АР-м и Лъэпкъ тхылъеджапIэ щыкIуагъ Херсон хэкум и Геническэ район тхылъеджэпIэ IофышIэхэмрэ республикэм щылэжьэрэ ясэнэхьатэгъухэмрэ зыщызэхэгущыIэжьыгъэхэ Iофтхьабзэ.

Тыгъэгъазэм и 6-м Адыгеим респуб­ликэ семинарэу «Планирование деятельности библиотек Республики Адыгея: поиск оптимальных решений» зыфиIорэр щыкIуагъ. Iофтхьабзэм хэлэжьагъэхэм тхылъеджапIэхэм яIофшIэн зэрипхъухьащтымкIэ яшIошIхэр къыраIотыкIыгъэх. СэнэхьатымкIэ зэхэгущыIэжьыр къи­хьащт 2025-рэ илъэсым ягухэлъхэм ыкIи ахэр зэшIохыгъэ зэрэхъущтхэм афэгъэ­хьыгъагъ. ПэIудзыгъэ шIыкIэм тетэу Херсон хэкум и Геническэ районэу Адыгэ Республикэр IэпыIэгъу зыфэхъу­рэм итхылъеджэпIэ IофышIэхэр ащ къыхэлэжьагъэх.
— Анастасия Дмитриевна Диденкэр, Херсон хэкум и Геническэ район гупчэ тхылъеджапIэ иметодист шъхьаIэ, ятхылъеджапIэкIэ онлайн-экскурсиер къы­шIыгъ, анахьэу анаIэ зытыраригъэдзагъэр Адыгэ Республикэм фэгъэхьыгъэ къэгъэлъэгъон-экспозициер ары. Еджэным мурадэу, пшъэрылъэу зэшIуихыхэрэм ыкIи тхылъеджэхэм ашIогъэшIэгъон лъэныкъохэм пэIудзыгъэ шIыкIэм тетэу къатегущыIагъ Вера Ялышевар, Урысые лъэпкъ тхылъеджапIэм еджэнымкIэ и Гупчэ ипащэ, — къыщыхагъэ­щыгъ АР-м культурэмкIэ и Министерствэ.
Семинарым щаштагъэх тапэкIи Геническэ районымрэ Адыгэ Республикэмрэ ятхылъеджэпIэ IофышIэхэр зэрэзэдэлэжьэщтхэмкIэ методическэ унашъохэр, джащ фэдэу яIофышIэхэм яшIэныгъэхэм ахэгъэхъогъэнымкIи ыкIи тхылъеджапIэхэм яамалхэр нахьышIу зэрашIыщтымкIи. Урысыем ишъолъыритIумэ ятхылъеджапIэхэм цIыфыбэ къящэлIэгъэ­нымкIи Iоф ашIэщт.