Мы аужырэ илъэс­хэм культурэм иучреждениехэр нахь зэтегъэпсыхьэгъэнхэм, цIыфхэр зыщызэIукIэрэ гупчэхэу ахэр хъунхэм афэIорышIэрэ Iофтхьэ­бзабэ къэралыгъом щызэрахьагъ. УФ-м культурэмкIэ и Министерствэ зэхищэгъэ зэнэкъокъоу «ИскусствэхэмкIэ кIэлэцIыкIу еджэпIэ анахь дэгъу-2024» зыфиIо­рэм Адыгеим иеджэпIитIу текIоныгъэ къыщыда­хыгъ.

Лъэныкъо зэфэшъхьаф­хэмкIэ Урысыем искусст­вэ­хэмкIэ иеджапIэхэр ащ щызэнэкъокъугъэх. Мые­къуа­пэ искусствэхэмкIэ икIэлэцIыкIу еджапIэу
N 1-м — «ИскусствэхэмкIэ кIэлэцIыкIу къэлэ еджэпIэ анахь дэгъу», мыщ фэдэ кIэлэцIыкIу еджапIэу псэу­­пIэу Тульскэм дэтым — къоджэ еджапIэхэмкIэ те­кIоныгъэ къыдахыгъ. Къалэу Москва Iофтхьа­бзэр щыкIуагъ, зэнэкъо­къум икIэух едзыгъо пхырыкIыгъэ еджапIэхэр ащ щагъэшIуагъэх.
— Мыр хэбзэ къулы­къухэмрэ культурэм иучреждениехэмрэ Iофэу зэ­дашIагъэм, кIэлэегъаджэ­хэм яIэпэIэсэныгъэ, ныбжьыкIэхэм ясэнаущыгъэ ыкIи ашIэрэм фыщытыкIэу фыряIэм къакIэкIогъэ те­кIоныгъ. ИскусствэхэмкIэ кIэлэцIыкIу еджэпIитIуми ялIыкIохэм осэ инэу къафашIыгъэм пае сафэгушIо, — исоциальнэ нэкIуб­гъо­хэм къащитхыгъ АР-м и ЛIышъхьэу КъумпIыл Мурат.
ИскусствэхэмкIэ кIэ­лэцIыкIу еджэпIэ анахь дэгъур къыхэхыгъэным ­фэгъэхьыгъэ зэнэкъокъу илъэ­сым щэгъогогъо рекIо­кIыгъ. Iофтхьабзэм игу­гъу къытфишIы

гъ искусст­вэ­хэмкIэ кIэлэцIыкIу еджа­пIэу псэупIэу Тульскэм дэ­тым ипащэу ГъукIэлI Батыр.
— Тикъэралыгъо ишъо­лъыр зэфэшъхьафхэм яеджэ­пIэ 1300-у хэлэжьагъэхэм къахахыгъэ анахь еджэпIэ дэгъуи 140-м та­хэфагъ. Адыгеим иеджэ­пIи­тIу ипащэхэм осэшI купым ыпашъхьэ дэгъуцIэр Моск­ва къыщыдгъэшъып­къэ­жьыгъ. ОсэшIхэм уп­чIэхэр къытатыщтыгъ, зы­фэбгъэ­хьазырынэу щымытэу, ахэм джэуапхэр къяпты­жьын фэягъ. Къытфагъэуцугъэ баллхэмкIэ еджэпIэ анахь дэгъуи 8 къыхагъэщыгъ. Адыгэ Рес­публикэм иискусствэ бай къызэ­рэдгъэлъэгъуагъэм лъэшэу тырэгушхо. ИскусствэмкIэ кIэлэегъаджэхэм рагъэджэ­рэ лIэужыкIэр ары неущ искусствэр лъы­зыгъэкIо­тэщтыр, — къы­Iуагъ Гъу­кIэлI Батыр.

ЕджапIэхэм хэхъоныгъэ ашIыныр, кIэлэеджакIохэм сэнаущыгъэу ахэлъыр къы­хэгъэщыгъэныр, ар къа­гъэшъыпкъэжьын алъэкIэу гъэсэгъэнхэр, ныбжьыкIэ­хэр культурнэ щыIакIэм хэ­щэгъэнхэр, пшъэрылъ гъэнэфагъэхэр зыфагъэуцужьынхэр, щыIэныгъэм щыпхыращы­жьынхэм фэщэгъэнхэр зэ­нэкъокъум кIэ анахь шъхьа­Iэу щы­тыгъэх.
Лъэпшъыкъо
Фатим.