«Черкесская Медиаплатформа» зыфиIорэм мультфильмхэр адыгабзэкIэ зэридзэкIыжьынхэмкIэ IофшIэныр лъегъэкIуатэ.

Шъугу къэдгъэкIыжьын, адыгабзэм рилъхьагъэмэ ащыщ «Леорэ Тигрэ» («Лео и Тиг») зыфиIорэр. Джы «Мышъэ-мышъэ цIыкIухэр» («Ми-ми-мишки») Iоф дешIэ. Мыщ серии 100 къы­дыхэлъытагъ. Апэрэ 20-р ыпаIокIэ зэрадзэкIыгъагъ. Джы зыдэлажьэхэрэр Iахь 80-р ары.
— Республикэм иахъщэ IэпыIэгъу къызфэдгъэфедэшъунымкIэ АР-м IофшIэнымрэ социальнэ хэхъоныгъэмрэкIэ и Министерствэ зэхищэгъэ зэнэкъо­къум тыхэлэжьагъ ыкIи текIоныгъэ къыдэтхыгъ, къытатыгъэ ахъщэмкIэ мы серие 80-р зэтэдзэкIы. Мультфильмыр дгъэфедэнымкIэ лицензиер социальнэ нэкIубгъохэр къыз­фэдгъэфедэхи, гупыкI зиIэ цIыфхэм къаугъоигъэгъэ ахъщэмкIэ тщэфыгъагъэ. Илъэс пIалъэр икIыгъэти, АР-м и ЛIышъхьэ иIэпыIэгъукIэ лъыдгъэ­кIотагъ. Джащ фэдэу «Леорэ Тигрэ» зыфиIорэми илицензие ипIалъи хэдгъэхъуагъ., — къыт­фиIотагъ «Черкесская Медиа­платформа» зыфиIорэ мысатыу организацием ипащэу ЛIыхъукIэ Айдэмыр.
ДжырэкIэ «Мышъэ-мышъэ цIыкIухэм» язэдзэкIынкIэ Iоф­шIэныр ыкIэм фэкIо. ПстэумкIи ащ нэбгырипшIым нахьыбэ дэлажьэ. «Тучкэ» зыцIэ персонажым ымакъэ кIэзылъхьэрэр АР-м и Лъэпкъ театрэу Цэй Ибрахьимэ ыцIэ зыхьырэм иактерэу Хъуа­дэкъо Тамрико.
— Проектым ипащэу Тхьакъохъо Мэрджанэт сыкъыригъэблэгъагъ. АщкIэ «тхьауегъэпсэу» есэIо. Тучкэр шъэожъы­еми, сэ сыкъекIоу ылъытагъ (мэщхы Тамрико). IофшIэныр гъэшIэгъон дэд. Уахътэр зэрэкIорэми гу лъыптэрэп. Мафэм серии 6 — 7 теттхэн тэлъэкIы. Зыгорэущтэу кIэ горэ къызфызэIупхынэу уфаемэ, амалышIу. Театрэм сыщэлажьэми, сэркIэ мыр лъэныкъуакI. ЫпэкIэ Москва мыщ фэдэу зыгорэхэм сымакъэ акIаслъхьэу хъущтыгъ, ау ахэр зырызыщтыгъэх. Мыдрэр, мышъэ цIыкIу­хэр, серие пчъагъэ мэхъу. Зы щыIэныгъэ адэогъашIэ, — еIо Тамрико.
Мультфильмым анахь гущыIэрыеу хэтыр Кеша. АР-м и Лъэпкъ театрэу Цэй Ибрахьимэ ыцIэ зыхьырэм иактерэу Хъут Ринатэ ымакъэкIэ адыгабзэкIэ ар къэгущыIэ.
— Апэрэу мэкъэкIэлъхьаным сыдэлажьэ. Шъыпкъэр пIощтмэ, ыпэкIэ, сицIыкIугъом, сыкIэхъоп­сыщтыгъэ мультфильм цIэрыIо горэм зэгорэм сымакъэ кIэслъхьанэу, ау ар «Ми-ми-мишкэм» хэт Кешэр арынэу сшIэгъахэп. Сэр-сэрэу сыкъялъэIугъ пIоми хъущт мы проектым сыхэлэжьэнэу. IофышIэ ужым мыщ тыкъакIоми, зыщысэгъэпсэфы, къызэсынэкIыгъэ мафэм ихьылъэ стырехы, — къыддэгощагъ Хъут Ринатэ.
Тхьакъохъо Мэрджанэт – «Адыгабзэр зэтэгъашIэ» зыфиIорэ проектэу «Мышъэ-мышIэ цIыкIухэр» къыздыхэлъытагъэм ипащ:
— Сэ сисабыйхэр цIыкIухэ зэхъум мыщ фэдэ адыгэбзэ мультфильмхэр щыIагъэхэп. Ар лъэшэу сыгу къео. Зэхахыгъэр зэкIэ нэмыкIыбз, арышъ, бзэр тIэкIэкIы. Ау сабыйхэм яцIыкIугъом къыщегъэжьагъэу ныдэлъфыбзэр зэхахызэ къэхъухэмэ, бзэм икъызэтегъэнэнкIэ амалышIу хъунэу сэлъытэ.
Мыщ фэдэ IофшIэнышхор идэгъугъэкIи шэпхъэшIухэм адиштэу «Черкесскэ Медиаплатформэм» зэхищэнымкIэ респуб­ликэ грантхэм яшIуагъэ къэкIо. Ащ фэшъхьафэу, АР-м и ЛIышъхьэу КъумпIыл Мурат ишIуагъэ­кIэ мэкъэ тетхапIэр мы илъэсым агъэкIэжьыгъ ыкIи IофшIэнымкIэ ищыкIэгъэ Iэмэ-псымэхэр зэрагъэгъотыгъэх. ЗэхъокIыныгъэшIухэм яамалхэми ахагъэхъуа­гъэу проектыкIэхэр агъэхьазырых. «Спокойной ночи, малыши!» зыфиIорэм техыгъэу адыгабзэкIэ къэтын 64-рэ къихьащт 2025-рэ илъэсым къыдагъэкIыщт.

IофшIагъэхэр хьазырхэ зыхъу­кIэ, дунэе хъытыум зэкIэри щяплъынхэ алъэкIыщт. Джащ фэдэу кIэлэцIыкIу IыгъыпIэхэу АР-м гъэсэныгъэмрэ шIэныгъэм­рэкIэ и Министерствэ зэхищэгъэ пилотнэ проектым хэлажьэхэрэм арагъэлъэгъущтых.
Шъугу къэдгъэкIыжьын, «Черкесская Медиаплатформа» зыфиIорэ мысатыу организациер 2021-рэ илъэсым къыще­гъэжьагъэу мэлажьэ. Iофэу ышIэрэр зэкIэ адыгабзэм икъэухъумэнрэ лIэужыкIэхэм ягъэшIэгъэнымрэ атегъэп­сыхьагъ.
Анцокъо
Ирин.
Сурэтхэр авторым иех.