Лъэпкъ проектэу «ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу «Псы къабзэм» къыдыхэлъытагъэу мыгъэ Адыгеим щызэшIуахыгъэхэм ащыщ Теуцожь районым ипсэупIищмэ псыкъычIэщыпIэу ащагъэкIэжьыгъэхэр.

Къуаджэхэу Пэнэжьыкъуай, Нэшъу­къуай ыкIи поселкэу Лъэустэнхьабл къыхиубытагъэхэр мыгъэ. Ахэм псыр къызчIащыщтхэр кIэу ащатIыгъэх, башнехэр ащагъэуцугъэх, псыр зыгъэкъэ­бзэщт системэхэр ащагъэпсыгъэх, чIыпIэу къызэлъаубытыхэрэр зэрагъэфагъэх, къашIыхьагъэх, чэщрэ къэнэфынхэу ашIыгъ. Псэуалъэхэр охътэ благъэм атIупщынхэу тхылъхэр агъэхьазырых.
АР-м псэолъэшIынымкIэ, транспортымкIэ, псэупIэ-коммунальнэ ыкIи ­гъогу хъызмэтымкIэ и Министерствэ къызэритыгъэмкIэ, ахэм апае районым сомэ миллион 85-м ехъу фатIупщыгъ. IофшIэнхэр игъом ыкIи шапхъэхэм адиштэу зэшIуахыгъэх.
Джэджэ районым ит станицэу Дондуковскэри мы илъэсым проектым къы­хиубытагъэхэм ащыщ. Ащ псыр къызчIэкIырэ скважинитIу кIэу щаубырыугъ, ахэм кIочIэгъу афэхъунэу башне кIэу тырагъэуцуагъ, нэмыкIэу ищыкIагъэхэр щагъэпсыгъэх, чIыпIэу къызэлъиубытырэр къашIыхьагъ, зэтырагъэпсыхьагъ. А IофшIэнхэм зэкIэмкIи сомэ миллион 31-рэ фэдиз апэIухьагъ.
«Псы къабзэм» къыдыхэлъытагъэу мы илъэсымкIэ псэолъи 6 ашIынэу агъэнэфэгъагъ. Хэзыгъэ имыIэу а пшъэ­рылъхэр гъэцэкIагъэхэ хъугъэ. IофшIэнхэм апэIухьэгъэ сомэ миллиони 162-м щыщэу сомэ миллиони 143,3-р федеральнэ бюджетым къыхэхыгъ.
Адыгеир лъэпкъ проектым зыхэлажьэрэм къыщыублагъэу псэупIэ 33-мэ псыкъычIэщыпIэхэр кIэу ащашIыгъэх е яIагъэхэр ащагъэкIэжьыгъэх. Ахэм пстэумкIи сомэ миллион 900-м ехъу апэIуагъэхьагъ.

Сурэтыр: Шэртэнэ Мурат.