Владимир Путиным пстэумэ апэу партием хэтхэм ыкIи ащ икъотэгъоу шъолъырхэм арысхэм хэушъхьафы­кIыгъэ дзэ операцием ипшъэрылъхэм ягъэцэкIэн яIахьышхоу халъхьэрэм пае зэрафэразэр къыриIотыкIыгъ.

Апэрэ мафэхэм къащыублагъэу «Единэ Россиер» дзэкIолIхэм IэпыIэ­гъушхо афэхъу. ТилIыхъужъхэмрэ ахэм яунагъохэмрэ социальнэу къэухъумэ­гъэн­хэм, яфитыныгъэхэр икъу фэдизэу агъэфедэшъунхэм афытегъэпсыхьэгъэ хэбзэгъэуцугъэхэм ар якIэщакIу, шъхьафит ашIыжьыгъэ шъолъырхэм язэте­гъэуцожьынкIэ адеIэ, цIыфэу арысхэм анахь ящыкIагъэхэм якъэугъоин зэхещэ, зэо-зэпэуцужьхэр зыщыкIохэрэм къарыкIыжьыгъэ ветеран­хэм сэнэхьатэу яIэхэм арылэжьэшъунхэмкIэ, общественнэ ыкIи политическэ щыIакIэм хэгъозэнхэмкIэ ишIуагъэ арегъэкIы.
Политикэ хъугъэ-шIэгъэ шъхьаIэу «Единэ Россием» ия XXII-рэ зэфэс партием ипащэу Дмитрий Медведевым тхьамэтагъор щызэрихьагъ. Партием хэтхэм тапэкIэ Iоф зэрашIэщтыр агъэ­нэфагъ.
— УФ-м и Президентэу Владимир Путиным иджэпсалъэ къызэрэщыхигъэщыгъэу, зэфэсым щытегущыIэнхэу Iо­фы­­гъуабэ агъэнэфэгъагъ. Пэрытныгъэр зы­Iыгъ типартие пшъэрылъхэм ягъэцэ­кIэн, лъэхъаным Iофыгъоу къыздихьы­хэрэм ядэгъэзыжьын тегущыIэ, пстэумэ апшъэ щытыщтыр хэдзакIохэм унашъоу къашIыгъэхэр ары.
IофшIэнхэм нахьыбэу шIуагъэ къатыным пае лъэпкъ программэм, уставым зэхъокIыныгъэхэр афашIыгъэх. Джащ фэдэу «Единэ Россием» и Апшъэрэ ыкIи Генеральнэ советхэм ахэтхэм зэхъокIыныгъэхэр афэхъугъэх.
Лъэпкъ программэм зэхъокIыныгъэ шъхьаIэу фэхъугъэхэр хэушъхьафыкIыгъэ дзэ операцием хэлажьэхэрэм, ахэм IэпыIэгъоу аратыщтым афэгъэхьыгъэх. Тэри ахэр пстэумэ апшъэ тэшIых. ЧIыпIэхэм IофшIэнхэр нахь ащагъэлъэ­шынхэм, операцием иветеранхэмрэ ащ хэкIодэгъэ дзэкIолIхэм яунагъохэмрэ IэпыIэгъоу агъотырэм партием ынаIэ зэратетыщтым афэгъэхьыгъэу «Единэ Россием» унашъоу ыштагъэхэр игъоу тэлъытэх, — къыхигъэщыгъ АР-м и ЛIышъхьэу КъумпIыл Мурат.
Партиер кIэщакIо зыфэхъугъэ Iофхэу зэфэсым къыщыхагъэщыгъэхэр ­хэзыгъэ имыIэу гъэцэкIагъэ зэрэхъущтхэми рес­публикэм ипащэ къыкIигъэт­хъыгъ.
— Унашъоу аштагъэхэм апае пшъэ­дэкIыжь зыхьырэр тэры. Ахэр хэдза­кIохэм яеплъыкIэу лъэпкъ программэр зызэхагъэуцом къыдалъытагъэхэм къа­пкъырыкIыгъэх. Гъогур ахэм къытагъэлъэгъу, Iоф зэрэтшIэщт планыр къа­гъэ­нафэ. Ахэр дгъэцакIэхэмэ цIыфхэм ящы­IакIэ нахьышIу хъуным фытегъэ­псыхьагъэу къэралыгъом ипащэ къы­гъэуцугъэ пшъэрылъхэр пхырыщыгъэ хъу­щтых. Зэфэсым хэлажьэхэрэм ащ анаIэ тырадзагъ.
ЦIыфхэм цыхьэ къызэрэтфашIырэм мэхьанэшхо иI. Ахэм зэхъокIыныгъэхэр алъэгъух, «Единэ Россием» обществэм ишIоигъоныгъэхэр гъэцэкIэгъэнхэм ынаIэ зэрэтетыр къагурэIо.
Урысые политическэ партиеу «Единэ Россием» икъотэгъухэм яштабэу тиIэм шIушIэ IэпыIэгъум изэхэщэнкIэ, дзэкIолI­хэм адеIэгъэнымкIэ Iофышхо ащ ешIэ. Партием ныбжьыкIэу хэтхэри патриоти­ческэ IофшIэным агу етыгъэу хэлажьэх.

Партием икъутамэхэм яIофшIэн ишIуа­гъэкIэ муниципалитетхэр зэкIэ къызэлъытыубытынхэ, программэхэр ащы­пхырытщынхэ, Iофыгъоу къащытэджырэ пэпчъ тыдэлэжьэн тэлъэкIы. Арэу щыт­ми, «Единэ Россиер» чIыпIэхэм яIофхэм джыри нахь куоу ахэщэгъэным епхыгъэ IофшIэныр муниципальнэ образованиехэм агъэлъэшын фае.
Ар «линие занкIэу» зэхэсщэгъагъэм, цIыфхэм яупчIабэхэм джэуапхэр къызщястыжьыгъэм, къыгъэлъэгъуагъ. СиIоф­шIэгъухэм республикэм исхэм къаIэ­тыгъэ Iофыгъохэм нахь гъэлъэшыгъэу адэ­лэжьэнхэ фае. Партием икъутамэхэм япхыгъэу зэфэсым кIэу щаштагъэхэр къыдэлъытагъэхэмэ, Iофхэр нахьышIу зэ­рэхъущтхэм сицыхьэ телъ.
Ахэм тиIофшIакIэ къагъэлъагъо, ар нахьышIу тшIынымкIэ яшIуагъэ къытэкIы. Нэбгырэ пэпчъ иеплъыкIэ хабзэм лъигъэIэсын амал иIэн, зыгъэгумэкIырэр дэгъэзыжьыгъэ хъун фае.
Партием и Тхьаматэ пшъэрылъэу къы­гъэуцугъэхэр пхырытщынхэу тыхьазыр. УФ-м и Президент кIэщакIо зы­фэ­хъугъэхэр гъэцэкIэгъэнхэм епхыгъэ Iоф­шIэным ахэри хэхьащтых. «Единэ Россием» ипроектэу, лъэпкъ программэу хэдзакIохэм яеплъыкIэхэр къыдалъытэзэ зэхагъэуцуагъэхэм ягъэцэкIэн лъыдгъэкIотэщт, — къащитхыгъ КъумпIыл Мурат социальнэ хъытыухэм.