Лъэпкъ проектэу «Псауныгъэм икъэухъумэн» къыдыхэ­лъытэгъэ федеральнэ проектэу «Пэублэ IэпыIэгъу языгъэгъотырэ IэзапIэхэр уахътэм диштэу зэтегъэпсы­хьэ­гъэнхэр» зыфиIорэм ишIуагъэкIэ къатищэу зэтет Iэзэ­пIакIэ Тэхъутэмыкъое районымкIэ къэлэ гъэпсыкIэ зиIэ псэупIэу Инэм щагъэпсыгъ.

Адыгеим и ЛIышъхьэу КъумпIыл Мурат IэзапIэр къызэпиплъыхьагъ, ащ Iоф щызышIэхэрэми, псэупIэм дэсхэми адэгущыIагъ.
Республикэм ипащэ игъусагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, псауныгъэр къэухъумэгъэнымкIэ министрэу Мэрэтыкъо Рустем, Тэхъутэмыкъое районым ипащэу Шъао Аскэр, Росздравнадзорым АР-мкIэ и ГъэIорышIапIэ, шIокI зимыIэ медицинэ страхованиемкIэ Феде­ральнэ фондым АР-мкIэ ичIыпIэ къутамэ, Инэм къоджэ псэупIэм, Хь. М. Шъэумэным ыцIэкIэ щыт шIушIэ фондым, АР-м икъэралыгъо бюджет учреждениеу «Стройзаказчикым» япащэхэр, АР-м и Къэралыгъо Совет — Хасэмрэ народ­нэ депутатхэм ярайон Советрэ ядепутатхэр.

Зы сменэм нэбгырэ 450-мэ яфэIо-фашIэхэр зыгъэцэкIэщт IэзапIэм подрядчикэу иIагъэр компаниеу «Стройинвест-ЮГ» ары. Илъэси 2-кIэ ар агъэпсыгъ, сомэ миллион 400-м ехъу тефагъ. 2024-рэ илъэсым IэзэпIакIэм ишIын аухыгъ, ищыкIэгъэ медицинэ Iэмэ-псы­мэхэри чIагъэуцуагъэх. Псэуалъэр атынымкIэ Iизын тхылъи, медицинэ фэIо-фашIэхэр зэхащэнхэмкIэ фитыныгъи къаратыгъэх.
Унэм иапэрэ къат регистратурэр, кIэлэцIыкIу, рентгенологическэ отделениехэр, травматологым икабинет тетых. ЯтIонэрэ, ящэнэрэ къатхэм гинекологым, лор-врачым, офтальмологым, неврологым, хирургым, эндоскопистым, онкологым, кардиологым, психиатрэм якабинетхэр, УЗИ-мкIэ, ЭКГ-мкIэ, физиотерапиемкIэ, массажымкIэ каби­нетхэр тетых. Джащ фэдэу IэзапIэм актовэ залышхуи иI. Тэхъутэмыкъое гупчэ рай­он сымэджэщым икъутамэу ар щыт.

КъумпIыл Мурат зэрэхигъэунэфыкIыгъэмкIэ, республикэм ипащэхэм Инэм къэлэ псэупIэм иIофыгъохэр зэкIэ зэшIохыгъэнхэм зэрафэлъэкIэу акIуачIэ рахьылIэ. Ахэм ащыщ пэублэ IэпыIэгъу языгъэгъотырэ IэзапIэхэр уахътэм ди­штэу зэтегъэпсыхьэгъэнхэр.
«ЦIыфхэм ящыкIагъэхэм гу алъытэтэ, псынкIэу ахэр зэрэзэшIотхыщтхэм тыпылъ. Пэублэ IэпыIэгъу языгъэгъотырэ IэзапIэхэм яIофшIэн зэрищыкIагъэм лъыкIахьэу зэхащэным тынаIэ тетэгъэты. Лъэпкъ проектэу «Псауныгъэм икъэухъумэн» зыфиIорэм ишIуагъэ­кIэ мы IэзакIэри, нэмыкIхэри дгъэ­псы­гъэх. IэзэпIакIэм иIофышIэхэм пэу­блэ IэпыIэгъу дэгъу сымаджэхэм зэрара­гъэгъотыщтым сицыхьэ телъ», — къы­Iуагъ КъумпIыл Мурат.

