Гъот макIэ зиIэ унагъохэу кIэлэцIыкIухэр зэрысхэм ыпкIэ хэмылъэу анахь ящыкIэгъэ пкъыгъохэр къазыщаратыщт къулыкъоу «Пункт проката» зыфиIорэм Iоныгъо мазэм къыщегъэжьагъэу Мыекъуапэ Iоф щешIэ.

А уахътэм къыкIоцI ар цIыфхэм къы­зэрэзыфагъэфедагъэр, фэIо-фашIэм зэхъокIыныгъэу фашIыгъэр ­къедгъэIотагъ цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу (КЦСОН) Мыекъуапэ дэтым ипащэу Артур Казиновым.
— Сабыибэ зэрыс унагъохэм ыкIи зигъот макIэхэм яфэныкъуа­гъэхэр дэгъэзыжьыгъэ­нхэмкIэ социальнэ IэпыIэгъоу республикэм аригъэгъотырэм, цIыфышъхьэ пчъагъэм ахэгъэхъогъэным фэшI мы чIыпIэр АР-м и ЛIышъхьэу ­КъумпIыл Мурат иунашъокIэ къызэIуахынэу хъугъэ. БэмышIэу мы фэIо-фашIэм хэгъэ­хъожьын фашIыгъ ыкIи хэушъхьафыкIыгъэ дзэ операцием хэлажьэхэрэм яунагъохэм мы амалыр джы къызфагъэфедэн алъэ­кIыщт. Къулыкъоу «Пункт проката» зыфиIорэм Iоф зыщишIэрэ мэзищым ар нахьыбэу цIыфхэм зэрэзэлъядгъэшIэщтым тыпы­лъыгъ. Ащ пае мэкъэгъэIу тхьапэхэр къыхядгъэутыгъэхэу ТОС-хэм, кIэлэцIыкIу IыгъыпIэхэм, IэзапIэхэм ащыдгощыгъэх, официальнэ сайтхэм, социальнэ хъы­тыухэм къащыхэтыутыгъ. Унэгъуи 5—6-мэ зыкъытфагъэ­загъ, анахьэу къызкIэлъэIугъэхэр сабыир зыщагъашхэрэ пхъэн­тIэкIур, кIоныр езыгъэжьэгъа­кIэр зэрагъэуцорэ пкъыгъор, автомобилым рагъэуцорэ тIысыпIэ зэфэшъхьафхэр, курэжъыер, — хигъэунэфыкIыгъ Артур Казиновым.
Шъугу къэдгъэкIыжьын, кIэлэцIыкIум ищыкIэгъэ псэуалъэхэр зымыщэфы­шъущтхэм «Пункт проката» зыфиIорэм зыкъыфагъэзэнышъ, сабыим ыныбжь илъэсищым нэсыфэ ищыкIэгъэщтыр ыпкIэ хэмылъэу къыIахын алъэкIыщт. Гъот зимыIэ унагъохэм, джы хэушъхьафыкIыгъэ дзэ операцием хэлажьэхэрэм яунагъохэм сабыйхэм япIункIэ ящыкIагъэхэр агъотынхэмкIэ мы къулыкъур амалышIоу щыт. Апэ мэзих пIалъэкIэ зэзэгъыныгъэм адыкIатхэх, ящыкIагъэ зыхъукIэ нэужым ар лъагъэкIуатэ. Зы унагъом зэтыгъоу пкъигъуитIу нахьыбэ ратырэп. Мы IэпыIэгъур игъо шъыпкъэу щыт, сыда пIомэ а пкъыгъохэр зэкIэ къэпщэфынхэр непэкIэ лъапIэх. Сабыим ищыкIагъэхэр ыпкIэ хэмылъэу унагъохэм агъотышъу хъумэ, ящыIэныгъэ къыгъэп­сынкIэщт.
ТигущыIэгъу къызэриIуагъэмкIэ, пкъы­гъоу мы къулыкъум чIагъотэщтхэм ащыщых (къэхъугъакIэхэм къащегъэжьагъэу илъэсищ зыныбжьхэм анэсэу) курэжъые зэфэшъхьафхэр, сабый гъолъып­Iэр, кIоныр езыгъэжьэгъакIэхэр зэрагъэуцохэрэр, автомобилым рагъэуцорэ хэушъхьафыкIыгъэ тIысыпIэхэр, нэмыкIхэри. Къыхэгъэщыгъэн фае сабыйхэм япIункIэ ящыкIэгъэ пкъыгъоу мы къулыкъум чIэтхэр зэкIэ кIэу къызэращэфыгъэхэр. Ащ пае республикэ бюджетым сомэ мин 815-м ехъу къыхагъэкIыгъ. Джыри тапэкIэ ащ къыщымыуцухэу, закъыфэзгъэзэщт нэбгырэ пчъагъэм елъытыгъэу, «Пункт проката» зыфиIорэм чIэт пкъыгъохэм ахагъэхъон гухэлъ яI.
Iэшъынэ Сусан.