Дунэе Адыгэ Хасэм изэфэсэу бэмышIэу Налщык щыкIуагъэм, зэряхабзэу, мэхьанэ зиIэ Iофыгъохэр къыщаIэтыгъэх. Ахэм ащыщ Дунэе Адыгэ Хасэм хэхьэрэ общественнэ движениехэм ятхьаматэхэм язэIукIэ. Зэфэсым хэлэжьагъэх КъБР-м, АР-м ыкIи КъЧР-м я Адыгэ хасэхэм, Европэм щыIэ Адыгэ хасэхэм я Федерацие, движениеу «Хэкум» япащэхэр.

ПэIудзыгъэ шIыкIэм тетэу Iофтхьабзэм хэлэжьагъэх Израиль, Ставрополь, Шапсыгъэ шъолъырым яхасэхэм ятхьаматэхэр ыкIи ягуадзэхэр, КАФФЕД-м, Абхъазым щызэхащэгъэ хасэхэм ялIыкIохэр.
ДАХ-м игъэцэкIэкIо купхэр ыкIи комитетхэр, игъэцэкIэкIо купрэ иобщественнэ движениерэ 2025 — 2027-рэ илъэсхэм Iофэу ашIэщтым зэфэсым щытегущыIагъэх. Iофтхьабзэм хэлэжьагъэхэм амал яIагъ зэкъош республикищмэ язэхэт гъэзет номерхэм защагъэгъозэнэу, зэфэсым къекIолIагъэхэм ахэр афагощыгъэх.
Дунэе Адыгэ Хасэм и Хэсашъхьэ хэтэу МэщфэшIу Нэдждэт Адыгеим ыцIэкIэ зэфэ­сым хэлэжьагъэхэм ащыщ. Iоф­тхьабзэм гупшысэу ригъэшIыгъэхэр ащ кIэкIэу къытфиIотагъ.
— Адыгэ Хасэр зызэхэща­гъэр 1991-рэ илъэсыр ары. Ащ Урысыем имызакъоу, адыгэхэр зэрыс хэгъэгухэм яхасэхэр хэтых. Лъэпкъыр зыщыIэм къы­щегъэжьагъэу зыфаер къызщыдэхъугъэу плъытэн плъэкIыщтыр 1999-рэ илъэсыр ары. Ащыгъум апэрэу Тыркуем зэIукIэшхо щызэхэтщэгъагъ, ар тхьамафэрэ рекIокIыгъ. Тыдрэ хэгъэгуи адыгэу арысхэм ялIыкIохэр ащ къекIолIэгъагъэх. Мурэтэ Чэпай (Тхьэм джэнэт къырет) зэхахьэм ахэлэжьэ­гъагъ. Ащ нэужым къыIожьыщтыгъ: «Нартхэм къащегъэжьагъэу мыр анахь зэIукIэ ин».
КIэкIэу къэпIон хъумэ, Дунэе Адыгэ Хасэм пшъэрылъ инитIу зыфегъэуцужьы: тыдэ щыIэ адыгэхэр зэлъыгъэIэсыгъэнхэр, угъоижьыгъэнхэр, нэIуасэ зэфэшIыгъэнхэр, сыд фэдэрэ лъэныкъокIи Iоф зэдашIэныр. Анахь шъхьаIэхэм ащыщых хэхэс адыгэхэу хэкум къэзыгъэзэжьынэу фаехэм амалэу щыIэм елъытыгъэу адеIэгъэныр, къэралыгъо зэфэшъхьафхэм ащыпсэурэ адыгэхэр яныдэлъфыбзэкIэ зэлъыIэсхэзэ зы ­лъэпкъ тыхъужьыныр. А лъэныкъомкIэ укъызикIыкIэ, респуб­ликищмэ язэхэт гъэзет номерхэу Адыгэ Хасэм изэфэс къыщырагощэкIыгъэхэр адыгэхэр зэлъыгъэIэсыгъэнхэм фэIорышIэ. Ар лъэшэу гуапэ тщыхъугъ. Сэ анахьэу къыхэзгъэщырэр мэзищым зэ тхыгъэ­хэмкIэ гъэзетым иIофышIэхэр зэрэзэхъожьхэрэм имызакъоу, нахьыбэу зэкIэлъыкIохэ зэрэхъу­гъэр ары. Адыгэ Хасэм къыгъэуцурэ пшъэрылъхэм гъэзетхэр зэрадэлажьэхэрэр шIукIэ афэплъэгъунэу щыт.
Cэ апэ сшIырэ лъэпкъ IофыгъуитIумкIи «Адыгэ макъэм» сыфэраз. Хэхэсымрэ хэкумрэ янэпкъитIу атедзэгъэ лъэпкъ лъэмыдж. Хэхэсымрэ хэкурысымрэ зэлъегъэIэсых, зэфещэх, зэIуегъэкIэжьых. ИIашэри лъэпкъыбзэр, ныдэлъфыбзэр ары.
Арышъ, тигъэзет хэхэсымрэ хэкумрэ амакъэхэр зэлъигъэIэс­хэу, лъэпкъыр опсэуфэ дэпсэунэу фэсэIо.
КIАРЭ
Фатим.
Сурэтыр авторым ий.