Джащ фэдэу республикэм и ЛIышъхьэ къызэрэхигъэщыгъэмкIэ, чIыпIэхэм ащыIэ хэбзэ къулыкъухэм япащэхэм цIыфхэм яIофыгъохэм язэшIохын нахь лъэшэу анаIэ тырагъэтын фае. ДемографиемкIэ къэралыгъом политикэу зэрихьэрэм изы Iахьышхоу щыт псауныгъэм икъэухъумэн. Пэублэ медицинэ IэпыIэгъумрэ диспансеризациемрэ ащкIэ мэхьанэшхо яI.
Республикэм и ЛIышъхьэрэ хьакIэ­хэмрэ IэзапIэм чIэт оборудованиякIэм Iоф зэришIэрэр арагъэлъэгъугъ. Инэм къэлэ псэупIэм нэбгырэ мин 32-рэ фэ­диз зэрэщыпсэурэр, IэзэпIакIэр къызэ­рэзэIуахыгъэм цIыфхэм ягъашIэ нахь зэрэхигъэхъощтыр къыхагъэщыгъ.
КъумпIыл Мурат IэзэпIа­кIэм иIофы­шIэ­хэм актовэ залым щадэгущыIагъ. ЗэдэгущыIэгъу зэIу­хыгъэу бэмышIэу щыIа­­гъэм Инэм дэсхэм яупчIэхэм ­джэуап къазэращыритыжьыгъэр рес­публикэм и ЛIы­шъхьэ къыхигъэщыгъ. Ахэм ащыщхэр медицинэ IэпыIэгъоу арагъэгъотырэр нахьышIу шIыгъэным фэ­гъэхьыгъагъэх.

«Лъэпкъ проектхэмрэ къэралыгъо программэхэмрэ адиштэу муниципалитетхэм ащыпсэухэрэм ящыIэкIэ-псэукIэ нахьышIу шIыгъэнымкIэ амалыбэ зетэхьэ. Илъэс заулэкIэ узэкIэIэбэжьмэ, Инэм район сымэджэщым иинфекционнэ отделение гъэцэкIэжьын IофшIэнхэр етшIылIэгъагъэх. Мыгъэ мы IэзэпIакIэр ттIупщыгъ. А пстэури зишIуа­гъэр федеральнэ гупчэм IэпыIэгъоу къытитырэр ары. ТэркIэ непэ мэхьанэшхо зиIэр псэолъакIэхэри, агъэкIэжьыгъэхэри цIыфхэм афэшIушIэнхэр ары. Шъо шъутигъусэмэ ары ныIэп ар зэшIотхын зытлъэкIыщтыр. ЗэкIэми зэдытиIофым шъукъыхэлэжьэнэу лъэшэу тышъущэгугъы», — къыIуагъ КъумпIыл Мурат.
Республикэм ипащэ IофышIэхэм якъэ­гъотыни шъхьафэу къыщыуцугъ. Адыгеим и ЛIышъхьэ пшъэрылъ къыгъэуцугъ медицинэ IофышIэхэм япчъагъэ къемыгъэIыхыгъэнэу, ахэм IэпыIэгъу ягъэгъо­тыгъэнэу.
ЕджапIэхэм, спортзалхэм, кIэлэцIыкIу IыгъыпIэхэм ягъэцэкIэжьынкIэ, социальнэ ухъумэнымкIэ, чIыпIэхэм язэтегъэ­псыхьанкIэ, гъогухэм ягъэкIэжьынкIэ Инэм щызэшIуахыгъэхэм ыкIи щашIэ-
нэу рахъухьэхэрэм джащ фэдэу рес­публикэм ипащэ къащыуцугъ. Промышленнэ паркышхоу «Инэм» зыфиIорэм игъэпсын къытегущыIэзэ, IофшIэпIакIэхэм язэхэщэнкIэ, муниципалитетым ибюд-
жет нахьыбэу хэбзэIахьхэр къихьан­хэмкIэ ащ мэхьанэшхо зэриIэр КъумпIыл Мурат хигъэунэфыкIыгъ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саниет