КIымафэр къызихьагъэм къыщыублагъэу тыгъуа­сэ апэрэу осыр лъэшэу къесыгъ. Пчэдыжьым, транспортыр нахьыбэ зыщыхъурэ лъэхъаным, зекIоныр къины хъугъагъэ. Гъогухэм ягъэкъэбзэн фэгъэзэгъэ техникэр джа­щыгъум IэпыIэгъу хъугъэ.

«Адыгеяавтодорым» къызэри­тыгъэмкIэ, осыр лъэшы къызэ­хъум, шъолъыр ыкIи муниципаль­нэ образованиехэр зэзыпхырэ гъогухэм ахэр атыратIупщы­хьагъэх. Автомлбиль гъогу­хэм ямы­закъоу, лъэсрыкIо гъо­гухэри, лъэмыджхэри, цIыфхэр зезыщэрэ транспортым иуцупIэхэри атхъугъэх, тамыгъэу агъэуцугъэ­хэр водительхэм алъэгъунхэм фэшI агъэкъэбзагъэх, цIэнлъагъо хъумэ атыратэкъощт пшахъор, щыгъур агъэхьазырыгъ.
— Техникэр зынэмысыщтхэр IэкIэ агъэкъэбзагъэх. Шъолъыр гъогухэм язытеткIэ щыкIагъэ зылъэгъурэм «Адыгеяавтодорым» социальнэ хъытыум щыриIэ нэкIубгъохэм къаритхэмэ, охътабэ темышIэзэ дэгъэзы­жьыгъэ хъущт, — къыщыха­гъэщыгъ ГъэIорышIапIэм.
ПсэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ АР-м и Министерствэ нахьыпэкIэ ты­зэрэщигъэгъозагъэмкIэ, кIымэфэ уахътэм шъолъыр мэхьанэ зиIэ гъогухэр агъэкъэбзэнхэм, осыр, мылыр атыратхъунхэм пае техникэ зэфэшъхьафэу 144-рэ республикэм иI. Ахэм ахэтых пшахъор зэбгырызытэкъурэ машинэхэр, грейдерхэр, тракторхэр, нэмыкIхэр.
Техникэм нэмыкIэу, щтыргъу­кIым пшэхъо тонн мини 9, щы­гъу тонн мини 2 ыкIи ахэр зэхэгъэкIухьагъэхэу тонн мини 5 фагъэхьазырыгъ. ПэшIоры­гъэ­шъэу зэрагъэунэфыгъэмкIэ, ар икъущт.
Мафэм температурэр дэкIуае нахь мышIэми, чэщым ехы, къэу­чъыIы, осэу къесыгъэр, ощхы­псыр гъогухэм атещтыхьаным ищынагъо охътэ благъэхэм джыри щыIэщт. Ащ фэшI Адыге­им и Къэралыгъо гъогу инспекцие водительхэм сакъыныгъэ къызхагъэфэнэу, зэрэзекIохэрэр шапхъэхэм ашIуамыгъэкIынэу, апэ ит автомашинэм благъэу емыкIолIэнхэу къялъэIу.
Джащ фэдэу Мыекъуапэ транс­портымкIэ и ГъэIорышIапIэ автобусхэмрэ троллейбус­хэмрэ зэрэзекIохэрэ графи­кыр зэщыкъон зэрилъэкIыщтымкIэ цIыфхэм макъэ къа­регъэIу.