Унэе предпринимателэу бюджет ахъщэр зытыгъугъэу зэгуцафэхэрэм ылъэныкъокIэ уголовнэ Iоф къызэIуа­хыгъ.

ЩынэгъончъэнымкIэ федеральнэ къу­лыкъум и ГъэIорышIапIэу АР-м щыIэм Урысыем хэгъэгу кIоцI IофхэмкIэ и Министерствэ иотделэу Мыекъопэ районым щыIэр игъусэу илъэс 46-рэ зыныбжь унэе предпринимателэу гъэпцIагъэ зыхэлъ бзэджэшIагъэ зезыхьагъэр къыхагъэщыгъ.
КъулыкъушIэхэм зэрагъэунэфыгъэмкIэ, 2024-рэ илъэсым, щылэ мазэм Тимирязевскэ къоджэ псэупIэм иадминистрациерэ унэе предпринимателымрэ къэралыгъо зэзэгъыныгъэ зэдашIыгъ Мыекъопэ районым ит поселкэу Цветочнэм дэт псэуалъэм сомэ миллиони 2,8-рэ зытефэрэ игъэкIотыгъэ псэолъэшI Iоф­шIэнхэр рашIылIэнхэу.
Уголовнэ Iоф къызфызэIуахыгъэм ишъхьэгъусэ доверенность къыIихи тхылъ нэпцIхэр ыгъэпсыгъэх ыкIи бюджет ахъщэу сомэ мин 938-рэ ытыгъугъ.
Урысыем хэгъэгу кIоцI IофхэмкIэ и Министерствэ иотделэу Мыекъопэ районым щыIэм иследственнэ отдел материалэу къыIэкIэхьагъэхэмкIэ уголовнэ Iоф къызэIуихыгъ.
Мы мафэхэм следовательхэм следственнэ IофшIэнхэр зэрахьэх, гъэпцIакIом нэмыкI бзэджэшIагъэхэр зэрихьагъэмэ ауплъэкIу.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу.