Автоном мысатыу организациеу «Национальные приоритеты», IFОRS зыфиIохэрэм 2024-рэ илъэсым ишэкIогъу-итыгъэгъэзэ мазэ­хэм зэхащэгъэгъэ ушэтынхэм нафэ къызэрашIыгъэмкIэ, Урысыем илъэпкъ проектхэм афэгъэхьыгъэ къэбархэм цIыфхэр дэгъу дэдэу (процент 91-м нэсэу) ащагъэгъуазэ хъугъэ.

2021-рэ илъэсым егъэпшагъэ­мэ, проценти 6-кIэ ар нахьыб. Къыблэ, Темыр-Кавказ, Сыбыр федеральнэ шъолъырхэр ары Iофхэр мыщкIэ нахь дэгъоу зыщызэхэщагъэхэр. ЗэупчIы­гъэ­хэм къызэраIуагъэмкIэ, лъэпкъ проектхэм ащыщэу нахь къа­дэхъурэр демографием епхы­гъэр ары.
Лъэпкъ проектэу «Демографием» диштэу Урысыем иунагъохэу кIэлэцIыкIухэр зэрысхэм IэпыIэгъу араты, ны-тыхэм фе­деральнэ, республикэ фэгъэ­кIотэныгъэхэр афашIых, IэпыIэгъу зэфэшъхьафхэр къаIокIэ. Къихьащт илъэсым лъэпкъ про­ектыкIэу «Унагъу» зыфиIорэм игъэцэкIэн фежьэщтых. КIэлэцIыкIухэр зэрыс унагъохэм IэпыIэгъу зэрарагъэгъотырэ шIы­кIэр тапэкIи лъагъэкIотэщт: илъэс къэс унэгъо миллион 1,7-мэ ны мылъкур, нэбгырэ миллиони 9,6-мэ зэтыгъо IэпыIэ­гъур, кIэлэцIыкIухэр зэрыс уна­гъохэм миллион 1,5-рэ хъурэ ипотекэ чIыфэхэр аратыщтых. Джащ фэдэу кIэлэцIыкIу Iыгъы­пIэхэм ягъэпсыни лъагъэкIо­тэщт. Лъэпкъ проектым апэрэу къыщыдалъытагъ сабыйхэр на­хьыбэу къэгъэхъугъэнхэм телъытэгъэ шъолъыр программэхэм федеральнэ мылъку къа­фыхэгъэкIыгъэныр.
Урысыем и Президентэу Вла­димир Путиным мы илъэсыр унагъом и Илъэсэу зэригъэнэфагъэм унэгъо политикэр хэ­гъэгум щыпхырыщыгъэнымкIэ мэхьанэшхо иIагъ. Программэм диштэу ныхэмрэ кIэлэцIыкIу­хэмрэ IэпыIэгъоу аIукIырэм нахь зиушъомбгъугъ, сабыибэ зэрыс унагъом истатус официальнэу къагъэшъыпкъэжьыгъ, «Это у нас семейное» зыфиIорэ зэ­нэкъокъур зэхащагъ. URА.RU къызэритыгъэмкIэ, илъэсым икIэуххэр зэфэхьысыжьыгъэнхэм пае Урысые Федерацием и Къэралыгъо Совет тыгъэгъа­зэм и 20-м зэIуагъэкIэн алъэ­кIыщт.
Унагъом и Илъэс Адыгеим зэрэщыкIуагъэр къызэфихьысыжьзэ, республикэм и ЛIышъхьэу КъумпIыл Мурат зэрэхигъэунэфыкIыгъэмкIэ, унагъохэр нахь дэгъоу псэунхэмкIэ ищыкIэгъэ пстэури АР-м ипащэхэм ашIэ.
— Урысыем и Президент къахилъхьэгъэ лъэпкъ проектыкIэу «Унагъу» зыфиIорэри ащ фэIорышIэщт, ащ игъэцэкIэн къихьащт илъэсым тыфежьэщт. Мы проектым тетэу унагъохэм нэмыкI IэпыIэгъу лъэпкъхэри къаIукIэщтых. Бзылъфыгъэ ныбжьыкIэхэу очнэу еджэхэрэм ыкIи сабый къызыфэхъунэу зы­зыгъэхьазырхэрэм IэпыIэгъу тафэхъущт, сабыибэ зиIэ унагъохэм ипотекэмкIэ субсидиехэм афыхэдгъэхъощт, ны-тыхэм IэпыIэгъу язытыщт къулыкъухэр бзылъфыгъэ консультациехэм ащызэхащэщтых, — къыIуагъ КъумпIыл Мурат.
Ящэнэрэ ыкIи ащ къыкIэ­лъыкIорэ сабыйхэм апае ны мылъкоу республикэм къащыратырэм фэдитIукIэ зэрэхагъэ­хъощтым ехьылIэгъэ унашъо Адыгеим зэрэщаштагъэр шъугу къэтэгъэкIыжьы. Къихьащт илъэ­сым щылэ мазэм и 1-м къыще­гъэжьагъэу ны мылъкоу сомэ 100000 аратыщт. Илъэс 26-м зыныбжь нэмысыгъэ ныхэм со­мэ мин 25-рэ хъурэ зэтыгъо IэпыIэгъу къаIукIэщт яапэрэ е яятIонэрэ сабый 2025-рэ илъэ­сым щылэ мазэм и 1-м ыуж къызыхъукIэ.