэм пае зэрафэразэхэр ыкIи хьэкIэ лъапIэхэр яунэхэм арагъэблэгъагъэх. ФэтэрыкIэхэр зэкIэхэмкIи зэтегъэпсыхьагъэх, ущыпсэуным фэхьазырых.
Адыгеим и ЛIышъхьэ къызэриIуагъэмкIэ, илъэсэу икIыгъэм фэтэр 71-у къызIэкIагъэхьагъэм сомэ миллиони 177,5-рэ пэIухьагъ. Мы илъэсым республикэмкIэ а мылъкур фэди 2-кIэ нахьыбэ ашIыгъ — сомэ миллион 360-рэ фэдиз. А ахъщэмкIэ кIэлэцIыкIу ибэу 150-мэ зычIэсыщт унэхэр арагъэгъотыщтых, ахэм ащыщэу нэбгыри 103-р Мыекъуапэ щыщых. ГущыIэм пае, 2024-рэ илъэсым жъоныгъуакIэм республикэм икъэлэ шъхьаIэ кIэлэцIыкIу ибэ 39-мэ ащ фэдэ унэхэр щаратыгъэх. Непэ фэтэр 34-мэ яIункIыбзэхэр аратыжьыгъэх. Илъэсыр имыкIызэ джыри кIэлэцIыкIу ибэ 30-мэ фэтэрыкIэхэр аратыщтых. Фэтэрхэр зэкIэ Мыекъуапэ ипсэупIэ чIыпIакIэхэм ащагъэпсых. Ахэм ящыкIэгъэ инженер ыкIи социальнэ инфраструктурэр ащашIы. ЧIыпIэхэр зэтырагъэпсыхьэх, кIэлэцIыкIу джэгупIэхэр, зыщытезекIухьащтхэ шъолъырхэр, спортивнэ гупчэхэр, сатыушIыпIэхэр ащашIых. КIэлэцIыкIу IыгъыпIэу нэбгырэ 240 фэдизрэ зычIэфэщтри къапэблагъэу щыт. ЕджапIэу нэбгырэ 1100-мэ ателъытагъэр псауныгъэм игъэпытэн фытегъэпсыхьэгъэ гупчэу «Ошъутенэу» мылылъэ чIыпIэмрэ бассейнэмрэ зыхэтхэр къапэблэгъэщтых.
АР-м и ЛIышъхьэ мыщ фэдэ IофшIэнымкIэ зишIуагъэ къэзыгъакIохэрэм зэрафэразэр къыIуагъ: псэолъэшIхэм, специалистхэм, ныбжьыкIэхэм IэпыIэгъу ятыгъэнымкIэ проектхэм япхырыщын хэлэжьэрэ пстэуми. Шъугу къэтэгъэкIыжьы: тарихъ мэхьанэ зиIэ унэу Мыекъуапэ дэтым иигъэкIотыгъэ гъэцэкIэжьын ыкIэм фэкIо, гупчэу «Адыгеим иныбжьыкIэхэр» зыфиIорэм пае а унэр агъэфедэщт. Псауныгъэм игъэпытэн фытегъэпсыхьэгъэ лагерэу «Зэкъошныгъ» зыфиIоу тапэкIэ агъэ-
федэщтыгъэм ычIыпIэ ныбжьыкIэ зэхахьэхэмрэ гъэсэныгъэм епхыгъэ программэхэмрэ зыщырекIокIыщтхэ гупчэу илъэсым исыд фэдэрэ уахъти Iоф зышIэщтыр ашIынэу рахъухьагъ. Илъэсэу къихьащтым муниципальнэ ныбжьыкIэ гупчэхэр къызэIухыгъэнхэмкIи гухэлъхэр щыIэх.
ИкIэухым КъумпIыл Мурат ящыIэныгъэкIэ мэхьанэшхо зиIэ хъугъэ-шIагъэм пае джыри зэ ныбжьыкIэхэм къафэгушIуагъ, гъэхъагъэхэр ашIынхэу, фэтэрыкIэхэм щыIэкIэ насыпышIо щаряIэу, ямурад дахэхэр къадэхъоу псэунхэу афэлъэIуагъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.