Урысые Федерацием и Президентрэ хэгъэгум и Правительствэрэ яIэпыIэгъу хэлъэу социальнэ псэуалъэхэм яшIынкIэ ыкIи ягъэцэкIэ­жьынкIэ IофшIэнхэр республикэм чанэу щэкIох.

Ащ фэгъэхьыгъэу къыIуагъ Адыгеим и ЛIышъхьэу КъумпIыл Мурат. Республикэм щыпсэу­хэрэм инфраструктурэ Iэрыфэгъур яIэным мэхьанэу иIэри ащ къыхигъэщыгъ.
Республикэм еджапIэхэр, IэзапIэхэр, спорт гупчэхэр ыкIи физическэ культурэм зыщыпылъыщтхэ чIыпIэ гъэнэфагъэ­хэр щагъэпсых. Ащ нэмыкIэу щагухэмрэ общественнэ чIыпIэ­хэмрэ, джащ фэдэу гъогухэмрэ инфраструктурнэ псэуалъэхэмрэ ягъэцэкIэжьын макIо.
ГъэкIэжьын
IофшIэнхэр
Мы лъэхъаным псэолъэ пшIы пчъагъэмэ IофшIэнхэр ащэкIох, ащ дакIоу ыпэкIэ аублэгъэгъэ проектхэр ыкIэм фэ­кIуагъэх. Республикэм и ЛIы­шъхьэ ахэр зынагъэсыгъэхэр зэрегъашIэ.
Анахьэу республикэм ипащэхэм анаIэ зытырагъэтырэр учреждение шъхьаIэхэм яшIын ухыгъэныр ары: къалэу Мые­къуапэ щашIырэ отделениеу «Активное долголетие» зыфи­Iорэр, псэупIэу Яблоновскэм щашIырэ еджапIэр ыкIи спорт комплексыр, Адыгэкъалэ ща­гъэпсырэ фэбэрыкIуапIэр, Концерт залэу «Налмэсым» игъэцэ­кIэжьын ыкIи «Адыгеим иныб­жьыкIэхэр» зыфиIорэ гупчэм пае унэм изэтегъэпсыхьан.
КъумпIыл Мурат подрядчик­хэм пшъэрылъ афишIыгъ Iоф­шIэнхэмкIэ графикым дэмыхынхэу, хэбзэ къулыкъухэм ыкIи муниципалитетхэм япащэхэм — псэолъэшIыпIэ пэпчъ Iофхэр зэращыкIохэрэр зэрауплъэкIурэр агъэлъэшынэу. Псэуалъэхэр зэкIэ ипIалъэм тыгъэнхэм пае ар ищыкIагъэу щыт.
Къэралыгъо хабзэм икъулыкъухэм язэIукIэхэм общественнэ ыкIи унэ зэхэтхэм ящагухэм ягъэкъэбзэн, псэупIэ-коммунальнэ хъызмэтым иIофыгъохэм щатегущыIэх. Ащ дакIоу псэупIэ­хэм щыIэкIэ амал тэрэзхэр цIыфхэм щаряIэным пае хабзэм мылъку къыхегъэкIы, илъэс къэс общественнэ чIыпIакIэхэр агъэ­псых, щагухэр ыкIи фэтэрыбэу зэхэт унэхэр агъэцэкIэжьых.
Игъоу
алъэгъугъэхэм ялъытыгъэу
Зэтегъэпсыхьан IофшIэнхэм цIыфхэр нахь игъэкIотыгъэу къахэгъэлэжьэгъэнхэм лъэшэу анаIэ тырагъэты. 2018-рэ илъэ­сым къыщыублагъэу Адыгеим проект 91-рэ щагъэцэкIагъ, ахэм сомэ миллиони 138-м ехъу бюд­жетым къащыфыхагъэкIыгъ.
Мы илъэсым унашъо аштагъ илъэс къэс къафыхагъэкIырэ ахъщэр миллион 30-м къыщегъэжьагъэу миллион 50-м нагъэсызэ нахьыбэ ашIынэу. Ащ амал къытыщт цIыф жъугъэхэм игъо алъэгъугъэ проектыкIэу 30 фэдиз зэшIуахынэу.
