Адыгэ культурэмкIэ анахь хъугъэ-шIэгъэ инэу «Черкес ФМ ижъуагъохэр» зыфиIорэм имыгъэрэ концерт Москва щыкIуагъ.

Хабзэ зэрэхъугъэу, тыгъэгъазэм и 5-м ар ре­кIокIыгъ. Къош республикищмэ яорэдыIохэм зэри­фэшъуашэу лъэпкъ культурэм идэхагъэ аIэтыгъ, агъэIугъ. Ащ хэлэжьагъэх орэдыIо цIэрыIохэу Тутэ Заур, Нэхушъэ Чэрим, Фе­ликс Царикати, Сэкъурэ Ольга, Тхьагъэлыдж Светлана ыкIи нэмыкIхэр. Адыгеир концертым къыщагъэлъэгъуагъ Быщтэкъо Азэмат, Даут Сусанэ, купхэу «Ащэмэз» ыкIи «Мыст». КъэIогъэн фае, аужырэ илъэситIум зэ­лъыпытэу Адыгеим илIыкIохэр «Черкес ФМ-м ижъогъуакIэхэу» концертым къыщыхагъэщых. Блэ­кIыгъэ илъэсымкIэ ар ку­пэу «Ащэмэз», мыгъэ — «Мыст». Купыр кIэ нахь мышIэми, адыгэ дунаим псынкIэу щызэлъашIагъ ыкIи шIу алъэгъугъ. Аужырэ илъэситIум ныбжьыкIэ купым лъэшэу зыкъызэ­Iуихыгъ. Лъэпкъ жэрыIо творчествэм шъошакIэу ригъэгъотырэр бэмэ агу рехьы. Мыщ фэдэ шIыкIэ­кIэ ахэм пэсэрэ орэ­дыжъхэм щыIэкIакIэ ара-
ты, анахь шъхьаIэр, джырэ ныбжьыкIэхэм ящыIэныгъэ щыщ ашIы.
— «Черкес ФМ-м ижъо­гъуакI» зыфиIорэ лъэныкъомкIэ тыкъызэрэхагъэщыгъэр тэркIэ зымыуасэ щы­Iэп. Тызэмыжэгъэ хъугъэ-шIагъэу тэркIэ щыт. Ащ фэдэ Iофтхьэбзэ иным тызэрэхэлажьэрэр апэр. Хьэцей Тимур ащ ты­зэрэригъэблэгъагъэмкIэ «тхьауе­гъэпсэу» етIомэ тшIоигъу. Тиамалхэм ащ къахигъэхъуагъ, къытэплъы­рэмэ, тызэхэзыхырэмэ япчъагъэ хэдгъэхъонымкIэ лъэбэкъушIу, адыгэмэ ­ялъэпкъ жэрыIо творчествэ нахьыбэ нэIуасэ фэхъу. Джы «Черкес ФМ-м ижъо­гъуакI» зыфиIорэ цIэр къызэрэтфагъэшъошагъэм къыкIэлъыкIоу искусствэхэмкIэ фестивалэу «Славянский базар» зыфиIорэм къэкIорэ илъэсым тыхэлэжьэщт. АщкIэ Хьэцей Тимур IэпыIэгъу къыт­фэхъунэу тыкъыгъэгугъагъ. Ащ лъэшэу тегъэгушIо, — къыддэгощагъэх купэу «Мыстым» хэтхэр.
Джащ фэдэу концертым еплъыгъэхэм шIухьафтын афэхъугъ Адыгеим илIыкIо ащ изещэн зэрэхэлэжьагъэр. «Черкес ФМ-м ижъуа­гъохэр» ыпэкIэ нэбгыритIумэ зэращэщтыгъэ­мэ, Гумэ Маринэрэ Владимир Березинымрэ, джы концертым изэхэщакIоу Хьэцей Тимур игукъэкIыкIэ мыгъэ ахэм ахэуцуагъ АР-м изаслуженнэ журналистэу, КъТРК-у «Адыгеим» иIофышIэу ТIэшъу Светланэ.
— Сэри лъэшэу згъэшIэ­гъуагъэ сыкъызырагъэблагъэм ыкIи лъэшэу сыгу­шIуагъ. «Черкес ФМ-м» изэхэщакIоу Хьэцей Тимур къысфытеуи «мыщ фэдэу Адыгеим къикIырэ орэдыIохэр хэлажьэхэшъ, ащ щыщ зещэ тиIэнэуи тыфай» къысиIуагъ. Къэбэртэябзэр зэрэщыIурэм фэдэу кIахэ, адыгабзэри щыIунэу фэягъ. Джаущтэу сыкIонэу хъугъэ ыкIи сигопэ дэд, — тыщигъэгъозагъ ТIэшъу Светланэ. — Концертыр зэрагъэпсырэм идэгъугъэ кIэ­хьан щыIэп: зэрэзэхэщагъэр, пчэгур зэрэшIыгъэр, зэрэгъэдэхагъэр, остыгъэ­хэр, макъэхэр, тезыхырэмэ анэсыжьэу. Еплъынэу къэкIогъагъэр бэдэд. КъэгъэлъэгъуапIэр нэбгырэ 1300-м къехъумэ ателъытагъ, чIыпIэ нэкI иIагъэп. Концертыр сыхьатищым кIахьэу кIуагъэ.
— Свет, ащ хэлэ­жьэщтхэр сыдэущтэу къыхахыхэра?
— Илъэсым къыкIоцI цIыфхэр нахь зэдэIухэу, нахьыбэрэ пчэгу зэфэшъхьафхэм зымакъэ ащыIурэ орэдыIохэр ары къарагъэ­благъэхэрэр. Быщтэкъо Азэ­мат зэрякIасэм щэч хэ­лъэп. Концертыр зыщызэ­хащагъэм ар къызыхъугъэ мафэу тефагъ, арышъ, хэу­шъхьафыкIыгъэу фэгу­шIуагъэх. «Мыстым» дэгъу дэдэу къыпэгъокIыгъэх, лъэшэу агу рихьыгъ.

— «Мыстым» пIуагъэшъ сыкъэуп­чIэщт. Свет, хъытыум къибдзагъэхэм талъыплъагъ. ГущыIэ миным ачIыпIэкIэ зы гущыIэкIэ Владимир Березиным сыдэущтэу адыгабзэ ебгъэшIагъа? КъэпIощтым хэтхагъэу щытыгъа?
— Хьау, хэтхэгъагъэп, ау ащ фэдэу «оуие» го­рэхэр хэбгъахьэхэмэ нахь дэгъоу зэрэхъущтыр ежь Владимир Березиным къы­хигъэщыгъ. Арыти, нэбгыритIум тизакъоу сценэм ты­тет зыхъукIэ, ащ фэдэхэр къыхэдгъафэщтыгъэх. Джаущтэу «Мыстыр» пчэгум къитщэн зэхъум тIэкIу тысэмэркъэунэу хъугъэ. «Мыст» пIомэ гущыIэ минмэ ачIыпIэ хъущт сIошъи, ар къыкIиIотыкIыжьыгъ. Къытэплъыгъэхэри ащ ыгъэчэфыгъэх.
Концертым мыкIуагъэ­хэм а пстэуми шIэхэу тяп­лъыжьын тлъэкIыщт. Ты­гъэгъазэм и 25-м хъытыу нэкIубгъохэм къарагъэ­хьащт, «я 9-рэ хыорым», шъолъыр телевидениехэм къащагъэлъэгъожьыщт.
Анцокъо Ирин.