УФ-м и Президент хэбзэгъэуцугъэм кIэтхагъ
Нэбгырэ заулэмэ зэдыряе чIыгу Iахьым автомашинэм пае гъэуцупIэ щыгъэпсыгъэным шапхъэу пылъхэр къэзыгъэнэфэрэ хэбзэгъэуцугъэм УФ-м и Президентэу Владимир Путиныр кIэтхагъ.
ШэкIогъум и 13-м УФ-м и Къэралыгъо Думэ ар ыштагъ, и 20-м ФедерациехэмкIэ Советыр хаплъи, дыригъэштагъ. УФ-м играждан Кодекс ыкIи амыгъэкощырэ мылъкум фэгъэхьыгъэ Федеральнэ хэбзэгъэуцугъэм зэхъокIыныгъэхэр афэшIыгъэнхэм ар афэгъэхьыгъ.
Статс-секретарэу, Росреестрэм ипащэ игуадзэу Алексей Бутовецкэм къызэриIуагъэмкIэ, «автомобилым пае чIыпIэ (машино-место)» зыфиIорэ гущыIэр 2017-рэ илъэсыр ары законым къызхэхьагъэр.
— Хэбзэгъэуцугъэу щыIэм къызэрэщиIорэмкIэ, ащ фэдэу нэбгырэ заулэмэ зэдыряе чIыгу Iахьым автомашинэм пае чIыпIэ щызгъэпсымэ зышIоигъом зэкIэ зыехэм пэрыохъу зэрэмыхъухэрэр къаушыхьатын е зэIукIэ ашIынышъ зэдаштэн фае. Ау ар гъэцэкIэгъуае мэхъу, сыда пIомэ, чIыгу Iахьым зиIоф хэлъхэм ащыщхэр зыдэщыIэхэр умыгъэунэфышъоу бэрэ къыхэкIы. Мы законыкIэм Iофхэр нахь къегъэпсынкIэх, — къыIуагъ Алексей Бутовецкэм.
Хэбзэгъэуцугъэм къызэрэщиIорэмкIэ, автомобилым пае чIыпIэ зищыкIагъэм чIыгум зиIахь хэлъхэм макъэ язгъэIурэ тхылъыр афигъахьынэу ары ныIэп ищыкIэгъэщтыр. Кадастрэ инженерым нэмыкI Iофэу пылъхэр зэшIуихыщтых.