ЯщыIакIэ
зыфэдэщтыр бэкIэ ялъытыгъ
ПсэупIэ-коммунальнэ хъыз­мэтымрэ зэтегъэпсыхьэгъэнымрэ япхыгъэ IофыгъохэмкIэ цIыфхэм лъэIу тхылъхэу къагъэ­хьыгъэхэм ренэу анаIэ атырагъэты. КъумпIыл Мурат зэхэ­сыгъом къызэрэщыхигъэщы­гъэмкIэ, пэщэныгъэ зезыхьэрэ ком­паниехэм яIофшIэн епхыгъэ Iофыгъохэр зэшIохыгъэнхэ, коммунальнэ пыдзэфэ пытэхэр зэратакъохэрэм ыкIи ахэм яIущын зэшIохыгъэ зэрэхъурэм япхыгъэу къэуцурэ Iофыгъохэр гъэцэкIэгъэнхэ фае.
Адыгеим и ЛIышъхьэ къызэриIуагъэмкIэ, хэгъэгум ипащэ­хэм лъэшэу анаIэ зытырагъэтыхэрэм ащыщ псэупIэ-коммунальнэ хъызмэтым иинфраструктурэ уахътэм диштэу зэтегъэ­псыхьэгъэныр. Нафэу зэрэщытымкIэ, цIыфхэм ящыIакIэ нахь зыкъыIэтынымкIэ ащ ишIуагъэ къэкIо.
Лъэпкъ проектхэм
япхырыщын
Лъэпкъ проектхэмрэ къэралыгъо программэхэмрэ гъэцэ­кIэгъэнхэмкIэ Адыгеир шъолъыр анахь дэгъуи 10-мэ ахэфагъ. Шъолъырхэм яхэхъоныгъэкIэ Правительствэ комиссием изэ­хэсыгъоу Урысыем и Правительствэ и Тхьаматэ игуадзэу Марат Хуснуллиным зэрища­гъэм ащ фэгъэхьыгъэу къыщаIогъагъ.
Гъогухэм яшIынкIэ Марат Хуснуллиным къыхигъэщыгъ цIыф псэупIэхэм ягъогу-транспорт системэ ихэхъоныгъэ лъэ­ныкъо пстэури къызщыдэлъы­тэгъэ екIолIакIэ фыряIэн зэрэфаер.
Лъэпкъ проектэу «Инфраст­руктурэр щыIэныгъэм пай» зы­фиIорэм къыделъытэ Iоф­тхьэбзэ зэфэшъхьафыбэ. Коммунальнэ инфраструктурэр гъэ­цэкIэжьыгъэнымкIэ, ком­мунальнэ фэIо-фашIэхэр нахь тэ­рэзэу зэшIохыгъэнхэмкIэ ахэм яшIогъэшхо къэкIощт.
— Гъогухэм яшIынкIэ тирес­публикэ анахь дэгъоу Iофхэр зыщызэхэщагъэхэм ахэфагъ. ЦIыфхэр зычIэсыщт унэхэм яшIын ипсынкIагъэкIи гъэхъэ­гъэшIухэм такъыфэкIуагъ. А пстэуми адакIоу хэгъэгум и Пре­зидентэу Владимир Путиным къахилъхьэгъэ лъэпкъ проектыкIэу «Инфраструктурэр щыIэ­ныгъэм пай» зыфиIорэм къы­пкъы­рыкIырэ пшъэрылъышхохэр республикэм ыпашъхьэ итых», — къыщиIуагъ КъумпIыл Мурат мы илъэсым чъэпыогъум АР-м и Къэралыгъо Совет — Хасэм иIэгъэ зэхэсыгъом.
Ахэм адакIоу
Шъугу къэтэгъэкIыжьы: ­лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ипхырыщын къыдыхэлъытагъэу 2024-рэ илъэсым федеральнэ шапхъэхэм адиштэу республикэм игъогу Iахь 18 ашIыгъ, пстэумкIи зэхэубытагъэу ахэр километрэ 48-рэ зэрэхъухэрэр. Ащ фэгъэхьыгъэу къыщаIуагъ АР-м псэолъэшIынымкIэ и Министерствэ.
КъызэрэхагъэщыгъэмкIэ, Iоф­шIэнхэу зэшIуахыгъэхэм ахэ-
хьэх Кощхьэблэ районым лъэмыджэу щагъэцэкIэжьыгъэр ыкIи Мыекъопэ, Яблоновскэ къэлэ гъогухэм язытет нахьышIу зэра­шIыгъэр. Гъогухэм къатехъу­хьэ­рэ шэпхъэ укъоныгъэхэр гъэу­нэфыгъэнхэм пае видеошIы-
кIэм тетэу хъурэ-шIэрэр къэзгъэлъэгъощт пкъыгъо 16 атырагъэуцуагъ.