ЗэIухыгъэ зэдэгущыIэгъум къыщаIэтыгъэгъэ Iофыгъохэм ащыщым фэгъэхьыгъэ зэIукIэгъур АР-м и ЛIышъхьэу КъумпIыл Мурат зэрищагъ.

Муниципальнэ образованиеу «Къалэу Мыекъуапэ» хэхьэрэ къутырэу Гавердовскэмрэ ащ къыпэIулъ чъыгхэтэлэжьыпIэхэмрэ язэтегъэпсыхьан ар фэгъэхьыгъагъ.
ЗэIукIэгъум хэлэжьагъэх АР-м иминистрэхэм я Кабинет и Тхьаматэу КIэ­рэщэ Анзаур, ащ игуадзэхэу Виктор Орловыр, ЛIыхэсэ Махьмуд, Хъоткъо Хъызыр, Мыекъуапэ имэрэу Геннадий Митрофановыр, АР-м иминистрэхэм я Кабинет хэтхэр, ресурсхэр аIэкIэзы­гъэхьэрэ организациехэм япащэхэр, чъыгхэтэлэжьыпIэхэм ятхьаматэхэр.
АР-м и ЛIышъхьэ иIэгъэ зэIухыгъэ зэ­дэгущыIэгъум чъыгхэтэлэжьыпIэхэм язэтегъэпсыхьан епхыгъэ упчIэхэр къы­щыратыгъагъэх. Къутырэу Гавердовскэм къыпэIулъ чъыгхэтэлэжьыпIэхэм газрыкIуапIэхэмрэ псырыкIуапIэхэмрэ аща­гъэпсы зэрашIоигъор къаIогъагъ.
ЧъыгхэтэлэжьыпIэхэм ятхьаматэхэм зэIукIэм къыщаIуагъ газымрэ псымрэ къаIэкIэхьанхэмкIэ IэпыIэгъу къаратыным къызэрэщыгугъыхэрэр, зэшIохыкIэ ама­лэу алъытэхэрэми ягугъу къашIыгъ.
Республикэм и ЛIышъхьэ пшъэрылъ афишIыгъ амалэу яIэхэр къызфагъэфе­дэзэ, зигугъу къэтшIыгъэ чъыгхэтэлэ­жьыпIэхэм газрыкIуапIэхэмрэ псыры­кIуапIэхэмрэ ащагъэпсынхэу. Мыекъуапэ имэрэу Геннадий Митрофановым, муниципальнэ унитарнэ предприятиеу «Майкопводоканалым» ипащэу Апэ­жьы­хьэ СултIан, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» игенеральнэ пащэу ЕкъутэкI Аслъан пшъэ­рылъ гъэнэфагъэхэр афишIыгъэх.
ГущыIэм пае, бюджетым имылъкукIэ чъыгхэтэлэжьыпIэхэм якIуалIэу псырыкIопIэ километри 3 тапэкIэ агъэпсы­гъагъ, джыри зы километрэ агъэпсыщт.

АР-м и ЛIышъхьэ мэрием пшъэрылъ фишIыгъ чъыгхэтэлэжьыпIэхэм псырыкIуапIэхэр ащыгъэпсыгъэнхэмкIэ проектыр ыухынэу. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIорэм проектированиемкIэ Iофхэм язытет чIыпIэм щызэригъэшIэн фае. ЫужыкIэ чъыгхэтэлэжьыпIэхэм газрыкIуапIэхэр ащыгъэпсыгъэнхэмкIэ ­мылъку къызэрэхагъэкIыщт шIыкIэм еусэщтых. Къызфагъэфедэщт амалхэм зэу ащыщ социальнэ газификациер. Ащ диштэу зигугъу къэтшIыгъэхэм ягъунапкъэхэм газыр алъагъэIэсыгъах. ПэшIорыгъэ­шъэу къызэрэрадзагъэмкIэ, унэ мин 1,5-рэ фэ­дизмэ газыр аращэлIэщт. ЕкъутэкI Аслъан зэIукIэгъум къызэрэщиIуагъэмкIэ, газгощыпIэхэм яшIынкIэ амалэу щыIэхэм ахэплъэщтых.
АР-м и ЛIышъхьэ агу къыгъэкIы­жьыгъ газым иищэн мылъкоу пэIуагъахьэрэр цIыф куп заулэмэ къазэрафалъэгъужьырэр. ЧъыгхэтэлэжьыпIэхэм адэт унэхэм ащыпсэухэу фэгъэкIотэныгъэ зиIэхэм газрыкIуапIэхэм ягъэпсынрэ газоборудованием игъэуцунрэ апае республикэ бюджетым сомэ мини 100 хъурэ субсидие къафыхагъэкIын алъэкIыщт.
Зэпымыоу электроэнергиер цIыфхэм аIэкIэгъэхьэгъэным иIофыгъуи гъунэ зы­лъафыхэрэм ащыщ. КъумпIыл Мурат пшъэрылъ афишIыгъ псэупIакIэхэр электросетьхэм апашIэхэ зыхъукIэ шапхъэу щыIэхэр къыдалъытэнэу, сетевой организациехэм энергетическэ инфраструктурэм игъэцэкIэжьын игъом зэхащэнэу.
АР-м и ЛIышъхьэ агу къыгъэкIы­жьыгъ зэдэгущыIэгъу занкIэм къыщаIэтыгъэ Iофыгъо пстэуми язэшIохын анаIэ зэрэтырагъэтырэр. ЗэIукIэгъум зыщытегущыIэгъэ IофыгъомкIэ хэбзэ къулыкъу­хэм пшъэрылъхэр афашIыгъэх, ащкIэ пшъэ­дэ­кIыжь зыхьыщтхэр агъэнэфагъэх, Iоф зэрашIэщт графикхэр зэхагъэуцуагъэх. ЗэIукIэгъум хэлэжьагъэхэм республикэм ипащэ тхьауегъэпсэу къыраIуагъ яIофы­гъохэм зэрагъэгумэкIырэм ыкIи ахэм язэшIохынкIэ IэпыIэгъу къызэрафэхъурэм афэшI.
«ЦIыфхэм къаIэтырэ Iофыгъохэм куоу зызащыбгъэгъуазэкIэ, ахэм еплъыкIэу афыуиIэр зэхъокIыгъэ мэхъу. ЗэIухыгъэ зэдэгущыIэгъум къыщаIэтыгъэ Iофыгъо­хэм татегущыIэнэу зедгъажьэкIи ар нэ­рылъэгъу къытфэхъу. Джыри зэ хэсэ­гъэунэфыкIы къулыкъухэм, псэупIэхэм япащэхэм цIыфхэм ягумэкIыгъохэм икъоу защагъэгъозэн, яIофыгъохэм язэшIохынкIэ амалхэр къагъотын зэрэфаер. Шъыпкъэ, стратегическэ пшъэрылъхэри тиIэх. Ахэм шIуагъэу къатырэм цIыф­хэми гу лъатэу къысщэхъу. Ау апэрэ чэ­зыоу зэшIотхын фэе, тинэплъэгъу идгъэкIы мыхъущт Iофыгъохэри щыIэх», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ
къэбархэмкIэ ЛIышэ Саныет.